مردِ حق آگاہ کا پیغام، علماء ہند کے نام

مردِ حق آگاہ کا پیغام، علماء ہند کے نام
ترجمہ: محی الدین غازی
مصر کی جیل سے مشہور عالم ڈاکٹر صلاح سلطان کی ایمان افروزتحریر
(یہ پیغام اسلامی فقہ اکیڈمی کے حالیہ چھبیسویں سیمینارکے لیے ۲۰؍ فروری۲۰۱۷ء کو لکھا گیا، اس خط میں فقہ اکیڈمی کے سلسلے میں نیک جذبات،اعلی خواہشات اور مفیدمشورے بھی شامل تھے، جنہیں طوالت سے بچنے اور پیغام کی عمومیت برقرار رکھنے کی خاطر حذف کردیا گیا ہے۔مترجم)
جیل کی تاریک کوٹھری سے میرا یہ پیغام سرزمین ہند کے ہر بزرگ او ر ہر نوجوان عالم کے نام ہے۔ جیل کا ذکر قرآن مجید میں دس مرتبہ ہوا ہے، اور ہر مرتبہ صرف اور صرف مصر کی جیل کا تذکرہ ہوا ہے۔ اور جب بھی ہوا ہے کھلے ہوئے ظلم کی علامت کے طور پر ہوا ہے۔ یہ درست ہے کہ جیل کے اندر میں اور میرے ساتھی ہولناک ترین اذیتوں سے گزر رہے ہیں۔ یہ بھی صحیح ہے کہ ہماری تصویر مسخ کرنے کی ساری کوششیں کی جارہی ہیں، یہاں تک کہ میرے بارے میں ان لوگوں نے یہ بھی پھیلادیا کہ میں ان دس لوگوں میں ہوں جنہیں دنیا ہی میں جہنمی ہونے کا پروانہ مل چکا ہے، (اللہ کی پناہ)۔پر خدا ئے ذوالجلال کی قسم، جس سے مجھے اتنی محبت ہے کہ میری زندگی اور زندگی کی ساری امنگیں اس کی محبت سے معمور ہیں، اس وقت میں اپنے پیارے رب کی مدد سے خود کو دنیا کی ساری طاقتوں اور سارے مجرموں سے زیادہ طاقتور پاتا ہوں۔ جب میری پیٹھ پر کوڑے برستے ہیں تو مجھے یہ پڑھتے ہوئے لطف آتا ہے وَلَاتَھِنُوا وَلَا تَحزَنُوا وَ أَنتُمُ الأَعلَونَ اِن کُنتُم مّْومِنِینَ ’’اور پست ہمت نہ ہو اور غم نہ کرو، اور اگر تم مومن ہو تو غالب رہو گے‘‘ ۔ میرے خلاف پھانسی کی سزا کا فیصلہ بھی ہوچکا ہے، سالہا سال سے مجھے تاریک کوٹھری میں رکھا گیا ہے وَمَا نَقَمْوا مِنھُم اِلَّا أَن یُؤمِنُوا بِاللہِ العَزِیزِ الحَمِیدِ۔’’اور انہوں نے ان پر محض اس وجہ سے ستم ڈھائے کہ وہ خدائے عزیز وحمید پر ایمان لائے‘‘مگر اس سب کے باوجود میری اپنے مہربان رب سے قربت، علم کے سمندرمیں غواصی، خودی کی بلندیوںمیں پرواز اور اللہ کی رضا اور جنت کی طرف اڑان میں اضافہ ہی ہوا، امت کو قرآن وسنت کے پرچم تلے جمع کرنے، انسانوں اور دیسوں کو غیر اللہ کی بندگی سے پاک کرنے، صہیونی غاصبوں اور ان کی پشت پناہی کرنے والے سارے اسلام دشمنوں سے مسجد اقصی، قدس اور فلسطین کو آزاد کرانے کی سمت قدم ہیں کہ بڑھتے ہی جارہے ہیں۔ میرے دل میں گہرا یقین ہے کہ اللہ ہم سے کیا ہوا وعدہ ضرور پورا کرے گا۔فَانْتَقَمنَا مِنَ الَّذِینَ اَجرَمُوا وَ کَانَ حَقًّا عَلَینَا نَصرُ المُؤمِنِینَ۔ ’’تو ہم نے ان لوگوں کو سزا دی جنہوں نے جرم کیا، اور اہل ایمان کی نصرت ہم پر لازم ہے‘‘۔
میں اس وقت آپ لوگوں کے نام یہ پیغام لکھ رہا ہوں، جبکہ مجھے صرف چالیس سینٹی میٹر کی جگہ ملی ہوئی ہے، سخت ٹھنڈک سے میرا جسم تھر تھر کانپ رہا ہے، میرے پاس ایسی کوئی چیز نہیں ہے جس سے کچھ بھی گرمی کا احساس مل سکے، تاہم میرے پاس اللہ کی محبت ہے، اور اللہ واسطے کی آپ لوگوں سے محبت ہے، قلب اور روح کی گرمی کے لیے یہ کافی ہے۔سرزمین ہند کے میرے عزیز ترین اور پروقار علماء کرام، میں تین بار اللہ کی قسم کھا کر کہتا ہوں کہ اس روئے زمین پر غزہ کے میرے بھائیوں کے بعد اگر کسی سرزمین کے لوگوں سے مجھے ملنے کاشدید اشتیاق رہتا ہے تو وہ آپ لوگ ہیں، یہاں کے بزرگ اور نوجوان علماء کی صحبت میں سعادت کا جو احساس ملتا ہے وہ اپنی مثال آپ ہے۔ میرے پاس اس تعلق خاطر کے بہت سے ثبوت ہیں، میں دو ثبوت پیش کروں گا۔
پہلا ثبوت: آخری دفعہ جب اپنی عزیزفقہ اکیڈمی کے مدراس میں ہونے والے پروگرام میں شرکت کرکے واپس لوٹا تو میرے ایک عزیز نے فون کرکے پوچھا، کیا ڈاکٹر صلاح ہندوستان سے واپس آگئے ہیں، میری اہلیہ نے جواب دیا، ابھی مسجد نماز کے لیے گئے ہوئے ہیں، تھوڑی دیر بعد ان سے بات ہوسکے گی، ویسے وہ ہندوستان سے واپس آئے نہیں ہیں، ان کا دل ابھی وہیں پر ہے، وہ صرف جسم کے ساتھ آئے ہیں، ان سے ملاقات کے وقت ان کی اس کیفیت کا خیال رکھنا۔دوسرا ثبوت: سب سے پہلی بار جب اپنی عزیزفقہ اکیڈمی کے پروگرام میں ہندوستان جانا ہوا، تو چالیس گھنٹوں کا سفر کرکے واشنگٹن سے دہلی پہنچا تھا، موسم کی خرابی کی وجہ سے سفر کی طوالت بھی بڑھ گئی تھی، اورتکان بھی۔ لیکن جب میں وہاں پہنچا اور علماء اور نوجوانوں کے ذوق وشوق کو دیکھا، تو ساری تکان دور ہوگئی، اور جب میں اسٹیج پر پہنچا تو میرا جسم میرا دماغ اور میرا دل سب تازہ دم تھے، غرض ایسی بہت سی قیمتی یادیں ہیں، دلی، دار العلوم دیوبند، دار العلوم ندوۃ العلماء سے کیرلا تک جو دل کو بہت لطف دیتی ہیں۔سرزمین ہند کے میرے پیارے بزرگ اور نوجوان علماء کرام، مجھے اجازت دیں کہ میں ان فکروں اوران امنگوں میں آپ کو شریک کرسکوں، جنہوں نے مجھے بے چین اور بے تاب کررکھا ہے، ان سب کو سمیٹنا چاہوں تو سارا مدعا اس میں سمٹ آتا ہے، کہ من أنصاری الی اللہ ’’کون ہے جو اللہ کی راہ میں میرا دست وبازو بنے ‘‘ اور انہیں پھیلاؤں تو تفصیل اس طرح ہے:
پہلی فکر: انفرادی سطح پر ہر ایک عالم کے لیے
ہم چاہتے ہیں کہ ہماری راتیں تہجد اور ہمارے دن حصول علم کی جدوجہد سے آباد رہیں، ذکر وشکر، گریہ وزاری، دعا واستغفار، اور خوف ورجا کی کیفیت سے ہمارے شب وروز رنگین رہیں إِنَّ الَّذِیْنَ أُوتُواْ الْعِلْمَ مِن قَبْلِہِ إِذَا یُتْلَی عَلَیْہِمْ یَخِرُّونَ لِلأَذْقَانِ سُجَّداً۔ وَیَقُولُونَ سُبْحَانَ رَبِّنَا إِن کَانَ وَعْدُ رَبِّنَا لَمَفْعُولاً۔وَیَخِرُّونَ لِلأَذْقَانِ یَبْکُونَ وَیَزِیْدُہُمْ خُشُوعا۔’’وہ لوگ جنہیں اس کے پہلے سے علم ملا ہوا ہے جب یہ ان کو سنایا جاتا ہے تو وہ ٹھوڑیوں کے بل سجدہ میں گرپڑتے ہیں اور کہتے ہیں کہ پاک ہے ہمارا پروردگار، بے شک ہمارے پروردگار کا وعدہ شدنی تھا۔ اور وہ ٹھوڑیوں کے بل روتے ہوئے گرتے ہیں اور یہ ان کے خشوع میں اضافہ کرتا ہے‘‘۔
ہم چاہتے ہیں کہ ہمارے پاس اللہ سے لو لگانے والا دل ہو، اللہ کا ذکر کرنے والی زبان ہو، جدت وتخلیقیت والا دماغ ہو، ہمارے اخلاق محسنین والے ہوں ، ہمارے جسم مجاہدین والے ہوں، ہماری خاموشی غوروفکر والی ہو، ہمارے پاس دیدہ عبرت نگاہ ہو، اور ہماری گفتگو ذکر سے عبارت ہو، ہم چاہتے ہیں کہ ہم مقربین کے مقام پر فائز ہونے کے لیے کوشاں رہیں، تاکہ ہماری زندگی ان مسلمانوں کے لیے نمونہ بن جائے جو اصحاب الیمین کے زمرے میں شامل ہونا چاہتے ہیں۔ ہم چاہتے ہیں کہ ہم ان لوگوں میں شامل ہوجائیں جن کے لیے رب کریم نے یہ الفاظ چنے ہیں: وَقَالَ الَّذِیْنَ أُوتُوا الْعِلْمَ وَالْإِیْمَان۔ کونوا ربانیین۔ رحمۃ وعلما، حکما وعلما۔
ہم چاہتے ہیں کہ لوگوں کے پاس جو کچھ ہے اس سے ہم بے نیاز ہوجائیں، اور اس کا حق ادا کرنے کی فکر کریں جو رب دوجہاں نے ہمیں عطا کیا ہے۔ یَرْفَعِ اللَّہُ الَّذِیْنَ آمَنُوا مِنکُمْ وَالَّذِیْنَ أُوتُوا الْعِلْمَ دَرَجَاتٍ۔’’اللہ ان لوگوں کے ، جو تم میں سے اہل ایمان ہیں اور جن کو علم عطا ہوا ہے، مدارج بلند کرے گا‘‘۔ ہم چاہتے ہیں کہ لوگ ہماری سیرت وشخصیت میں قرآنی اخلاق اور رسول پاک کی سیرت کا پرتو دیکھیں، ہم ان کے لیے قابل تقلید نمونہ بن جائیں۔وَجَعَلْنَا لَہُ نُوراً یَمْشِیْ بِہِ فِیْ النَّاسِ۔’’اور ہم نے اسے ایک روشنی بخشی جسے لے کر وہ لوگوں میں چلتا ہے‘‘۔ ہم بے سمت اور بے ہدف مطالعات کے بجائے منظم سنجیدہ اور بامقصد مطالعہ کو اپنا شعار بنائیں، چھلکوں سے سرسری واقفیت تک محدود رہ جانے کے بجائے جڑوں کا گہرا علم حاصل کریں۔ تاکہ ہم وَالرَّاسِخُونَ فِیْ الْعِلْمِ کا مصداق ہوجائیں۔ہم اس مقام پر پہنچ جائیں جس کا ذکر اس ارشاد رسول میں ہے کہ مثل ما بعثني اللہ بہ من الھدی والعلم کمثل غیث أصاب أرضا فکان منھا نقیۃ قبلت الماء فأنبتت الکلأ والعشب الکثیر۔’’اللہ نے مجھے جس ہدایت اور علم کے ساتھ مبعوث کیا ہے، اس کی مثال ایسی ہے جیسے زمین پر موسلا دھار بارش ہوئی ہو، اس زمین کا ایک حصہ زرخیز پانی قبول کرلے اور وہاں خوب خوب چارہ اگ جائے‘‘ اس حدیث میں اس طرف اشارہ ہے کہ جو وحی کو قبول کرلیتا ہے، اور دماغ کی جولانیوں کو وحی کی رفعتوں کے ساتھ ہم آہنگ کردیتا ہے، تو پھر حکمت ومعرفت کے درخت نشونما پاتے ہیں، پھول کھلتے ہیں اور پھل آتے ہیں۔ تجدیدی کوششیںہوںیا تخلیقی کاوشیں ہوں ان کی اصل بنیاد وحی الٰہی کو ہونا چاہیے، جس طرح زندگی کی اساس پانی ہے۔ وَجَعَلْنَا مِنَ الْمَاء کُلَّ شَیْْء ٍ حَيٍّ۔
دوسری فکر، خاندان کی سطح پر
ہم بھرپور کوشش کریں کہ ہم میں سے ہر عالم دین اس ارشاد رسالت کا پیکر بن جائے، کہ’’ تم میں بہترین وہ ہے جو اپنے گھر والوں کے لیے بہترین ہو، اور تم سب سے زیادہ اپنے گھر والوں کے لیے بہترین میں ہوں‘‘۔ ہر لحاظ سے بہترین رویہ اختیار کریں،دل کی محبت ہو، ذہن کی ہم آہنگی ہو، یا جسم کی قربت ہو، ضروری ہے کہ ہم سب سے بہتررہیں۔ ہم آگے آئیںعورتوں کو انصاف دلانے کے لیے اور انہیں عزت ورفعت والا مقام دلانے کے لیے نہ کہ محض زیادہ طاقت و قوت والا مقام کہ سیکولرزم کے علم برداراور اقوام متحدہ کے ادارے جس کے داعی اورعلم بردار ہیں۔ ہم سب لوگوں سے زیادہ کوشش کریں اس بات کی کہ عورتوں کو ان کے مادی، معنوی اور علمی تقاضوں اور ان کی جسمانی صحت کے لحاظ سے ایک سازگار اور باعزت زندگی گزارنے کا حق حاصل رہے۔ ہم اس دل دہلا دینے والی شرمناک صورت حال کو بدلنے کے لیے آگے آئیں، جس کا اعتراف پندرہ دسمبر۲۰۰۶ء کو ملک کے وزیر برائے امور اطفال ونسواں نے کیا تھا کہ گزشتہ بیس سالوں کے درمیان ایک کروڑ لڑکیاں اپنے والدین کے ہاتھوں موت کے گھاٹ اتاری جاچکی ہیں۔ ہندوستان کے علماء کو چاہیے کہ وہ سب سے آگے بڑھ کر لڑکی کو پیدائش سے پہلے ہی زندہ درگور کرنے کے ظالمانہ رجحان کے خلاف آہنی دیوار بنیں،وہ جہیز کی غلط رسم کو ختم کرنے کا تہیہ کریں، کیونکہ اس کی کوکھ سے بہت سے خطرناک قسم کے خلاف شرع امور جنم لیتے ہیں۔ ضروری ہے کہ ہم سب سے آگے بڑھ کر آواز بلند کریں کہ عورتوں کو بحیثیت انسان کے سارے حقوق حاصل ہوں، یہ ملحوظ رکھتے ہوئے کہ مرد کا مقام بھی مجروح نہ ہو، مرد بحیثیت قوام شورائیت کے ماحول میں اپنی ہر ذمہ داری ادا کرے، نہ تو کوئی کسی پر بوجھ بنے اور نہ کوئی کسی پر اپنی برتری اور خدائی جتائے۔
تیسری فکر، سماجی سطح پر
ہمارے سماج میں ایک دوسرے سے قربت بڑھے، اور سماج کا شیرازہ مضبوط ہو، اس کے لیے جدوجہد کرنا ہماری ذمہ داری ہے۔ ہمارے تعلقات اپنے عزیزوں رشتے داروں اور پڑوسیوں کے ساتھ نمونہ کی حد تک مضبوط ہوجائیں۔ غیر مسلموں کے ساتھ ہمارے تعلقات کے لیے یہ ارشاد باری سدا ہمارے سامنے رہے، لَا یَنْہَاکُمُ اللَّہُ عَنِ الَّذِیْنَ لَمْ یُقَاتِلُوکُمْ فِیْ الدِّیْنِ وَلَمْ یُخْرِجُوکُم مِّن دِیَارِکُمْ أَن تَبَرُّوہُمْ وَتُقْسِطُوا إِلَیْْہِمْ إِنَّ اللَّہَ یُحِبُّ الْمُقْسِطِیْنَ ۔’’اللہ تمہیں ان لوگوں کے ساتھ حسن سلوک اور انصاف کرنے سے نہیں روکتاجنھوں نے دین کے معاملے میں نہ تم سے جنگ کی اور نہ تم کو تمہارے گھروں سے نکالاہے۔ بے شک اللہ انصاف کرنے والوں کو محبوب رکھتا ہے‘‘۔یاد رہے کہ کائنات کا نظام تین بنیادوں پر چل رہا ہے، ایک دوسرے کو سہارا دینا، ایک دوسرے کو صلہ دینا اور ایک دوسرے کی حفاظت کرنا۔ زمین کو توانائی کی ضرورت ہوتی ہے، اور سورج یہ ضرورت بلا معاوضہ پوری کرتا ہے، اس میں سبق ہے کہ اسی طرح مالدار لوگ محتاجوں کی کفالت کریں، دوسری طرف پودوں اور انسانوں میں سامان زندگی کا تبادلہ ہوتا ہے، انسان کا جسم ان سے آکسیجن لیتا ہے تو بدلے میں انہیں ڈائی آکسائڈ کاربن دیتا ہے، ہمارے درمیان بھی لین دین کی بنا عدل پر ہونی چاہیے۔
یہ بھی تو سوچئے کبھی تنہائی میں ذرا
دنیا سے ہم نے کیا لیا دنیا کو کیادیا
پھر ہم یہ بھی دیکھیں کہ اس کائنات میں تمام زندہ اشیاء ضرر رساں چیزوں کو ایک دوسرے سے دور کرنے کا کام بھی کرتی ہیں، تو ہم پر بھی واجب ہوتا ہے کہ ہم ہر ظالم کا ہاتھ پکڑیں، اور ہر سرکش کا راستہ روکیں۔ إِنَّ اللّہَ یَأْمُرُ بِالْعَدْلِ وَالإِحْسَانِ وَإِیْتَاء ذِیْ الْقُرْبَی وَیَنْہَی عَنِ الْفَحْشَاء وَالْمُنکَرِ وَالْبَغْیِ یَعِظُکُمْ لَعَلَّکُمْ تَذَکَّرُون۔’’بے شک اللہ حکم دیتا ہے عدل کا، احسان کا اور قرابت داروں کو دیتے رہنے کااور روکتا ہے بے حیائی ، برائی اور سرکشی سے، وہ تمہیں نصیحت کرتا ہے تاکہ تم یاددہانی حاصل کرو‘‘۔ تکافل، تبادل اور تدافع۔ ان تینوں بنیادوں کے بنا معاشرے کی عمارت استوار نہیں ہوسکتی ہے۔
چوتھی فکر، وطن اور ریاست کی سطح پر
لازم ہے کہ ملک کی تعمیر میں ہمارا رول سیکولر دھاراؤں اور پارٹیوں سے بھی زیادہ نمایاں ہو، وہ وطن دوستی اور اس کے تقاضوں کی تجارت کرتے ہیں، اور انہیں بازار سیاست میں نیلام کرتے ہیں، ہم اپنی جدوجہد اور اپنی اپروچ سے ایک زندہ ثبوت پیش کریں کہ ہم دین اسلام کے بھی وفادار ہیں، اور جس وطن میں ہم جیتے ہیں، اس کے بھی سب لوگوں سے زیادہ وفادار ہیں، ہم پوری قوت کے ساتھ پنچایت سے لے کر پارلیمانی انتخابات تک اور سرکاری عہدوں اور مناصب کے ہر مقابلے میں پوری قوت اور سنجیدگی کے ساتھ شریک ہوں، اوراس پوری جدوجہد میں ہمارے پیش نظر مسلمانوں سے پہلے ملک کے تمام لوگوں کا فائدہ رہے۔ ہم پانچ اصولوں کو مضبوطی سے تھام لیں اور انہیں اپنا شعار بنالیں: عبادت صرف اللہ کی، خبرگیری سارے انسانوں کی، تعمیر پوری زمین کی، قانون کی بھر پور پابندی اورحکومت کے ساتھ پورا تعاون( ان تمام امور میں جو کتاب وسنت کے خلاف نہ ہوں)۔ علماء کی ذمہ داری ہے کہ فکروشعور اور دعوت وتحریک میں پوری امت کے آگے آگے چلیں، تاکہ امت کی راہ روشن رہے، اسے اکثریتی دھارے میں ضم ہوجانے سے بچایا جاسکے، اور شہادت حق کی عظیم ذمہ داری ادا کرنے کی طرف اسے آگے بڑھایا جائے۔ میں اسے اشد ضروری سمجھتا ہوں کہ مسلمان ایک ٹھوس منصوبہ بنائیں جس کے مطابق جلد وہ دن آئے جب ہندوستانی مسلمانوں میںناخواندگی کے بالکلیہ ختم ہوجانے کا جشن منایا جائے۔ یہ وہ نشانہ ہے جسے حاصل کرنے کے لیے بہت بہت محنت کی ضرورت ہے، اس کے لیے کمربستہ ہو کراٹھ کھڑے ہوں، جب تک تکلیفوں اور مشقتوں سے گزر نہیں ہوگا، علم نہیں آئے گا، اور جب تک علم کی قوت ودولت حاصل نہیں ہوگی دنیا کی امامت نہیں ملے گی، یہ اللہ کا قانون ہے۔ یہ بھی ذہن میں رہے کہ اکیسویں صدی میں اَن پڑھ ہونے کا مطلب صرف یہ نہیں ہوتا کہ آدمی لکھنا پڑھنا نہیں جانتا ہے، بلکہ کمپیوٹر سے ناواقفیت بھی ناخواندگی شمار ہوتی ہے، کمپیوٹر اس دور کی زبان ہے ۔ مکمل طور سے ناخواندگی مٹانے کی اس مہم کو ہماری ترجیحات میں سب سے اول مقام ملنا چاہیے، ہماری اپروچ یہ ہو کہ اللہ نے جس بات سے پہل کی ہے ہم بھی اسی سے پہل کریں گے، اللہ پاک نے پوری وحی کا آغاز اس سے کیا ہے، اقْرَأْ بِاسْمِ رَبِّکَ الَّذِیْ خَلَقَ ۔ خَلَقَ الْإِنسَانَ مِنْ عَلَقٍ۔ اقْرَأْ وَرَبُّکَ الْأَکْرَمُ ۔الَّذِیْ عَلَّمَ بِالْقَلَم۔عَلَّمَ الْإِنسَانَ مَا لَمْ یَعْلَمْ۔اس حقیقت کو حضرت ابن عباس نے یوں بیان کیا کہ اللہ نے علم کو عمل سے پہلے رکھا ہے، امام بخاری نے اسی حقیقت کو ایک باب کا عنوان بنایا ہے۔
پانچویں فکر، امت مسلمہ اور پوری دنیا کی سطح پر
ہم قرآن وسنت کی صراحت کے مطابق ایک امت ہیں، وکونوا عباد اللہ اخوانا ’’اور اللہ کے بندے بن کر بھائی بھائی بن جاؤ‘‘ ۔اسے یقینی بنانا ضروری ہے کہ ہندوستان کے مسلمانوں کا رشتہ پوری دنیا میں پھیلی ہوئی اسلامی امت سے قائم اور مضبوط رہے ، اسلام کی حیثیت مسلمانوں کے درمیان ایک رشتے کی ہے، جس سے سارے مسلمان ایک دوسرے سے جڑے ہوئے ہیں۔ ہم بچپن سے یہ اشعار دوہراتے رہے ہیں:
یا أخي فی الھند أو فی المغرب أنا منک أنت مني أنت بي
لا تسل عن عنصري عن نسبي انہ الاسلام أمي وأبي
’’میرے بھائی ، تم ہندوستان کے ہو یا مراکش کے، میں تم سے ہوں اور تم مجھ سے ہو۔میری نسل اور میرے نسب کے بارے میں مت پوچھو، میں اسلام کا بیٹا ہوں،وہ میری ماں اور میرا باپ ہے‘‘
اچھی طرح سمجھ لیں، کہ امت کے مسائل کا اصل محور جس کے گرد سارے مسائل گھوم رہے ہیں، وہ مسجد اقصی،قدس اور فلسطین کا ایشو ہے، اس ایشو پر جھوٹ کی دھول تہہ در تہہ بٹھائی جارہی ہے، تاکہ حقیقت پروپیگنڈے کے شور میں گم ہوجائے، اس دھول کو ہٹانے کے لیے سوچا سمجھا علمی رویہ اوراپروچ اختیار کرنا لازم ہے، امت کی قوت ادراک سن ہوگئی ہے، اسے بیدار کرنا ضروری ہے، دل کے اندر ایمانی بنیادوں کو تازہ کرتے رہنا بھی ضروری ہے کیونکہ اللہ کی مدد صرف اہل ایمان کے لیے آتی ہے، ہمدردوں اور مددگاروں کو اکٹھا کرنا اور ان کی تعداد بڑھانا بھی مطلوب ہے، ھو الذي أیدک بنصرہ وبالمؤمنین۔ ’’وہی ہے جس نے اپنی نصرت سے اور مومنین کے ذریعے سے تمہاری مدد کی‘‘ میڈیا کی طرف بھی بھرپور توجہ دی جائے، تاکہ ہم ہر اس مسلمان بلکہ ہر اس انسان تک پہنچ جائیں جو حق اور انصاف کی خاطر اٹھنے کے لیے آمادہ ہو، ارض مقدس کی بازیابی کے لیے، جہاں سے ساٹھ لاکھ فلسطینی باشندوں کو ملک بدرکردیا گیا، مسجد اقصی کی حفاظت کے لیے جو قبلہ اول اور حرم ثالث ہے، اس مقصد کے لیے سیاسی محاذوں پر بھی اپنی موجودگی کو بڑھایا جائے، تاکہ اس قضیہ کو بین الاقوامی سطح کے ہر فورم میں اٹھایا جاسکے۔اس سب کے ساتھ جہاد وشہادت کے مقامات بلند پر پہنچنے کے لیے بھی خود کو تیاررکھیں، کیونکہ بیت المقدس کی آزادی کا ایک ہی راستہ ہے، وہی راستہ جسے صلاح الدین ایوبی، سیف الدین قطز اور سلطان العلماء العز بن عبدالسلام نے اختیار کیا تھا۔ میں آپ سے خدا واسطے التجا کرتا ہوں کہ مسجد اقصی اور اس کی آزادی کا ایشو ہر تقریر ہر کانفرنس ہر گفتگو اور ہر محاضرے میں شامل رکھیں۔ ہر مجلہ، ہر اخبار اور ہر چینل پہ اس پر چرچا ہو، تاکہ مسجد اقصی کی آزادی کے متوالوں سے اور ان کی گونج سے ساری دنیا بھرجائے، اس کام کے لیے آگے بڑھنا ایک عظیم شرف ہے، جس کے لیے اللہ اپنے خاص بندوں کا انتخاب فرماتا ہے، پس ہندوستان کے عوام اور ہندوستان کے علماء سب آگے بڑھیں اور بیت المقدس کے بچوں اور عورتوں کی پکار، غزہ اور رام اللہ کے مردوں کی ندا اور قید میں اسیر مسجد اقصی کی صدا پر سب سے آگے بڑھ کر لبیک کہیں۔
چھٹی فکر، علمی اکیڈمیوں اور تحقیقی اداروں کی سطح پر
میری تمنا ہے کہ ہندوستان میں اسلامی فقہ اکیڈمی اور اس جیسے دیگر علمی اور تحقیقی ادارے درج ذیل محاذوں پر خاص توجہ دیں:نمبر ایک: اسکولوں کے بچوں سے لے کر کالجوں اور یونیورسٹیوں کے طلبہ وطالبات تک ہر جگہ اعلی صلاحیت کے دماغوں کو تیار کیا جائے کہ وہ ان اداروں کی صورت میں ان ربانی اور نورانی سلسلوںکے سچے امین بنیں، جن کے آغاز کی توفیق اللہ نے ان کے خوش نصیب بانیوںکوعطا کی۔شاعر کی زبان میں:
اذا سید منا خلا قام سید
قؤول لما قال الکرام فعول
’’ہمارے درمیان سے ایک سردار کی جگہ خالی ہوتی ہے، تو دوسرا سردار آجاتا ہے، عظیم لوگوں جیسی باتیں اور ان کے جیسے کارنامے انجام دینے والا‘‘
آنے والی نئی نسلیں اپنی بزرگ نسلوں کے علم وفضل سے اچھی طرح فیض یاب ہوں، شرعی نصوص کا فہم، زمانے اور حالات سے آگاہی، شرعی نصوص سے اپنے حالات میں رہنمائی لینے والا شعور وتفقہ، خاص احکام کے خاص دلائل اور شریعت کے عام مقاصد واہداف کے درمیان ہم آہنگی کی جستجو، حال کو دیکھنے اور مستقبل کو بھانپ لینے کی صلاحیت، ترجیحات کا شعور اور نفس انسانی سے واقفیت، اور پھر جدید ترین اور تیز ترین وسائل سے آگاہی کہ جن کے ذریعہ زیادہ سے زیادہ لوگوں تک پیغام کی رسائی ہوسکے۔کُنتُمْ خَیْرَ أُمَّۃٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْہَوْنَ عَنِ الْمُنکَرِ وَتُؤْمِنُونَ بِاللّہِ۔’’تم بہترین امت ہو جو لوگوں کے سامنے تیار کی گئی ہے، معروف کا حکم دیتے ہومنکر سے روکتے ہو اور اللہ پر ایمان رکھتے ہو‘‘۔
نمبر دو: اسلامی فقہ، اس کے اصول، اس کے قواعد اور اس کے مقاصد کو ان کے اصل مقام یعنی ایمان واخلاق کی آغوش میں لوٹانا ہے، ایسا لگے کہ گویا یہ سب چھوٹی بڑی کشتیاں ہیں جو اللہ کی محبت، اس کی خشیت، اس کے احکام کی تعظیم، اور اس کے مقام کی تقدیس کی ندیوں دریاؤں اور سمندروں پر رواں دواں ہیں۔مکمل جائزہ لینے کے بعد معلوم ہوتا ہے کہ پورے دین میں کوئی ایک بھی فقہی حکم ایسا نہیں ہے جو ایمان کی گرمی اور اعلی اخلاق کی خوشبو سے خالی رکھا گیا ہو۔ کسی چیز میں اختصاص کا مطلب یہ نہیں ہے کہ اسے باقی سب سے کاٹ کر بالکل الگ تھلگ کردیا جائے، ایک طبیب کسی عضو کا علاج اسے جسم سے بالکل الگ کرکے نہیں کرتا ہے، بلکہ وہ عضو اپنی ساری رگوں کے ساتھ جسم سے جڑا رہتا ہے، بالکل اسی طرح فقہ کا ایمان واخلاق سے رابطہ اور اتصال پوری طرح برقرار رہنا چاہیے۔ اور اسی بنا پر فقہ کے اصول، اس کے قواعد اور اس کے مقاصد کے میدان میں بھی وسعت لانا ضروری ہوجاتا ہے، تاکہ اس علم کے تحت صرف فقہی احکام والی نصوص ہی نہ رہیں بلکہ دین وشریعت کی ساری نصوص اس میں شامل ہوجائیں۔ اصول فقہ کے مناہج ہی ا ن شدید ضربوں سے امت کی حفاظت کرسکتے ہیں، جنہوں نے امت کو ٹکڑوں میں بانٹ رکھا ہے، اور ہمیں ایسا بنادیا ہے کہ ہمارا سارا زور آپس ہی میں ایک دوسرے پر چلتا ہے۔ میں نے جیل کی زندگی میں ہی اس سلسلے میں کچھ علمی کام کرلیے ہیں، میری ایک تازہ کتاب ہے سورہ یوسف کی اصولی اور مقاصدی تفسیر، اور دوسری کتاب ہے حضرت کعب کی حدیث کی اصولی اور مقاصدی تشریح۔
نمبر تین: ضروری ہے کہ فقہ وفکر، اصول ومقاصد اور تحریک ودعوت کے تمام مکاتب ومشارب کے درمیان علمی رابطے کو مضبوط کیا جائے، لِّیَتَفَقَّہُواْ فِیْ الدِّیْنِ وَلِیُنذِرُواْ قَوْمَہُمْ إِذَا رَجَعُواْ إِلَیْْہِمْ لَعَلَّہُمْ یَحْذَرُون ’’تاکہ دین میں بصیرت حاصل کرتے اور اپنی قوم کے لوگوں کو خبردار کرتے ، جبکہ وہ ان کی طرف لوٹتے کہ وہ بھی احتیاط کرنے والے بنتے‘‘ کے مقاصد میں یہ بھی شامل ہے، ہمارے علمی اور تحقیقی ادارے اس بات کے داعی بن جائیں کہ معرفت کے دائرے کو وسیع کیا جائے، اتنا کہ فقہ وفکر کے تمام مسالک اور تحریکی ودعوتی حلقوں سے وابستہ تمام بڑے علماء کی اجتہادی کوششوں کی صحیح قدر ہوسکے۔ شاہ ولی اللہ دہلوی، شیخ ندوی اور شیخ قاسمی کے علمی کارناموں کے ساتھ ساتھ اہل علم وتحقیق کے سامنے علامہ شاطبی، شیخ طاہر بن عاشور، شیخ قرضاوی، شیخ غزالی، شیخ علوانی، شیخ ریسونی، شیخ شنقیطی، شیخ بن باز اور شیخ زرقا کی کوششیں بھی رہیں، اور شیخ افغانی، شیخ محمد عبدہ، شیخ حسن البنا، شیخ سید قطب، شیخ مالک بن نبی، اور شیخ مودودی کی کاوشیں بھی رہیں۔ غرض ہر مکتب فکر اور ہر فکری جہت کے اہل علم کی علمی تحقیقات سے ہم بھر پورطرح سے فیض حاصل کریں۔ اس وقت اسلام کے خلاف شدید قسم کی معرکہ آرائی کے لیے مشرق ومغرب کے سارے طائفے یک جٹ ہوگئے ہیں، ایسے میں اور زیادہ ضروری ہوجاتا ہے کہ ہماری ایک وحدت ہو، اور ہم فکری اور تحریکی ہر دو سطح پر ایک دوسرے سے قریب سے قریب تر ہوجائیں، یہ ایک شرعی فریضہ تو ہے ہی، حالات کا ضروری تقاضا بھی ہوگیا ہے، اس سلسلے میں اللہ کے سامنے سب سے پہلے ان ارباب قیادت کو جواب دینا ہوگا جن کے ہاتھوں میں امت اسلامیہ کی علمی فکری اور تحریکی باگ ڈور ہے۔ وَلاَ تَنَازَعُواْ فَتَفْشَلُواْ وَتَذْہَبَ رِیْحُکُمْ وَاصْبِرُواْ إِنَّ اللّہَ مَعَ الصَّابِرِیْن۔’’اور آپس میں تفرقہ نہ کرو، کہ تم ناکام ہوجاؤ اور تمہاری ہوا اکھڑ جائے اور ثابت قدم رہو۔ بے شک اللہ ثابت قدموں کے ساتھ ہے‘‘۔میرے بہت عزیز اور بہت عظیم علماء کرام، میں معافی چاہوں گااگربات طویل ہوگئی ہو، واقعہ یہ ہے کہ جب شوق کے جذبات امنڈ کر آتے ہیں، تو ہزاروں صفحات کم پڑجاتے ہیں، اور تکلیفیں جتنی بڑھتی ہیں امیدیں بھی اتنی ہی کروٹیں لیتی ہیں۔
جتنی جتنی ستم یار سے کھاتا ہے شکست
دل جواں اور جواں اور جواں ہوتا ہے
میرے اور آپ کے درمیان کئی طویل برسوں سے دوریاں حائل ہیں، لیکن مجھے قوی امید ہے کہ جلد ہی اللہ کے حکم سے ظلم کی زنجیریں ٹوٹیں گی اور زنداں کے دروازے کھلیں گے۔ مجھے یہ بھی امید ہے کہ کسی قریبی سیمینار یا مجلس میں ہماری ملاقات ہوگی،اس وقت میری گفتگو کاایجنڈا وہ دو موضوعات ہوں گے جو مجھے دن رات مشغول اور بے چین رکھتے ہیں۔اول: اصول اور مقاصد کے علم کی تجدید، اور اس کے لیے پہلے تطبیقی کاوشیں اور آخر میں نظریہ سازی کے ذریعہ اس علم کی تکمیل۔دوم: فلسطین،القدس، مسجد اقصی اور سارے قیدیوں کی رہائی، ان مردان کار کے ذریعہ جن کے بارے میں کہا گیا ہے: رِجَالٌ صَدَقُوا مَا عَاہَدُوا اللَّہَ عَلَیْہِ۔’’وہ مرد جنہوں نے اللہ سے کیے ہوئے عہد کو پورا کردکھایا‘‘، شاعر کے الفاظ میں:
قالوا نزال فکنت أول نازل
وعلام أرکبہ اذا لم أنزل
’’انہوں نے پکارا ، اترو میدان میں، تو سب سے پہلے اترنے والا میں تھا، اور اگرمیدان میں اترنے کا جذبہ نہیں ہوتا تو گھوڑے پر سوار ہی کیوں ہوتا‘‘
اللہ سے دعا کرتا ہوں کہ وہ آپ سب کو اپنی امان میں رکھے،اس کی امان میں کوئی چیز ضائع نہیں ہوتی، اور آپ سے التماس کرتا ہوں کہ زمین وآسمان کے رب کے حضور بہترین دعائیں اور پاکیزہ تمنائیں کرتے رہیں، کہ وہ تنگی کے بعد آسانی پیدا کرے، قید وبند کا خاتمہ ہو اور خوشیوں کا دور چلے، امت پر سے کمزوری اورمحکومی کا موسم خزاں رخصت ہو اور شوکت واقتدارکی بہاریں لوٹ آئیں، غاصبوں کے تسلط کی سیاہ رات ہر جگہ سے ختم ہو، اور عزت وسربلندی کی صبح طلوع ہو۔۔ اور ہم سب اللہ کے وعدے کے سزاوار ہوجائیں۔ وَعَدَ اللَّہُ الَّذِیْنَ آمَنُوا مِنکُمْ وَعَمِلُوا الصَّالِحَاتِ لَیَسْتَخْلِفَنَّہُم فِیْ الْأَرْضِ کَمَا اسْتَخْلَفَ الَّذِیْنَ مِن قَبْلِہِمْ وَلَیُمَکِّنَنَّ لَہُمْ دِیْنَہُمُ الَّذِیْ ارْتَضَی لَہُمْ وَلَیُبَدِّلَنَّہُم مِّن بَعْدِ خَوْفِہِمْ أَمْناً یَعْبُدُونَنِیْ لَا یُشْرِکُونَ بِیْ شَیْئاً۔’’اللہ کا وعدہ ہے تم لوگوں سے ، جو ایمان لائے اور جنھوں نے عمل صالح کیے، کہ ان کو ملک میں اقتدار بخشے گا، جیسا کہ ان لوگوں کو اقتدار بخشا جو ان سے پہلے گزرے، اور ان کے لیے ان کے اس دین کو متمکن کردے گا جس کو ان کے لیے پسند کیا‘‘۔ْ وَیَقُولُونَ مَتَی ہُوَ قُلْ عَسَی أَن یَکُونَ قَرِیْبا۔’’اور وہ کہتے ہیں کہ یہ کب ہوگا؟ کہہ دو کہ عجب نہیں کہ اس کا وقت قریب ہی آپہنچا ہو‘‘۔
والسلام
آپ سب سے اللہ کی خاطر محبت کرنے والا
صلاح الدین سلطان

خطبے کی زبان اور زمانے کی پکار

خطبے کی زبان اور زمانے کی پکار
بغیر سمجھے کتنے ہزار سال تک سنا جائے گا جمعہ کا خطبہ؟
محی الدین غازی
تعلیم کے حوالے سے مسلمانوں کے سامنے سب سے بڑا مسئلہ یہ ہے کہ نئی نسل کو رائج الوقت تعلیم دلانے کے ساتھ ساتھ دینی تعلیم وتربیت کی ضرورت کو کیسے پورا کیا جائے۔ اسکولوں اور کالجوں میں تعلیم حاصل کرتے ہوئے ذہنوں میں پھیل جانے والے زہر کا تریاق انہیں کیسے دیا جائے۔ اگر عصری اداروں میں صرف دین بیزار مادیت کی تعلیم دی جارہی ہے تو اپنے نونہالوں کی روح اور قلب کو زندہ وتازہ رکھنے والی اور دین سے محبت پیدا کرنے والی تعلیم کا انتظام کیسے کیا جائے، اگر مسلمان طلبہ اور طالبات کے ذہنوں میں اسلام سے متعلق نت نئے سوالات اور شکوک وشبہات پیدا ہورہے ہیں، تو ان کی تشخیص اور ان کا ازالہ کس طرح ہو۔
دینی مدارس اس صورت حال کا علاج نہیں ہیں، ملک بھر کے مسلمان طلبہ وطالبات کے لئے جزوقتی دینی تعلیم کے مدارس کا انتظام بے حد مشکل ہے۔ حافظ جی اور مولوی صاحب کی ٹیوشن لگا کر قرآن مجید کا ناظرہ سکھادینا اپنی جگہ مفید ہے، مگر وہ اس زہر کا توڑ نہیں ہے جو جدید تعلیم کے راستے طلبہ اور طالبات کی رگ رگ میں سرایت کررہا ہے۔
ایسے میں صرف ایک انتظام سامنے رہ جاتا ہے، جو دینی تعلیم وتربیت کا خدائی انتظام ہے، خطبہ جمعہ کا منفرد اور زبردست انتظام۔ اس انتظام کا انفرا اسٹرکچر پورے ملک کے ہر ہر شہر اور ہر ہر قریہ میں موجود ہے، صرف اسے فعال بنانے کی دیر ہے۔ ایسا انتظام دنیا کے کسی گروہ کے پاس نہیں ہے، یہ انتظام امت کے اندر زندگی کی روح پھونک دینے کی طاقت رکھتا ہے۔ ایسے زبردست انتظام کی طرف سے امت غافل ہے، اور اس کی یہ غفلت نہایت افسوس ناک ہے۔ اصلاحی تحریکوں اور دینی جماعتوں نے بھی اس انتظام سے بے نیاز ہوکر ابلاغ وتبلیغ کے مصنوعی ذرائع اختیار کئے، جہاں لوگوں کو جمع کرنے میں توانائی زیادہ صرف ہوتی ہے، اور نتیجہ کم سامنے آتا ہے۔
ہمارے ملک میں بہت بڑا مسئلہ یہ ہے کہ خطبہ جمعہ عربی زبان میں دیا جاتا ہے، اور سننے والے عربی سے یکسر ناواقف ہوتے ہیں۔ ہندوستان کے اکثر علماء اور ائمہ مساجد کا اصرار ہے کہ خطبہ جمعہ کی زبان عربی ہی ہونی چاہئے خواہ سننے والوں کی زبان کچھ بھی ہو، ان کا کہنا ہے کہ جس طرح نماز کے لئے عربی زبان ضروری ہے اسی طرح خطبے کے لئے بھی عربی زبان ضروری ہے۔
لیکن غور سے دیکھا جائے تو زبان کے معاملے میں خطبہ کو نماز پر قیاس کرنا درست معلوم نہیں ہوتا ہے، کیونکہ جس طرح نماز کے متعین اذکار ہیں، خطبہ جمعہ کے متعین اذکار نہیں ہیں، نماز میں کوئی مقام ایسا نہیں ہے جب آپ نماز کے اذکار کے علاوہ اپنے خیالات بھی عربی میں بیان کرسکتے ہوں، جب کہ خطبے میں تو خطیب عربی زبان میں قصے بھی سنا سکتا ہے، اشعار بھی پڑھ سکتا ہے، اور اپنی زندگی کے تجربات اور اپنے دل کے احساسات بھی بیان کرسکتا ہے۔ بحث صرف اتنی رہ جاتی ہے کہ وہ اپنے دماغ میں تیار کی ہوئی جو باتیں عربی میں بیان کرسکتا ہے، وہ سامعین کو سمجھ میں آنے والی زبان میں بیان کرسکتا ہے یا نہیں؟
نماز اور خطبے میں ایک اہم فرق یہ بھی ہے کہ نماز میں مخاطب صرف اور صرف اللہ ہوتا ہے، جو اظہار بندگی بھی دیکھتا ہے اور احساس بندگی بھی جانتا ہے۔ جب کہ خطبے میں مخاطب سامعین ہوتے ہیں، وہ اگر کچھ نہ سمجھیں تو خطبہ کا مقصد ہی فوت ہوکر رہ جاتا ہے۔ خطبے میں تو اتنی گنجائش رکھی گئی ہے کہ وہ حالت وضو کے بنا بھی دیا جاسکتا ہے، خطبہ کے دوران ضرورت پڑنے پر بات بھی کی جاسکتی ہے، پھر خطبے کی زبان کو لے کر آخر اتنی سختی کہاں سے آگئی ہے، کہ خطبہ لوگوں کی طرف رخ کرکے اور انہیں مخاطب کر کے تو دیا جائے مگر ان کے سمجھنے کی بالکل پرواہ نہ کی جائے۔
اگر خطبہ عربی میں ہونا ضروری ہے، تو پھر یہ بھی ضروری ہونا چاہئے کہ سارے سامعین کو عربی زبان آئے، اسے یقینی بنانے کے لئے منصوبے بننے چاہئیں اور اسے فرض قرار دینے والے فتوے جاری ہونے چاہئیں، لیکن یہ کہ سینکڑوں اور ہزاروں سال تک کروڑہا کروڑ لوگ بغیر سمجھے خطبہ سنتے رہیں، اور خطبہ کے مشمولات سے ان کے دل ودماغ بالکل ناآشنا اور محروم رہیں، یہ بات خدائے حکیم کی حکمت سے لبریز شریعت سے مطابقت نہیں رکھتی ہے۔
غرض یا تو سامعین خطیب کی زبان سیکھیں، یا خطیب سامعین کی زبان میں بات کرے، ’’زبان یار من ترکی ومن ترکی نمی دانم‘‘ کا سلسلہ آخر کب تک چلتا رہے گا، کوئی تو حد طے ہونی چاہئے۔ مجھے ذاتی طور پر اس مسئلے کی نزاکت کا اندازہ گذشتہ دو سال سے زیادہ ہورہا ہے، اب تک یا تو عربی میں خطبے سنے تھے یا اردو میں، میرے لئے یہ سبھی خطبے قابل فہم ہوا کرتے تھے، اور میں ان لوگوں کے درد کو نہیں محسوس کرپاتا تھا جو عربی میں خطبہ نہیں سمجھ سکتے تھے، گذشتہ دو سال سے ملیالم کے خطبے سن رہا ہوں، اور اچھی طرح محسوس کررہا ہوں کہ خطبے کا ایک بھی لفظ سمجھے بغیر خطبہ سننا کتنی بڑی آزمائش کا کام ہے۔ البتہ یہاں تسلی یہ رہتی ہے کہ میں نہیں تو باقی لوگ تو مستفید ہورہے ہیں۔
تیزی سے بگڑتے حالات اور مسلسل کم ہوتے مواقع پکار پکار کر کہہ رہے ہیں کہ جمعہ کے خطبے کی زبان سے متعلق فیصلہ کرنے کا صحیح وقت آج ہی ہے، اس وقت شدید ضرورت بھی ہے اور ضرورت کی تکمیل کا موقع بھی حاصل ہے۔ تمام تر خرابیوں کے باوجود آج کی نئی نسل جمعہ کا خطبہ سننے اہتمام کے ساتھ آرہی ہے، یہ بہت زبردست موقعہ ہے، یہ موقعہ ہمیشہ باقی رہے اس کی کوئی ضمانت نہیں ہے۔ جدید تعلیم اور جدید رجحانوں کے راستے سے بگاڑ کا جو سیلاب بڑھتا چلا آ رہا ہے، وہ جمعہ کے خطبے کے اس انتظام کو باقی رہنے دے یہ کوئی ضروری نہیں ہے۔
آج جمعہ کی مسجدوں کو بھردینے والے جمعہ کے نمازی اگر خدانخواستہ کل نہیں آئے، اور جمعہ کی نماز میں بھی فجر کی نماز والا حال ہوگیا تو پھر کیا ہوگا۔ جمعہ کے انتظام کو مفید اور موثر بنانے سے بہت ممکن ہے کہ فجر کی نماز میں بھی نماز جمعہ والی کیفیت پیدا ہوجائے۔
اس تحریر کا مقصد جمعہ کے خطبے کی زبان کو لے کر کوئی فقہی بحث چھیڑنا نہیں ہے، یہ فقہی بحث میں الجھنے اور الجھانے کا وقت بھی نہیں ہے، یہ تو فقہی بحث سے نکل کر امت کی حفاظت کے سلسلے میں فیصلے لینے کا وقت ہے، سنجیدگی سے سوچنا چاہئے کہ نئی نسل کی دینی تعلیم وتربیت کے اس عظیم خدائی انتظام سے فائدہ نہیں اٹھانے کا آخر کیا جواز ہے۔
اگر عام حالات میں اس کی تھوڑی سی بھی گنجائش نکل سکتی ہے کہ غیر عربی زبان میں خطبہ دیا جائے، تو موجودہ سنگین حالات میں جب کہ پوری نسل بے دینی کے خطرے سے دوچار ہے، دین وملت کی حفاظت جیسے عظیم اور بڑے مقصد کی خاطر سننے والوں کو سمجھ میں آنے والی زبان میں خطبہ دینا جائز ہی نہیں ضروری قرار دینا چاہئے۔
یہ بھی یاد رہے کہ جمعہ کے خطبوں کی زبان بدل دینا مسئلہ کا مکمل حل نہیں ہے، یہ تو محض پہلی رکاوٹ کو دور کرنا ہے، ورنہ عرب ممالک میں تو لوگوں کی مادری زبان میں خطبے ہوتے ہیں، مگر ان عربوں کی دینی صورت حال ہم ہندوستانیوں سے مختلف نہیں ہے۔ مقامی زبان میں خطبہ دینے کا فیصلہ کرنے کے بعد خطبہ کو نئی نسل کی تعلیمی وتربیتی ضرورت پورا کرنے والا بنانا اصل مقصد ہے۔ افسوس کی بات یہ بھی ہے کہ وہ بہت ساری مسجدیں جہاں مقامی زبان میں خطبہ ہوتا ہے، اس مقصد کو حاصل کرنے میں زیادہ کامیاب نہیں ہیں۔
دینی علوم اور جدید علوم کے ماہرین کو مل کر اس پر کام کرنا ہے کہ نئی نسل کی دینی تعلیم وتربیت کی حقیقی ضرورت کو پورا کرنے کے لئے خطبات جمعہ کے مشتملات کیا ہونے چاہئیں، اس سلسلے میں ایک پورے کورس کی تیاری درکار ہے، جو حسب ضرورت کئی سالوں پر مشتمل ہوسکتا ہے۔
دینی مدارس کے کرنے کا کام یہ ہے کہ وہ اپنے فارغین کو اس لائق بنائیں کہ وہ نئی نسل کے افراد کی دینی ضرورتوں کو سمجھیں، ان کے سوالوں کا تشفی بخش جواب دے سکیں، اور انہیں دل پر نقش ہونے والی اور دماغ میں اچھی طرح سمجھ میں آنے والی تعلیم دے سکیں۔ یہ مطلوب نہیں ہے کہ دینی مدارس سے سماجی علوم اور حیاتیاتی علوم کے ماہرین نکلیں، لیکن نصاب کی ایسی جدید کاری ضرور مطلوب ہے کہ دینی مدارس کے فارغین جدید زمانے میں دین کی صحیح اور طاقت ور ترجمانی کرسکیں، وہ خطبہ جمعہ کے ذریعہ سامعین کے ذہنوں سے شکوک وشبہات سے صاف کرسکیں اور انہیں ایمان ویقین سے آراستہ کرسکیں۔
دینی جماعتوں کے کرنے کا کام یہ ہے کہ وہ سب مل کر اس کے لئے کوشش کریں کہ ملک بھر میں جمعہ کے خطبات کو دین کی تعلیم کے لئے بہتر طور سے استعمال کیا جائے، جمعہ کا منبر آپسی رسہ کشی اور دھینگا مشتی کے لئے استعمال نہیں ہو، سب مل کر جمعہ کے منبر سے وہ دینی تعلیم فراہم کریں جس پر سب کا اتفاق ہے، اور جس کی نئی نسل کو فوری اور شدید ضرورت ہے (ویسے بھی اب سبھی جماعتیں اپنی پرانی تقریروں کو چھوڑ کر ایک جیسی تقریریں کرنے لگی ہیں)۔ یہ کام اتنا اہم اور ضروری ہے کہ اس کے لئے جماعتوں کی متحدہ مجلس عمل کو وجود میں آنا چاہئے۔
لیکن سب سے پہلے ہمارے مفتیان کرام کو یہ فیصلہ کرنا ہوگا کہ جمعہ کا خطبہ سامعین کی زبان میں دیا جانا چاہئے۔ اطمینان قلب کے لئے خطبے کا کچھ حصہ عربی اذکار پر بھی مشتمل ہوسکتا ہے۔
اس عظیم منصوبے کے نتیجے میں دینی مدارس کی افادیت کا ایک نیا باب کھل سکے گا، دینی مدارس کے تربیت یافتہ فارغین ایک ایک مسجد میں اپنی تعلیمی صلاحیتوں کے جوہر دکھائیں گے اور پوری امت کو فیض پہونچائیں گے۔ اس وقت بہت بڑا سوال دینی مدارس کے فارغین کی افادیت کا بھی کھڑا ہوا ہے۔
جمعہ کے خطبات کی زبان، اہداف اور انداز کے سلسلے میں انقلابی تبدیلیاں لانے سے چند سالوں میں پوری نسل کو دینی تعلیم کے زیور سے آراستہ کیا جاسکے گا، اس کے بعد ہماری آنے والی نسلیں اطمینان کے ساتھ عصری اداروں میں جدید تعلیم کے نقصان سے محفوظ رہتے ہوئے زیادہ سے زیادہ تعلیم حاصل کرسکیں گی۔
یہ یاد دلانا بہت ضروری ہے کہ اسکولوں اور کالجوں میں مسلم لڑکے ہی نہیں مسلم لڑکیاں بھی پڑھتی ہیں، جن خطروں سے لڑکے دوچار ہیں ان کا لڑکیوں کو بھی سامنا ہے، جمعہ کے خطبوں کا انتظام جس قدر مسلمان لڑکوں کے لئے ضروری ہے، اسی قدر مسلمان لڑکیوں کے لئے بھی ضروری ہے۔ دین وایمان کو بچانے والے اور سیرت وکردار کی بہترین تعمیر کرنے والے جمعہ کے خطبوں میں مسلمان لڑکیوں کی شرکت کا بھی انتظام ضرور کیا جائے، اور ان کی شرکت کو ضروری قرار دیا جائے۔ جن مفاسد کے اندیشے سے عورتوں کو مسجد میں آنے سے روکا گیا تھا، ان سے ہزار گنا بڑے مفاسد سے بچانے کے لئے جمعہ کے خطبوں میں خواتین کی شرکت کو مطلوب قرار دیا جائے۔ بے حد ضروری ہوگیا ہے کہ ہمارے فتوی گھروں سے جاری ہونے والے فتوے امت کے حال کو بہتر اور مستقبل کو روشن بنانے میں اہم کردار ادا کریں۔
بلاشبہ اس طرح کے فیصلے جذبات میں آکر نہیں لئے جاتے ہیں، ان کے علمی اور تحقیقی تقاضوں کو پورا کرنا ضروری ہوتا ہے، اس طرح کے فیصلے اجتماعی اجتہاد کا تقاضا کرتے ہیں، ضروری ہے کہ وقت کی نزاکت کو محسوس کرتے ہوئے اہل علم اس مسئلے پر علمی وفقہی سیمینار کریں، اہل تحقیق واجتہاد اس پر گہری تحقیق کریں، اور علمی دلائل کی روشنی میں ایسی قرارداد تک پہونچیں جس میں دین وملت کی بہتری اور بھلائی نظر آتی ہو، دین وشریعت کے مقاصد کی تکمیل ہوتی ہو۔
بلاشبہ لوگ آسانی سے اصلاح حال کے اس منصوبے کو قبول کرنے کے لئے تیار نہیں ہوں گے، پھر بھی نا امید ہونے کی ضرورت نہیں ہے، کیوں کہ حاجت وضرورت کے تقاضوں کے تحت اگر ہمارے علماء کرام کار اور کاروبار کے انشورنس کی اجازت دے دیتے ہیں، اور لوگ اس اجازت پر عمل بھی کرلیتے ہیں، تو ہمارے علماء بہت بڑی ضرورت کے تقاضے کو محسوس کرکے سامعین کی زبان میں جمعہ کا خطبہ دینے کی اجازت بھی مرحمت فرما سکتے ہیں۔ ان کی اس نوازش پر قیامت تک آنے والی تمام نسلیں ان کی احسان مند رہیں گی۔
پورے یقین کے ساتھ کہا جاسکتا ہے کہ جمعہ کے خطبے کی زبان بدلنے سے امت کی تقدیر بدلنے کی راہ ہموار ہوسکتی ہے۔ بلاشبہ عربی زبان میں خطبے سے جمعہ کا فرض ادا ہوجائے گا، لیکن مقامی زبان میں خطبے سے اس فرض کے ساتھ ساتھ امت کی صحیح تعلیم وتربیت اور دین وایمان کی حفاظت کا بہت بڑا اور بے حد مشکل فرض بھی ادا ہوسکے گا۔ اور یہ فرض پوری ملت کو آخری پکار آخری پکار کہہ کر آواز دے رہا ہے۔

تقوی اور احسان، رشتوں کی دو مضبوط بنیادیں

تقوی اور احسان، رشتوں کی دو مضبوط بنیادیں

محی الدین غازی

شادی سے رشتے داری وجود میں آتی ہے۔ رشتے قائم کرنا، رشتے نباہنا، اور رشتہ نہیں نباہ پانے کی صورت میں ختم کردینا، یہ سب زندگی کے بہت نازک مرحلے ہوتے ہیں۔ اگر زندگی گزارنے کے لئے مضبوط بنیادیں میسر نہیں ہوں تو زبان پھسل جانے، قدم بہک جانے، بات بگڑ جانے، زندگیاں برباد ہوجانے، اور سب سے بری بات یہ کہ پستی میں گرجانے کا ہر وقت اندیشہ لگا رہتا ہے۔

ازدواجی زندگی گزارنے کے لئے قرآن مجید ماننے والوں کو دو بنیادیں عطا کرتا ہے۔ یہ چٹان سے زیادہ مضبوط بنیادیں ہیں، ان پر ازدواجی زندگی کی بنا اعتماد کے ساتھ رکھی جاسکتی ہے، اور رشتوں کی عمارت کو اطمینان کے ساتھ بہت بلندی تک اٹھایا جاسکتا ہے۔ ایک بنیاد تقوی ہے اور دوسری بنیاد احسان ہے، یہ دونوں بنیادیں خوشگوار زندگی کے استحکام کی ضمانت لیتی ہیں۔ جس نے ان دونوں بنیادوں کو اپنی شخصیت کے لئے حاصل کرلیا، اسے تاحیات خوش رہنے اور خوشیاں بانٹنے کا حق حاصل ہوجاتا ہے۔

تقوی کا مطلب ہے، زندگی میں ہر کام کو انجام دیتے ہوئے اللہ کی ناراضگی سے بچنے کی فکر کرتے رہنا، اور احسان کا مطلب ہے زندگی کے ہر کام کو اللہ کی مرضی کے شایان شان بہتر سے بہتر طریقے سے انجام دیتے رہنا۔ گویا زندگی عیب سے پاک ہوتی رہے تو تقوی ہے، اور زندگی خوبیوں سے مالا مال ہوتی رہے تو احسان ہے۔ تقوی زندگی کے پودے کو مرجھانے سے بچاتا ہے، اور احسان سے زندگی کے درخت میں پھول اور پھل آتے ہیں۔

بعض لوگ سمجھتے ہیں کہ تقوی اور دین داری سے ازدواجی زندگی کی رنگینی اور اس کا رس جاتا رہتا ہے، زندگی خشک اور بے رنگ یا کم از کم سادہ رنگ اور بے لطف ہوجاتی ہے، زندگی کے رومان اور تقوی کی بندشوں میں کوئی یارانہ نہیں بلکہ پرانی دشمنی ہے۔ دریہ سارے تصورات بالکل غلط ہیں۔ تقوی تو محبت اور رومان کی حفاظت کرتا ہے، تقوی سے زندگی کے حسین رنگوں کی صحیح دیکھ بھال ہوتی ہے، بلکہ یوں کہیں کہ احسان سے زندگی بے حد حسین اور بے حد خوش گوار ہوجاتی ہے، اور تقوی سے اس حسن اور اس خوش گواری کی سدا حفاظت ہوتی ہے۔

تقوی دل دکھانے سے روکتا ہے، احسان دل کو مسرور کردینے پر ابھارتا ہے۔ تقوی رشتوں کی بے حرمتی کرنے سے روکتا ہے، احسان رشتوں کو لازوال بنانے کی فکر دیتا ہے۔ تقوی بد زبانی سے باز رکھتا ہے، احسان زبان کو شیرینی اور حلاوت کا سرچشمہ بنادیتا ہے۔ تقوی ہو تو رشتوں کو کوئی روگ نہیں لگتا، احسان ہو تو رشتے بہت صحت مند اور توانا ہوجاتے ہیں۔

شادی کی تقریب تقوی اور احسان کے سائے میں انجام پائے تو تقریب کی حقیقی خوشیاں حاصل ہوتی ہیں۔ تقوی دل کو لالچ سے پاک کرتا ہے، جہیز کی طلب، ہو یا دوسرے ناجائز مطالبات، تقوی ان تمام برائیوں سے بچالیتا ہے جو لالچ کے پیٹ سے جنم لیتی ہیں۔ احسان دل میں سخاوت اور فیاضی جگاتا ہے، اور وہ ساری خوبیاں پیدا کرتا ہے جو سخاوت اور فیاضی کے بطن سے جنم لیتی ہیں۔ بیوی کے گھر والوں سے کچھ نہ لے کر بیوی کے لئے اپنے گھر میں حسب استطاعت شایان شان رہنے سہنے کا انتظام کرنا احسان کا ایک حسین مظہر ہے۔ بہترین ازدواجی زندگی وہ ہوتی ہے جس میں خود غرضی کے بجائے جاں نثاری ہو۔ تقوی خود غرض نہیں بننے دیتا ہے، اور احسان سب کچھ نثار کرنے کے لئے تیار رکھتا ہے۔

تقوی ہر تقریب میں غیر اسلامی رسوم ورواج سے روکتا ہے، اور احسان ہر تقریب کو اللہ کے رنگ میں رنگتے ہوئے عبادت کا حسن عطا کردیا ہے۔ جہاں تقوی اور احسان کی کارفرمائی ہو وہاں تقریبات عبادت کی طرح پاکیزہ ہوتی ہیں، اور جہاں تقوی اور احسان نہ ہوں وہاں عبادتیں غیر اسلامی رسومات سے آلودہ ہوجاتی ہیں۔

تقوی نمائش پسندی، اسراف اور فضول خرچی سے روکتا ہے، اور احسان غریب رشتے داروں اور ضرورت مند پڑوسیوں پر چپکے چپکے خرچ کرنے کا ظرف اور جذبہ عطا کرتا ہے۔

تقوی اور احسان دونوں اگر شوہر اور بیوی میں جمع ہوجائیں تو اللہ کی رحمت دونوں پر سایہ فگن ہوجاتی ہے، شوہر اور بیوی دونوں ایک دوسرے کی آنکھوں کی ٹھنڈک بن جاتے ہیں، دونوں ایک دوسرے پر سب کچھ لٹانے، ایک دوسرے کے لئے ہر تکلیف اور مشقت برداشت کرلینے اور ایک دوسرے سے کچھ نہیں مانگنے میں مقابلہ کرتے ہیں۔ دوسرے کے لطف کے لئے خود تکلیف برداشت کرلینا اور دوسرے کی تکلیف کا خیال کرکے اپنے لطف کو پس پشت ڈال دینا دونوں کا شیوہ ہوتا ہے۔ مفاد پرست سماج میں پرورش پانے والے خود غرض جوڑے ایثار وقربانی کے اس مقام کا تصور بھی نہیں کرسکتے جس مقام پر تقوی اور احسان شوہر اور بیوی کو پہونچادیتے ہیں۔

بیوی کے دل میں تقوی ہو اور شوہر سماج کی کسی بے سہارا خاتون سے نکاح کرنا چاہے تو بیوی اس کی راہ میں رکاوٹ نہیں بنتی ہے اور نہ ہی اس کے لئے مسائل کھڑے کرتی ہے۔ بیوی کے دل میں احسان کا جذبہ موجزن ہو تو بیوی خود پیش قدمی کرتی ہے کہ سماج میں زوجیت کے سائے بان سے محروم خاتون کو اپنے سائے بان میں شریک کرلے، یہ بہت بھاری کام ہے لیکن احسان کا جذبہ اسے آسان بنادیتا ہے، اور اسی لئے احسان کا جذبہ رکھنے والے اللہ کو بہت پسند ہیں، کیونکہ وہ ایسے کام کرتے ہیں، جنہیں دیکھ کر زمین اور آسمان بھی حیران رہ جاتے ہیں۔۔

تقوی شوہر کو دو بیویوں کے درمیان ظلم وناانصافی کرنے سے روکتا ہے، اور احسان شوہر کو دونوں بیویوں کی آنکھوں کی ٹھنڈک اور دل کا سکون بنادیتا ہے۔

تقوی سوکنوں کو ایک دوسرے سے بغض وعداوت رکھنے اور ایک دوسرے کے خلاف سازشیں کرنے سے روکتا ہے، احسان سوکنوں کو ایک دوسرے کا خیر خواہ اور ہمدرد بنادیتا ہے۔

تقوی سوتیلے بچوں کے ساتھ زیادتی کرنے سے روکتا ہے، اور احسان سوتیلے بچوں پر سگے بچوں سے زیادہ مہربان ہوجانے والا بنادیتا ہے۔

تقوی ساس بہو اور نند بھاوج جیسے سارے ہی رشتہ داروں کو آپس میں لڑنے جھگڑنے اور نفرت بانٹنے سے روکتا ہے، احسان رشتے داروں کو ایک دوسرے کا غم خوار اور ایک دوسرے پر جان چھڑکنے والا بنادیتا ہے۔ تقوی ان رخنوں کو بند کرتا ہے جہاں سے نفرت اور دشمنی کا گندا پانی گھر کے آنگن میں آنے لگتا ہے، اور احسان گھر کے آنگن میں محبت کی حیات افروز نہریں جاری کرتا ہے اور ایثار وہمدردی کے زندگی بخش پودے لگاتا ہے۔

قرآن مجید ازدواجی زندگی کی عمارت تقوی اور احسان کی بنیادوں پر اٹھانے کی تعلیم دیتا ہے، پھر اگر اس مضبوط رشتے کو ختم کرنا ہی قرین مصلحت ہو تو ختم کرنے کے لئے بھی تقوی اور احسان کا راستہ اختیار کرنے کی تاکید کرتا ہے۔  تقوی اور احسان کے سائے میں جو تفریق اور جدائی عمل میں آتی ہے، وہ بھی اپنے آپ میں حسین وجمیل ہوتی ہے، اس میں کسی کے ساتھ حق تلفی اور زیادتی نہیں ہوتی، کوئی خود غرضی اور تنگ دلی کا مظاہرہ نہیں کرتا ہے، بلکہ اس وقت بھی سخاوت وشرافت کا دور دورہ ہوتا ہے۔ حقیقت یہ ہے کہ جو اسلام کے مطابق ازدواجی زندگی نہیں گزارتا ہے، وہ اسلامی طریقے سے طلاق دینے کے قابل بھی نہیں رہتا ہے۔

تقوی بلا وجہ طلاق دینے سے روکتا ہے، احسان وجہ ہونے پر بھی جہاں تک ہوسکے ساتھ نباہنے کے لئے آمادہ کرتا ہے۔ تقوی روکتا ہے کہ طلاق کے بعد بیوی کو دی ہوئی چیزیں واپس نہ لی جائیں، احسان ابھارتا ہے کہ طلاق شدہ بیوی کو اپنی استطاعت سے بھی بہت آگے بڑھ کر نوازشوں کی بارش کے ساتھ رخصت کیا جائے۔ تقوی کی کیفیت ہو تو اس پر جھگڑا نہیں ہوتا کہ بچہ کس کے پاس رہے، اور اس کا خرچ کون اٹھائے، احسان کی کیفیت ہوتی ہے تو دونوں فکرمند ہوتے ہیں کہ طلاق کے باوجود بچے کی بہترین نشوونما کا انتظام کیسے کیا جائے۔

تقوی اور احسان سے فیملی لائف اس قدر خوش حال، خوش گوار، خوش مزاج اور خوش لطف ہوجاتی ہے کہ جیسے اللہ دنیا ہی میں جنت والی زندگی کے تجربے سے گزار رہا ہو۔ تقوی اور احسان سے زندگی کی عمارت کی کرسی بہت بلند ہوجاتی ہے، اور عمارت حد درجہ حسین ہوجاتی ہے۔ بے شک خوش نصیب ہے وہ جسے تقوی اور احسان والی ازدواجی زندگی گزارنے کی توفیق مل جائے۔ اور بے شک ملامت کے لائق نہیں ہوتا ہے وہ جو ضروری ہوجانے پر تقوی اور احسان کے سائے میں رشتہ ختم کرے۔

’’اور اگر کسی عورت کو لگے کہ اس کا شوہر اس سے منھ موڑ رہا ہے، یا ازدواجی زندگی کو خطرے میں ڈال رہا ہے، تو بہت اچھا ہوگا کہ دونوں صلح کا راستہ اختیار کریں، صلح سراپا خیر ہے، دیکھو خود غرضی طبیعتوں میں رچی بسی ہوئی ہے، اس سے لا پرواہ مت ہوجاؤ، اور اگر تم احسان اور تقوی کی روش اختیار کرو گے تو یہ بہت بہتر ہوگا، تم جو کچھ کرتے ہو اللہ اس سے باخبر ہے۔‘‘ (سورۃ نساء 128)

قرآن کی تلاوت کریں، قرآن کا پیغام سنیں

قرآن کی تلاوت کریں، قرآن کا پیغام سنیں
محی الدین غازی
قرآن مجید کی تلاوت بہت مبارک اور نہایت مفید عمل ہے۔ بگڑتی اور خراب ہوتی اس دنیا کو سنبھالنے اور بہتر بنانے کا ایک ہی طریقہ ہے اور وہ قرآن مجید کی تلاوت ہے۔ اپنے آپ کو بنانے اور سنوارنے کا بھی ایک ہی راستہ ہے اور وہ بھی قرآن مجید کی تلاوت ہے۔ تلاوت اپنے آپ میں نیکی کا کام ہے، اور تلاوت سے نیکیوں کے سب راستے بھی روشن ہوتے جاتے ہیں۔ جس عظیم کلام کی تلاوت کرتے ہوئے انسانوں کی زندگی میں نیکیوں کی بہار آجائے، اس کے ایک ایک حرف کے بدلے دس دس نیکیوں کا ثواب مل جانا تعجب کی بات نہیں ہے۔
قرآن مجید کی تلاوت سے انسان کو حقیقی علم حاصل ہوتا ہے۔ تلاوت کرتے ہوئے معلوم ہوتا رہتا ہے کہ اللہ اپنے بندوں سے کب کیا چاہتا ہے۔ اتنی اہم بات تلاوت کے بغیر معلوم ہی نہیں ہوسکتی۔ اس زندگی میں ایک بندے کے لئے سب سے اہم دریافت یہ ہے کہ اسے اپنے رب کی پسند اور ناپسند یقینی طور سے معلوم ہوجائے۔ یہ دریافت عظیم ترین کامیابی کی شاہ کلید ہے۔
قرآن مجید کی تلاوت کا اثر زندگی پر نظر آنا چاہئے، اتنا واضح اثر کہ ہر کوئی اسے محسوس کرلے۔ اگر تلاوت کا کوئی اثر زندگی پر نظر نہیں آتا تو سمجھ لو کہ تلاوت کے عمل میں کوئی بڑی کمی رہ گئی ہے، یا تو سمجھے بغیر محض قرآن خوانی ہورہی ہے، یا پھر دماغ سمجھ رہا ہے مگر دل اثر نہیں لے رہا ہے۔ تلاوت کے عمل میں زبان اور دماغ کے ساتھ ساتھ دل کی شرکت نہایت ضروری ہے۔
ضروری ہے کہ تلاوت کرنے والے کی زندگی تلاوت کے ساتھ ساتھ ہر لحظہ بہتر ہوتی جائے، دیکھنے اور سوچنے کا انداز بدلے، لوگوں کے ساتھ پیش آنے کا طریقہ بدلے، چاہتیں اور نفرتیں بدلیں، فکرمندیاں اور اندیشے بدلیں۔ غرض تلاوت کے ذریعہ شخصیت کے ہر پہلو کی اصلاح ہوتی رہے، اور زندگی خوب سے خوب تر ہوتی جائے۔ جس تلاوت سے زندگی میں کوئی بڑی تبدیلی نہ ہو سکے وہ تلاوت خود اصلاح طلب ہے۔
قرآن مجید کی تلاوت کرنا حقیقت میں بلندیوں کا سفر طے کرنا ہے، وہ بلندیاں جو صرف تلاوت کرنے والے کے حصے میں آسکتی ہیں۔ جو شخص دنیا میں قرآن مجید کی تلاوت کا حق ادا کرے گا، قیامت کے دن اس سے کہا جائے گا: جس طرح تم دنیا میں تلاوت کرتے تھے، اب یہاں بھی تلاوت کرتے ہوئے جنت کی بلندیوں کو سر کرتے جاؤ، جس بلندی پر تمہاری تلاوت کا سلسلہ رکے گا وہی بلندی تمہارا مقام قرار پائے گی۔ دانائی کا تقاضا ہے کہ یہاں زندگی کی آخری سانس تک تلاوت کا سلسلہ جاری رہے، تاکہ وہاں جنت میں اونچے سے اونچا مقام حاصل ہوسکے۔
تلاوت کرتے ہوئے انسان سوچے کہ قرآن مجید کی رو سے اس کی پہچان کیا بننی چاہئے۔ اگر تلاوت کرنے والے کو قرآن مجید میں سب سے زیادہ زور ایمان اور عمل صالح پر نظر آئے، تو یہی خوبی اس کی پہچان بن جائے۔ وہ سارے انسانوں میں سب سے زیادہ مضبوط ایمان والا، اور سارے انسانوں میں سب سے زیادہ اچھے کام کرنے والا ہوجائے۔ اس کے ایمان کی مضبوطی پر پہاڑ تعجب کریں، اور اس کے کردار کی بلندی پر ستارے رشک کریں۔
تلاوت کرتے ہوئے انسان غور سے دیکھے کہ قرآن مجید میں کن کاموں کا حکم بار بار دیا گیا ہے، تلاوت کے نتیجے میں وہ سارے کام زندگی میں بھی اسی کثرت سے نظر آنے لگیں، جس کثرت سے قرآن مجید کی آیتوں میں نظر آتے ہیں۔ بار بار قرآن مجید ختم کرنے والے ایک بار اس طرح بھی ختم کرکے دیکھیں۔
قرآن مجید کی ایسی تلاوت مطلوب نہیں ہے جس میں زبان تلاوت سے تر ہوتی رہے اور باقی پورے وجود میں سوکھا پڑا رہے۔ قرآن مجید زندگی بخش کلام ہے، اس کی تلاوت بھی زندگی سے بھرپور ہونی چاہئے۔ تلاوت ایسی ہو کہ زبان قرآن مجید کی تلاوت کرے اور دل ودماغ کان لگا کر پوری توجہ سے قرآن مجید کا پیغام سنیں۔ تلاوت اس طرح ہو کہ تلاوت کرنے والوں کے دل ودماغ کا تزکیہ کرتے ہوئے قرآن مجید کا پیغام دوسرے انسانوں تک پہونچنے لگے۔ قرآن مجید میں اسی طرح تلاوت کرنے کو کہا گیا ہے۔ اللہ کے رسول صلی اللہ علیہ وسلم اسی طرح قرآن مجید کی تلاوت کیا کرتے تھے۔ قرآن مجید کی تلاوت کرنا دراصل قرآن مجید کا پیغام خود کو اور پھر سارے انسانوں کو سنانا ہے۔ اگر ایسا نہیں ہورہا ہو، تو سمجھ لو کہ قرآن مجید کی تلاوت اس طرح نہیں ہورہی ہے جس طرح ہونی چاہئے۔
روز بروز بڑھتی اور سر چڑھتی ہوئی مادی ضرورتوں نے شہر کی سڑکوں ہی کو مصروف نہیں کیا ہے، فرد کے اندرون کو بھی بری طرح بھیڑ بھاڑ کا شکار بنادیا ہے۔ نہ دل میں ایمان ویقین کے لئے جگہ چھوڑی ہے، اور نہ زندگی میں اچھے کاموں کے لئے کوئی فرصت رکھی ہے۔ اگر دل یقین سے خالی ہوجائیں، اور زندگی اچھے کاموں سے عاری ہوجائے تو پھر انسان کے پاس کتے کی طرح ہانپتے رہنے کے سوا کیا رہ جاتا ہے۔ ذلت اور تکلیف کی اس کیفیت کا مداوا صرف قرآن مجید میں ہے۔ قرآن مجید ہی میں وہ قوت اور تاثیر ہے جو دل کو ایمان ویقین سے روشن کردے اور زندگی کو اچھے کاموں سے آراستہ کردے۔
قرآن مجید کی تلاوت اس طرح کریں کہ تلاوت کا حق بھی ادا ہو، اور زندگی میں تلاوت کی برکتیں بھی ظاہر ہوں۔ اس کے لئے تلاوت کے ساتھ ساتھ ترجمہ پڑھنے میں کوئی مضائقہ نہیں ہے، لیکن سمجھے بغیر تلاوت کرنے میں مضائقہ ضرور ہے۔

خلع خالص بیوی کا حق ہے

خلع خالص بیوی کا حق ہے
(خلع کے نظام کی اصلاح پر ایک تحریر)

محی الدین غازی

میرے ایک بزرگ دوست کافی عرصے سے بہت پریشان ہیں، ان کی بیٹی اپنے شوہر کی بعض عادتوں سے بیزار ہے، اور کسی طور ساتھ رہنا نہیں چاہتی، شوہر نہ تو اپنی اصلاح کے لئے تیار ہے، نہ طلاق دے رہا ہے اور نہ خلع کے لئے آمادہ ہے، دار القضا کے اہل کاروں کا کہنا ہے کہ ہم اس کے مجاز نہیں ہیں کہ مذکورہ اسباب کی بنا پر نکاح فسخ کر سکیں۔

یہ صرف ایک کیس نہیں ہے، میرے علم میں مختلف شہروں کے ایسے کئی کیس ہیں، لڑکیاں کئی کئی سال سے میکے میں ہیں، اور شوہر انہیں علیحدگی کا پروانہ دینے کو تیار نہیں ہیں، وہ چونکہ نکاح کے بندھن میں بندھی ہوتی ہیں، اس لئے کہیں اور شادی کے بارے میں بھی نہیں سوچ سکتی ہیں۔ اس صورت حال میں تشویش کا ایک پہلو تو ان خواتین کی حالت زار ہے، ان کی اس تکلیف دہ حالت پر خاموشی کسی طور مناسب نہیں ہے۔ تشویش کا دوسرا بہت خطرناک پہلو یہ ہے کہ کہیں یہ مسئلہ آگے چل کر شریعت کو نشانہ بنانے کا ایک اور بہانہ نہ بن جائے۔

اسلامی شریعت رحمت والی شریعت ہے، اس میں کوئی ایسا حکم نہیں ہے جس سے زندگی عذاب بن جائے، اگر ایسا کہیں نظر آتا ہے، تو اس میں کہیں نہ کہیں ہمارے عمل کی کوتاہی یا اجتہاد کی غلطی ضرور کارفرما ہے، ایسے میں ہمیں اصلاح حال کے لئے فکرمند ہونا چاہئے، اس کا انتظار ہرگز نہیں کرنا چاہئے کہ جب بات حکومت اور عدالت کی سطح پر پہونچے، اور مسئلہ شدید بحران کی شکل اختیار کرلے تو ہم اس بحران سے نکلنے کا راستہ تلاش کریں۔

یہ بحث کبھی بھی زور پکڑ سکتی ہے کہ جب نکاح دو طرفہ معاہدہ ہے جو دونوں کی رضامندی سے وجود میں آیا ہے، تو اس معاہدہ کو توڑنے کا اختیار صرف مرد کے پاس کیوں ہے، یا تو یہ معاہدہ دونوں کی رضامندی سے ٹوٹے، یا پھر دونوں میں سے ہر کسی کو اسے توڑنے کا اختیار رہے، یہ کیسا انصاف ہے کہ مرد تو کسی بھی وجہ سے جب چاہے طلاق دے دے، اور عورت خلع کا حق بھی مرد کی مرضی کے بغیر استعمال نہیں کرسکے؟ اگر یہ بحث نہ بھی چھڑے تو بھی ظلم سے چشم پوشی کرنا کسی مسلمان کے لئے جائز نہیں ہے۔

واضح ہو  کہ قانون کی غلط تشریح یا اس کا غلط استعمال ظلم کو جنم دیتا ہے، ظلم کی ایک صورت تو یہ ہے کہ مرد معقول وجہ کے بغیر غلط ارادے سے طلاق دے دے، اور ظلم کی دوسری صورت یہ ہے کہ عورت کے نہ چاہتے ہوئے بھی زبردستی اسے اپنی بیوی بناکر رکھے، یعنی خلع کے مطالبے کو پورا نہ کرے۔ افسوس ہمارے سماج میں دونوں طرح کے ظلم کی مثالیں پائی جاتی ہیں۔ کثرت وقلت کا فیصلہ تو صحیح سروے کے بعد ہی ہوسکتا ہے۔

اسلامی لٹریچر میں خلع کو عورت کا حق بتایا جاتا ہے، اور کہا جاتا ہے کہ جس طرح مرد کے پاس طلاق کا راستہ ہے، اسی طرح عورت کے پاس خلع کا راستہ ہے، لیکن واقعہ یہ ہے کہ طلاق کا راستہ تو مرد کے مکمل کنٹرول میں ہوتا ہے، لیکن خلع کا راستہ بھی عملا مرد ہی کے کنٹرول میں رہتا ہے، کیونکہ جمہور علماء کی رائے یہ ہے کہ عورت خلع کا راستہ اسی وقت اختیار کرسکتی ہے، جب کہ مرد اس کے لئے راضی ہو، اور اگر مرد راضی نہ ہو تو عورت کے لئے یہ راستہ بند ہوجاتا ہے۔

اس سلسلے میں اصلاح کے دو راستے ہیں اور دونوں پر توجہ دینا بہت ضروری ہے۔

ایک راستہ یہ ہے کہ لوگوں کی اخلاقی سطح بلند کی جائے، اور انہیں یہ بتایا جائے کہ عورت اگر خلع کا مطالبہ کرے تو مرد کو نہ دینی لحاظ سے یہ زیب دیتا ہے اور نہ اخلاقی لحاظ سے کہ وہ اس مطالبے کے باوجود اسے اپنی بیوی بنائے رکھنے پر اصرار کرے۔ ایسی صورت میں اسے چاہئے کہ پہلے اپنی اصلاح پر توجہ دے، ساتھ ہی بیوی کو سمجھائے اور منائے، لیکن اگر وہ ساتھ رہنے پر کسی طرح آمادہ نہ ہو تو جلد از جلد اس کے مطالبہ خلع کو پورا کردے۔ یہ اتباع سنت کا بھی تقاضا ہے اور مردانہ عزت ووقار کا بھی۔

یاد رکھئے، جب عورت خلع کا مطالبہ کردے، تو ٹال مٹول سے نقصان (Damage) میں اضافہ ہی ہوتا ہے، بات بڑھتی ہے، دونوں گھروں کی رسوائی اور جگ ہنسائی ہوتی ہے، باہمی نفرت میں اضافہ ہوتا ہے، اور آئندہ ملاپ کے امکانات کم ہوتے جاتے ہیں۔ اور اگر خلع کے مطالبے کو مرد جلدی پورا کردے تو بات زیادہ نہیں بگڑتی ہے، اور اس کا بھی بہت امکان رہتا ہے کہ آئندہ دونوں نئے سرے سے نکاح پر آمادہ ہوجائیں۔ کیوں کہ خلع کا صحیح طریقہ یہ ہے کہ شوہر بیوی کے مطالبہ پر ایک طلاق دے۔ اس طلاق کے بعد رجوع کا موقع تو نہیں رہتا ہے، تاہم دونوں کی رضامندی سے نیا نکاح کبھی بھی ہوسکتا ہے۔

اصلاح حال کا دوسرا راستہ یہ ہے کہ خود خلع کے نظام کو بہتر بنایا جائے، اور مرد کے لئے قانونی طور سے یہ لازمی قرار دیا جائے کہ اگر عورت سمجھانے بجھانے کے باوجود ساتھ رہنے پر آمادہ نہیں ہوتی ہے، تو مرد لازمی طور سے خلع کے مطالبے کو قبول کرے، اور اگر وہ ایسا نہیں کرتا ہے تو قاضی یا اس کے قائم مقام شرعی نظام ورنہ تو پھر محلہ اور گاؤں کے لوگ خلع کو دونوں پر نافذ کردیں۔ شوہر کو اس کا مہر واپس دلادیں اور بیوی کو اس سے آزاد قرار دے دیں۔

اصلاح کی یہ کوشش ہمیں اپنی فقہی تاریخ میں کہیں کہیں نظر آتی ہے۔ جمہور کی رائے تو یہی تھی کہ خلع کے مطالبے کو قبول کرنا شوہر کے لئے ضروری نہیں ہے، تاہم علامہ ابن تیمیہ (ت ۷۲۸ھ) نے اس مسئلے پر اپنے تردد کو درج کیا، چنانچہ علامہ ابن تیمیہ کی طرف دونوں رائیں منسوب کی گئیں، اور اس کے بعد سے حنبلی فقہ میں دونوں رایوں کا تذکرہ ہونے لگا،  مشہور حنبلی فقیہ علامہ محمد بن مفلح المقدسی (ت ۷۶۳ھ) لکھتے ہیں کہ شام کے کچھ فاضل مقدسی قاضیوں نے خلع کو لازم کیا۔ وَأَلْزَمَ بِهِ بَعْضُ حُكَّامِ الشَّامِ الْمَقَادِسَةُ الْفُضَلَاءُ۔ (الفروع)۔ غیر سنی فقہ میں اس کا تذکرہ ہمیں پانچویں صدی کے لٹریچر میں بھی ملتا ہے، ملاحظہ ہو ابوجعفر طوسی کی کتاب النھایۃ۔

سعودی عرب میں چونکہ حنبلی مسلک رائج ہے، اس لئے وہاں اس سلسلے میں بہت نمایاں پیش رفت ہوئی۔ وہاں کے پہلے مفتی شیخ محمد بن ابراھیم بن عبداللطیف آل الشیخ (ت ۱۳۸۹ھ) بعد ازاں مشہور زمانہ عالم ومفتی شیخ بن باز، اور شیخ ابن عثیمین اور پھر دوسرے اہل علم نے اس موقف کو بہت قوت کے ساتھ پیش کیا، ان اہل علم نے سنت رسول سے بھی استدلال کیا، اور عورت کے مطالبہ خلع کو نظرانداز کرنے کے بہت سے اضرار ومفاسد کا حوالہ بھی دیا۔ ان لوگوں نے اس پر بھی زور دیا کہ خلع کی کارروائی جلد مکمل کرلی جائے، اس کے لئے مہینوں اور برسوں عورت کو معلق نہیں رکھا جائے۔

خلع کے سلسلے میں مولانا مودودی بھی لکھتے ہیں: اگر عدالت میں معاملہ جائے، تو عدالت صرف اس امر کی تحقیق کرے گی کہ آیا فی الواقع یہ عورت اس مرد سے اس حد تک متنفر ہوچکی ہے کہ اس کے ساتھ اس کا نباہ نہیں ہوسکتا۔ اس کی تحقیق ہوجانے پر عدالت کو اختیار ہے کہ حالات کے لحاظ سے جو فدیہ چاہے تجویز کرے، اور اس فدیے کو قبول کرکے شوہر کو اسے طلاق دینا ہوگا۔ (تفہیم القرآن)

اس عبارت میں ایک اور نکتہ بہت اہم ہے، وہ یہ کہ عورت کس قدر متنفر ہے، اس کی تحقیق ہونی چاہئے، آیا اس قدر تنفر کے ساتھ اسے شوہر کے ساتھ رہنا چاہئے؟ اصل اہمیت اسی پہلو کی ہے۔ ممکن ہے تنفر کی وجہ بہت معمولی اور غیر اہم لگتی ہو، یہ بھی ہوسکتا ہے کہ شوہر کی طرف سے کوئی کوتاہی یا بدسلوکی نہ ہو، لیکن اگر تنفر ناقابل برداشت ہو تو اس تنفر کا لحاظ کیا جائے گا۔ خلع کے ایک واقعہ میں کہا جاتا ہے کہ حضرت عمر نے اسی طرح کی تحقیق کی، اور تنفر کی شدت دیکھ کر خلع کا حکم صادر کردیا۔ اب اگر عورت میکے میں جا کر بیٹھ گئی ہے، اور کسی طور واپسی کے لئے تیار نہیں ہے، بلکہ علیحدگی کی خاطر مہر بھی لوٹانے کو تیار ہے، تو سمجھنا چاہئے کہ تنفر ناقابل برداشت حد تک پہونچ چکا ہے۔ اور اگر لڑکی کے ولی اور اہل خانہ بھی خلع کے مطالبہ کی تائید کریں تب تو یہ مطالبہ بہت زیادہ مضبوط ہوجاتا ہے، اور اسے نظر انداز کرنے کی کوئی وجہ نہیں رہ جاتی ہے، کیونکہ یہ ایک عورت کے بجائے ایک خاندان کا مطالبہ ہوجاتا ہے۔

واضح رہنا چاہئے کہ عہد رسالت اور عہد خلافت میں ہمیں ایسا کوئی واقعہ نہیں ملتا ہے جس میں بیوی نے خلع مانگا ہو، اور اس کے باوجود اسے شوہر کے ساتھ رہنے پر مجبور ہونا پڑا ہو۔ خلع کے سلسلے میں مذکور واقعات میں اس پر تو گفتگو ملتی ہے کہ شوہر خلع کے عوض بیوی سے کس کس چیز کو واپس مانگے، لیکن خود بیوی کو زبردستی ساتھ رکھنے کی کوئی مثال نہیں ملتی ہے۔ خلع خالص بیوی کا حق ہے، جس طرح طلاق خالص شوہر کا حق ہے، بیوی کو اس حق سے محروم کرنا ہرگز درست نہیں ہے۔

عہد رسالت میں خلع کے واقعہ یا واقعات سے یہ بات بھی سامنے آتی ہے کہ خلع کا عمل ایک بہت ہی آسان اور رواں (Smooth and Easy) عمل ہونا چاہئے، اسے پیچیدہ اور دشوار بنانا روح شریعت کے خلاف ہے، اس عمل کو طول دینا اور دنیا وآخرت کی وعیدیں سنا کر بیوی کو شوہر کے ساتھ رہنے کے لئے مجبور کرنا کسی طرح مناسب نہیں ہے۔ یہ دین کے مزاج اور اس کی عظمت کے خلاف ہے کہ تنفر اور بیزاری کے باوجود دین کا حوالہ دے کر دونوں کو ساتھ رہنے پر مجبور کیا جائے۔ ہمیں یقین ہونا چاہئے کہ اگر دونوں میں نیک نیتی اور خدا ترسی کے ساتھ علیحدگی ہوتی ہے، تو اللہ دونوں کے لئے خیر کی نئی راہیں پیدا کردے گا۔ {وَإِنْ يَتَفَرَّقَا يُغْنِ اللَّهُ كُلًّا مِنْ سَعَتِهِ وَكَانَ اللَّهُ وَاسِعًا حَكِيمًا} [النساء: 130]

تحریک کا ستون کون بنے

تحریک کا ستون کون بنے
ترجمہ: محی الدین غازی
(تحریکوں میں اس پر گفتگو زیادہ ہوتی ہے کہ امارت کا اہل کون ہے، لیکن ایسے افراد کی ضرورت پر گفتگو کم ہوتی ہے جو تحریک کا ستون بننے کی ذمہ داری قبول کریں۔ عظیم تحریکی مفکر محمد احمد راشد کا ایک تحریک افروز پیغام پیش ہے)
اسلامی تحریک پر گہری نگاہ ڈالنے سے احساس ہوتا ہے کہ ایک تحریکی کارکن ہونے کی حیثیت سے ہمیں شدید ضرورت ہے ایک محبت سے لبریز آغوش کی جو ہمیں سمالے، ایک کشادہ سینے کی جو ہماری پریشانیوں کو سمیٹ لے، ایک سوز مند دل کی جو ہماری فکر میں تڑپ اٹھے، ایک شفقت بھرے ہاتھ کی جو ہمارے کاندھوں کو تھپکی دیتا رہے، ایک نگہبان آنکھ کی جو ہماری چال پر نظر رکھے، ایک اعلی دماغ کی جو ہماری سمت سفر درست کرتا رہے۔
ہمیں ضرورت ہے اس کی کہ جب ہم غلطی کریں تو ہم سے روبرو ہو کر مسکرادے، ہم ناکامی سے دوچار ہوں تو دوبارہ کوشش کرنے پر اکسادے، اور ہم پھسلنے لگیں تو ہمارا ہاتھ تھام لے۔
ضرورت ہے اس کی کہ جب ہم مشکل میں پڑیں تو وہ آسانیاں سجھائے، ہم مایوسی کے شکار ہوں تو منزل کی نوید سنائے، ہم پریشان ہوجائیں تو تسلی دے اور ہم جلدبازی کرنے لگیں تو صبر کا درس دے۔
ضرورت ہے اس کی جو غور سے سننے کا ہنر جانتا ہو، اس کی نہیں جسے انکار کردینے کی جلدی رہتی ہو۔ اس کی جو تعریف کرنے کا ہنر جانتا ہو، اس کی نہیں جسے تنقید کرنے کی جلدی رہتی ہو۔ اس کی جو نظر انداز کرنے کا ہنر جانتا ہو، اس کی نہیں جسے ملامت کرنے کی جلدی رہتی ہو۔
ضرورت ہے اس کی جو پیار سے سمجھائے، نرمی سے سکھائے، محبت سے اکسائے، جس کی دعوت حکیمانہ ہو، اور جس کی تربیت مشفقانہ ہو۔
ضرورت ہے اس کی جو ہمارے دلوں کو نصب العین پر جمع کردے، اور ہماری کوششوں کا رخ مقصد کی طرف مرکوز کردے۔
ضرورت ہے اس کی جو خود غرضی سے اوپر اٹھ جائے، اور جسے اپنی تعریف سننے کا شوق نہ ہو۔
ضرورت ہے اس کی جو ہماری صلاحیتوں کو پہچانے، توجہ دے کر انہیں پروان چڑھائے، اس کی نہیں جو انہیں کچل دے اور دفن کردے۔
ضرورت ہے اس کی جو ہماری توانائیوں سے واقف ہوسکے، انہیں متحرک کردے، اور انہیں صحیح جگہ لگائے۔ اس کی نہیں جو انہیں زنگ آلود کردے اور انہیں بجھادے۔
ضرورت ہے اس کی جو ہمارے امکانات پر بھروسہ کرے، اور ہماری قوتوں پر اطمینان رکھے، اور ہمیں یہ احساس دلائے کہ ہم کچھ کردکھانے کی طاقت رکھتے ہیں۔
ضرورت ہے اس کی جو ہمیں کمر بستہ کرے ، ہمارے حوصلے بلند کرے، اور ہماری کمزوری کو قوت میں بدل دے۔
ضرورت ہے اس کی کہ جب ہمیں ٹھوکر لگے تو ہمارا راستہ ہموار کردے، سامنے اندھیرا چھا جائے تو روشنی کردے، اور حیرانی سے دوچار ہوں تو ہمیں ہماری منزل دکھادے۔
ضرورت ہے اس کی کہ جب ہم رک جائیں تو ہمیں آگے بڑھائے، جمود کا شکار ہوجائیں تو تحریک پیدا کرے، بزدلی دکھائیں تو بہادری کا جام پلائے، اور بیٹھ جائیں تو ہاتھ پکڑ کے کھڑا کردے۔
ضرورت ہے اس کی کہ جب ہم سوجائیں تو بیدار کردے، بھول جائیں تو یاد دلادے، غفلت کا شکار ہوجائیں تو خبردار کردے۔
ضرورت ہے اس کی کہ جب ہم آگے بڑھنے میں دیر کریں تو وہ سب سے آگے بڑھ جائے، جب ہم خیر کے کاموں میں پیچھے ہٹنے لگیں تو وہ پیش قدمی کرے، اور جب ہم سستی کا شکار ہونے لگیں تو وہ اپنی رفتار تیز کردے۔
ضرورت ہے اس کی جو اپنے علم سے ہمیں سیراب کرے، اپنی خیرخواہی سے ہمیں نوازتا رہے، اور اپنے تجربات سے ہمیں مالا مال کرے۔
ضرورت ہے اس کی کہ جو ہماری پیش قدمیوں سے خوش ہو، ہماری فتوحات سے مسرور ہو، اور ہماری ترقیوں پر کھل اٹھے۔
ضرورت ہے ہمیں اس کی جس کی فکر میں تازہ ہوا کے جھونکے آتے رہیں، جس کے کاموں سے جدت وتخلیقیت نمایاں ہو، اور جس کی وسیع نگاہ تحریک کے ہر پہلو پر محیط ہو، وہ تحریک کے کسی پہلو کو کسی پہلو سے دبنے نہ دے، ہر پہلو کو بھرپور توجہ اور قرار واقعی مقام دے۔
چند لفظوں میں کہنا ہو تو کہوں:
 ہمیں ایک ستون کی ضرورت ہے، ایک پناہ گاہ کی ضرورت ہے، ایک سائے بان کی ضرورت ہے، ایک شفقت سے لبریز آغوش کی ضرورت ہے۔
اگر ایسا ہے، اور واقعی ایسا ہے تو میرے بھائی تم آگے بڑھ جاؤ، دیر مت کرو، تمہارے آس پاس سب منتظر ہیں، آغاز اپنی ذات سے کرو اور وہ آغوش جس کی سب آس لگائے بیٹھے ہیں وہ تم بن جاؤ۔

’سبحان ربی العظیم‘‘ کی انقلاب آفرینی

’سبحان ربی العظیم‘‘ کی انقلاب آفرینی
محی الدین غازی
(تسبیح کا مطلب ہے اللہ کی پاکی اور اس کی عظمت بیان کرنا۔ تسبیح کرتے ہوئے صرف چند الفاظ زبان سے ادا نہیں ہوتے ہیں، بلکہ دل ودماغ میں ایک زبردست قسم کا انقلاب آتا ہے، اور ایک مثالی شخصیت تیار ہوتی ہے، تسبیح والی شخصیت۔ اللہ اور اس کے رسول نے تسبیح کے لئے بہت سے بلیغ اور معنی خیز جملے سکھائے ہیں، سبحان ربی العظیم بھی تسبیح کی بہت خوب صورت تعبیر ہے، اسے اس تحریر میں تسبیح کی ایک مثال کے طور پر ذکر کیا گیا ہے)
سبحان ربی العظیم کہہ کر ہم اپنےایمان ویقین کا اظہار کرتے ہیں، کہ اللہ کی ذات پاک ہے اور عظیم ہے، اللہ نے جو دین ہمارے لئے پسند کیا ہے، جو کتاب ہماری ہدایت کے لئے بھیجی ہے، اور جس رسول کو ہمارے لئے نمونہ بناکر بھیجا ہے، وہ سب کچھ پاک اور عظیم ہے۔ جو شخص اپنی پوری زندگی اللہ کے رنگ میں رنگنے کا فیصلہ کرچکا ہو، اس کے لئے ایمان ویقین کا یہ احساس بہت اطمینان بخش ہوتا ہے ۔
سبحان ربی العظیم بے پناہ خوشی اور تشکر کا اظہار ہے، خوشی اس بات کی کہ ہم نے اپنے پاک اور عظیم رب کو پالیا ہے، اور اس سے بندگی کا حسین رشتہ جوڑ لیا ہے۔ اس دنیا میں بہت سے انسان پاک وصاف اور باعزت بندگی سے محروم ہیں، وہ ایسی چیزوں اور ایسے لوگوں کے سامنے جھکتے ہیں، جن کے سامنے جھک کر وہ سربلند نہیں ہوتے بلکہ ذلیل ورسوا ہوجاتے ہیں۔ عزت وسربلندی تو پاک اور عظیم رب کا بندہ بن جانے پر ملتی ہے، گمراہیوں کے ہجوم میں انسان کو پاک اور عظیم رب کی پہچان ہوجائے یہ اس کی سب سے بڑی خوش نصیبی اور کامیابی ہے۔ اس پر وہ اپنے رب کا جس قدر شکر ادا کرے اور اس کی جتنی زیادہ تسبیح کرے کم ہے۔
سبحان ربی العظیم ایک زبردست عہد ہے، کہ ہم اپنے پاک اور عظیم رب کے سلسلے میں کوئی ایسا خیال دل میں بسنے نہیں دیں گے جو اس کی پاکی اور عظمت کے منافی ہو، اور کوئی ایسا عقیدہ اختیار نہیں کریں گے، جس سے اس کی پاکی اور عظمت پر آنچ آتی ہو۔ تسبیح ایک زبردست کسوٹی ہے جس پر بہت سے خیالات اور نظریات کو پرکھا جاسکتا ہے۔ جب انسان تسبیح کی اس حقیقت سے غافل ہوجاتا ہے، تو وہ اللہ کے سلسلے میں غلط خیالات کو دل میں جگہ دے دیتا ہے، حالانکہ اس کے ہاتھ میں تسبیح کے دانے اور اس کی زبان پر تسبیح کے الفاظ ہوتے ہیں۔
سبحان ربی العظیم کہہ کر ہم یہ اظہار بھی کرتے ہیں کہ پاکی اور عظمت کی ہمارے دل میں بڑی قدرومنزلت ہے، یہ صفات ہمارے لئے بہت اہم صفات ہیں، اسی لئے ہم ہر آن خاص طور سے اللہ کی پاکی اور اس کی عظمت کا چرچا کرتے ہیں۔ ہم پاکی اور عظمت کو اللہ کی طرف منسوب کرکے اطمینان محسوس کرتے ہیں کہ گویا ہمیں اللہ کے شایان شان بات کہنے کی توفیق مل گئی۔ پاکی اور عظمت کو اہم سمجھنا بہت خاص بات ہے۔ بہت فرق ہوتا ہے اس شخص کے فکروعمل میں جو پاکی اورعظمت کی قدر جانتا ہو، اور اس شخص کے فکروعمل میں جو اسے نہیں جانتا ہو۔ زندگی کا نقشہ بناتے ہوئے یہ بات بڑی اہمیت رکھتی ہے کہ آپ کے نزدیک کن چیزوں کی قدروقیمت بہت زیادہ ہے۔
سبحان ربی العظیم کہنے سے انسان کے اندر اپنےاحتساب کی ایک زبردست تحریک اٹھتی ہے، تسبیح کے الفاظ پکار پکار کر کہتے ہیں کہ اے پاک اور عظیم رب کی تسبیح بیان کرنے والے ذرا اپنا جائزہ لے، کیا پاک اور عظیم رب کو ’’میرا رب‘‘ کہنے والے کے لئے زیبا ہے کہ وہ پاکی اور بلندی کے بہت اونچے مقام پرپہونچنے کی کوشش نہیں کرے؟ وہ اونچے سے اونچا مقام جہاں ایک انسان کو پہونچنا چاہئے۔ یہ کیا ماجرا ہے کہ تم اس پر توخوش ہو کہ تمہیں پاک اور عظیم رب مل گیا، لیکن اس کے لئے بے چین نہیں ہوتے کہ تم پاک اور عظیم رب کے پاک اور عظیم بندے بن جاؤ۔ اگر تم بھی ناپاکی اور ذلت وپستی سے اسی طرح مانوس ہو گئے ہو جس طرح جھوٹے معبودوں کی پرستش کرنے والے ہیں، اور اگر پاک اور عظیم رب سے نسبت کا تمہاری زندگی پر کوئی اثر نہیں ہورہا ہے، تو یہ بڑی بدنصیبی کی بات ہے۔
سبحان ربی العظیم کے اندر تزکیہ نفس کا بڑا سامان ہے، جب ایک بندہ دل کی گہرائی سے بار بار یہ کہتا ہے کہ میرا رب پاک ہے، اور میرا رب عظیم ہے، تو تسبیح کے ہر جملے کے ساتھ اسے اپنے اندرون کو پاک کرنے اور بلندیوں کا سفر کرنے کے لئے تحریک اورمدد ملتی ہے۔ قرآن مجید کی بہت سی آیتیں یہ حقیقت سمجھاتی ہیں۔
سبحان ربی العظیم کہہ کر انسان کو بڑا حوصلہ ملتا ہے کہ دنیا میں گندگی اور پستی کو کتنا ہی زیادہ رواج مل چکا ہو، اور نجاست کتنی ہی زیادہ طاقت کے ساتھ انسانوں پر مسلط ہوچکی ہو، لیکن پاکی اور عظمت کا سفر شروع کرنے کے سارے مواقع ابھی بھی نہ صرف یہ کہ موجود ہیں، بلکہ انسان سے بہت قریب بھی ہیں۔ جب پا ک اور عظیم رب سے قربت اور اس کی تسبیح کی توفیق حاصل ہوگئی تو گویا پاکی کا سرچشمہ ہاتھ آگیا اور عظمت کی بلندیوں تک لے جانے والی شاہراہ مل گئی۔ جب انسان گندگی کے دلدل میں پھنسا ہو تو وہاں سے نکلنے کے لئے حوصلے کی بڑی ضرورت ہوتی ہے۔
سبحان ربی العظیم کہنے والے کی زندگی کو ہر پہلو سے پاکیزہ ہونا چاہئے، اس کا عقیدہ بالکل پاک وصاف ہو، اس کے خیالات میں بلا کی پاکیزگی ہو، اس کا کردار بے داغ ہو، وہ ہر وقت اپنے دامن کی حفاظت کرے، اور اگر کوئی داغ لگ جائے تو ندامت وتوبہ کے آنسووں سے فورا دھو ڈالے۔ شرم گاہ کی حفاظت کرے اور نگاہ نیچی رکھے۔ جس زبان سے سبحان ربی العظیم ادا ہورہا ہے وہ زبان ہر گندگی سے پاک رہے۔ اورجس دل میں سبحان ربی العظیم کے نغمے بسائے جارہے ہوں، اس دل کی پاکی اور طہارت کا خیال رکھا جائے۔
سبحان ربی العظیم، کہہ کر انسان بلندی اور عظمت کے سفر کا آغاز کرے، اور سبحان ربی العظیم کہتے ہوئے اس سفر کو جاری رکھے، خیالات کی بلندی، عزائم اور حوصلوں کی بلندی، زندگی کے مقصد کی بلندی، زندگی کی دوڑ بھاگ اور محنت ومشقت کے اہداف کی بلندی، زندگی کی عمارت کی کرسی کی بلندی، کمانے میں بھی بلندی اور خرچ کرنے میں بھی بلندی، غرض زندگی کے ہر پہلو میں بلندی کی طرف جانے کا شوق نظر آئے۔
غرض تسبیح کا عمل اللہ کے حضور اپنی بندگی کے جذبات کا اظہار بھی ہے، اور اپنی شخصیت کی تعمیر کا وعدہ بھی ہے۔
اللہ کی قدرت وعظمت کے احساس سے دل جھکنے لگے، زندگی ہر عیب سے پاک ہونے لگے، اور قدم بلندیوں کی طرف بڑھنے لگیں، تو سمجھو کہ رکوع میں سبحان ربی العظیم، اور سجدے میں سبحان ربی الاعلی کہنے کا حق ادا ہورہا ہے۔ اور نماز عشق واقعی ادا ہورہی ہے۔