ڈیڑھ چال کے گھوڑے

ڈیڑھ چال کے گھوڑے
محی الین غازی
 شطرنج کی بساط پر گھوڑے کی اہمیت پیادوں سے زیادہ سمجھی جاتی ہے، پیادے ایک خانے کی چال چلتے ہیں، جبکہ گھوڑا ڈھائی خانے کی چال چل سکتا ہے، اور سامنے کوئی آجائے تو اس کے اوپر سے چھلانگ بھی لگاسکتا ہے۔ ایک دن بیٹھے بیٹھے خیال آیا کہ اگر شطرنج کی کسی بساط پر گھوڑا ڈھائی خانے کی چال کی بجائے ڈیڑھ خانے کی چال چلنے لگے تو کیا ہوگا؟ جواب ملا کہ صرف اتنا ہوگا کہ گھوڑا بھی پیادہ جیسا قرار پائے گا۔
میرا خیال ہے کہ مسلم عوام قیادت کے سلسلے میں قدرے حقیقت پسند ہیں، وہ اپنی قیادت پر بہت زیادہ اونچی توقعات کا بوجھ نہیں ڈالتے، وہ ان کو مہدی اور مجدد کے روپ میں بھی نہیں دیکھتے، وہ تو جب چاہتے ہیں تو صرف یہ چاہتے ہیں کہ قائدین ان کی طرح کوتاہ بین نہیں ہوں، بلکہ ان سے کچھ زیادہ دور تک دیکھیں، ان کی طرح سست رفتار نہیں ہوں، بلکہ ان سے کچھ زیادہ تیز چلیں۔ خلاصہ یہ کہ اگر عوام پیادہ کی طرح ایک خانے کی چال چلتے ہیں، تو اپنے قائدین کو گھوڑے کی طرح ڈھائی خانے کی چال چلنے والا دیکھنا چاہتے ہیں، اور ڈیڑھ خانے کی چال چلنے والوں کو دیکھ کر ان کو مایوسی ہوتی ہے۔
عوام کو شکایت اور جھنجھلاہٹ ہوتی ہے، جب وہ یہ دیکھتے ہیں کہ ان کے اور قائدین کے درمیان فرق صرف اتنا ہے کہ قائدین زیادہ اونچی آواز میں گفتگو کرتے ہیں، اور زیادہ روانی کے ساتھ تقریر کرتے ہیں۔ باقی اسٹیج پر کھڑے ہوکر وہ بھی وہیں تک دیکھتے ہیں جہاں تک پنڈال میں بیٹھے ہوئے سامعین دیکھتے ہیں، فیصلے کرنے میں وہ بھی عام لوگوں کی طرح ہچکچاہٹ اور تردد کا شکار رہتے ہیں، اقدامات کرنے میں وہ بھی دوسروں کی طرح خود کو مجبور سمجھتے ہیں، ذاتی مصلحتوں اور رکاوٹوں کو پھلانگ جانے کے معاملے میں وہ بھی بے بس نظر آتے ہیں، حال اور مستقبل سے نظریں چراکر وہ بھی ماضی کے تذکروں میں عافیت تلاش کرتے ہیں۔
قائدین کی نگاہ کمزور ہوتی ہے تو وہ منزل نہیں دیکھ پاتے، اور چونکہ سامنے سب دھندلا نظر آتا ہے اس لئے آگے قدم بھی نہیں بڑھا پاتے، ان کا ہر قدم جھجھکتے ہوئے اٹھتا ہے، اور جہاں سے اٹھتا ہے وہیں لوٹ آتا ہے، برسہا برس گزر جاتے ہیں اور ان کی زیر قیادت تنظیمیں اور ادارے کوئی پیش رفت نہیں کرپاتے۔ بلکہ بسا اوقات تو اپنی معنویت بھی کھودیتے ہیں، کہ لوگوں کو پوچھنا پڑتا ہے کہ فلاں ادارہ یا تنظیم کیوں ہے؟
کمزور نگاہ والے قائدین کو اپنا متبادل کبھی نظر نہیں آتا ہے، بلکہ اگر عوام کو کوئی متبادل نظر آ بھی جاتا ہے تب بھی وہ ان کو نظر نہیں آتا ہے، اور وہ اسے عوام کی نگاہوں کا دھوکہ قرار دیتے ہیں۔ قائدین کی نگاہ اپنا متبادل دیکھنے کے معاملے میں کمزور اس وقت بھی ہوجاتی ہے جب ان کے دل تنگ ہوتے ہیں، اور وہ کسی دوسرے کے خیال کو اپنے دل میں بٹھانے کی جگہ نہیں پاتے ہیں، ان کے دل میں صرف ایک ہی تصویر ہوتی ہے، جسے وہ تحسین کی نظر سے دیکھتے ہیں اور وہ ان کی اپنی ہوتی ہے۔
کچھ عرصہ قبل مسلم علماء کی ایک عالمی تنظیم کے انتخابی سیشن میں حاضر تھا، ممبران کی تجویز کی بنا پر ناموں کی ایک فہرست بنی تھی، اس فہرست میں سے ووٹنگ کے ذریعہ مجلس شوری کے ارکان کو منتخب کرنا تھا۔ طے پایا کہ فہرست میں موجود لوگ باری باری اسٹیج پر سے گزریں تاکہ تمام لوگ ان کو نام کے ساتھ دیکھ لیں، اور اس کے بعد ووٹنگ ہو۔ ایک صاحب جو ایک ملک کی پارلیمنٹ کے ممبر بھی تھے، اپنی باری پر اسٹیج پر آئے اور انہوں نے کہا گو کہ آپ لوگوں نے میرا نام پیش کیا ہے، لیکن میری نظر میں اس مجلس شوری کے لئے ایک فرد مجھ سے بھی زیادہ موزوں ہے، لیکن آپ حضرات کی نگاہ اس تک نہیں جاسکی ہے، میں گذارش کرتا ہوں کہ فہرست میں سے میرا نام نکال کر ان صاحب کا نام ڈال دیا جائے، اور پھر انہوں نے دلائل سے اپنی بات کو اتنا مضبوط کیا کہ لوگوں نے ان کی تجویز کو مان لیا۔ دیکھنے والے نگاہ کی اس تیزی اور دل کی اس کشادگی پر حیران رہ گئے۔
مسلم عوام مزاجا عقیدت پسند واقع ہوئے ہیں، وہ اپنی قیادت پر تنقید کرنا تو درکنار سننا بھی گوارا نہیں کرتے۔ اس تحریر کا مقصد بھی تنقید نہیں ہے، بلکہ ہر سطح کے اور ہر مکتب فکر کے قائدین سے التجا کرنا ہے کہ وہ اپنا قد بلند کرنے کی فکر کریں، کہ عوام کے عقیدت پسندانہ مزاج کے سہارے موجودہ زمانے میں زیادہ مدت تک چلنا ممکن نہیں ہے، تیزی سے بدلتے ہوئے حالات میں بار بار نگاہیں قیادت کی طرف اٹھتی ہیں اور نامراد واپس آتی ہیں، دن بدن حوصلہ بخش، حال فہم اور مستقبل بین قیادت کی ضرورت میں اضافہ ہوتا جارہا ہے، ادھر مختلف جہتوں سے ملی تنظیموں اور اداروں کی قیادت پر تنقید کا آغاز ہوا ہے، جو قائدین کے لئے اچھی اور اطمینان بخش خبر نہیں ہے۔ اپنا دفاع کرنے کی سب سے اچھی صورت یہ ہے کہ خود کو عوام کی معقول توقعات اور منصب کے حقیقی تقاضوں کے مطابق بنانے کی فکر کی جائے۔

مذہبی تشدد ایک خطرناک بیماری

 تشدد کا پھل کڑوا ہوتا ہے، خواہ کیسا ہی تشدد ہو، بسا اوقات تشدد کے خلاف آواز بلند کرنے والے خود تشدد میں ملوث پائے جاتے ہیں۔ تشدد کی بہت ساری قسمیں ہیں ،لیکن مذہبی تشدد اس کی ایک زیادہ خطرناک قسم ہے۔ کیونکہ مذہبی تشدد انسانوں کے مسیحاؤں کو انسانوں کا قاتل بنادیتا ہے۔
میں نے اکثر دیکھا ہے کہ لوگ مذہبی تشدد پر تنقید کرتے ہوئے مذہب پر کیچڑ اچھالنے لگتے ہیں، حالانکہ مذہب کی سب سے معتبر اور مقبول کتاب قرآن مجید میں مذہبی غلو اور مذہبی تشدد کی جس طرح بھرپور مذمت کی گئی ہے، شاید ہی کسی اور کتاب میں کی گئی ہو۔ قرآن مجید تو (لست علیھم بمصیطر) کا طاقت ور اصول دے کر مذہبی تشدد کے سارے راستے بند کردیتا ہے۔ یہ اصول یاد رہے تو مذہبی اقدار کا بول بالا ہوتا ہے، اور یہ سبق فراموش کردیا جائے تو مذہبی تشدد کا آغاز ہوجاتا ہے۔
مذہب اور مذہبی تشدد میں تاریکی اور اجالے جیسا فرق ہے، مذہب انسان کو سماج کے لئے باعث رحمت وسعادت بناتا ہے، اور مذہبی تشدد سے انسان سماج کے لئے ایک خطرناک مسئلہ اور مشکل مرض بن جاتا ہے۔
جب کوئی مذہبی تشدد میں گرفتار ہوجاتا ہے، تو وہ مذہب کے نام پر مذہب کی قدروں کو پامال کرنے لگتا ہے، اور مذہب نے جو حدود طے کئے ہیں ان کو توڑتا چلا جاتا ہے، وہ نہ مسجدوں کی حرمت کا خیال کرتا ہے اور نہ اہل علم کی بے حرمتی کرنے میں تامل کرتا ہے۔
کفر کے فتوے لگانا مذہبی تشدد کی ایک نمایاں علامت ہے، مسلمانوں پر کفر کے فتوے لگانا کوئی نئی بات نہیں ہے، لوگوں نے مذہبی تشدد کا شکار ہوکر بڑے بڑے صحابہ پر کفر کے فتوے لگائے یہاں تک کہ حضرت علی کی ذات گرامی کو بھی نہیں چھوڑا۔
انسانوں کا بے دریغ خون بہانا بھی مذہبی تشدد کی علامت ہے، مذہبی تشدد کے حامل لوگ جب خون بہانے پر آتے ہیں تو ان کی درندگی کا نشانہ اللہ کے نیک بندے زیادہ بنتے ہیں، ایسے لوگوں نے مذہبی تشدد کے نشہ میں حضرت خباب بن ارت کو قتل کیا اور ان کی حاملہ بیوی کا پیٹ چاک کردیا، امام احمد بن حنبل کو تعذیب کا نشانہ بنایا، تو امام بخاری کو اذیتیں دیں۔
مذہب کے حاملین دعوت وموعظت پر یقین رکھتے ہیں، اس راہ میں آزمائشوں پر صبر کرنے کا حوصلہ رکھتے ہیں، اور قتال کے مرحلے میں اس وقت تک نہیں داخل ہوتے جب تک ناگزیر نہ ہوجائے۔
جب کہ مذہبی تشدد کا آغاز ہی تکفیر اور قتال سے ہوتا ہے، گفتگو اور افہام وتفہیم کی یہاں سرے سے گنجائش نہیں ہوتی ہے۔ ایسے لوگ ہر اس انسان کو قابل گردن زدنی سمجھتے ہیں جو ان کی بات سے اتفاق نہیں رکھتا ہو۔
مذہبی تشدد کے بھی بہت سارے مراتب ہیں، مسلک ومشرب کو جو لوگ مذہب کا درجہ دے کر مسلکی تعصب کا مظاہرہ کرتے ہیں، وہ بھی دراصل ایک طرح کے مذہبی تشدد میں گرفتار ہوتے ہیں۔
مذہبی تشدد اور آزادی رائے میں شدید قسم کا بیر ہوتا ہے، جہاں مذہبی تشدد کا بول بالا ہوتا ہے وہاں فکرو خیال کی آزادی ختم ہوجاتی ہے۔ مذہبی تشدد کا نتیجہ ہی ہے کہ جب کوئی صاحب علم عام رائے سے ہٹ کر کوئی نیا خیال پیش کرتا ہے، تو اس کے خیال پر گفتگو کرنے کی بجائے اس کی نیت پر حملہ شروع کردیا جاتا ہے۔
منکر قرآن، منکر حدیث اور منکر اجماع جیسی بہت ساری اصطلاحات کا جنم بھی مذہبی تشدد کے بطن سے ہوا ہے، مخالف کو دلائل کی بجائے اصطلاحات سے کچلنے کے لئے ان کا استعمال عام ہے۔
مذہب کی کارفرمائی ہوتی ہے تو مصلحین اور مجددین پیدا ہوتے ہیں جو پوری امت کی اصلاح وتربیت اور ساری انسانیت کی رہنمائی کی فکر کرتے ہیں، مذہبی تشدد کے نتیجہ میں فرقے بنتے ہیں اور فرقوں کی حفاظت کرنے والے پیدا ہوتے ہیں، جو اپنے فرقے کو اہل سنت اور دوسرے سب فرقوں کو گمراہ قرار دیتے ہیں۔
مذہبی تشدد کا نتیجہ یہ بھی سامنے آتا ہے کہ لوگ عقیدہ اور خیال میں فرق کو فراموش کر بیٹھتے ہیں۔ چنانچہ ایسے خیالات جو محض خیالات ہوتے ہیں، اور جن کی پشت پر بسا اوقات کوئی کمزور سی دلیل ہوتی ہے، اسے بھی عقیدہ کا درجہ دے دیا جاتا ہے، اور اس پر گفتگو کو قابل تعزیر جرم قرار دے دیا جاتا ہے۔
مذہبی تشدد کے نتیجہ میں لوگ یہ بھی فراموش کردیتے ہیں کہ مذہب سے متعلق کچھ مسائل میں اختلاف رائے کی گنجائش بھی ہوتی ہے، کچھ مسائل میں اختلاف کرنے سے آدمی دین سے خارج نہیں ہوتا ہے خواہ اس کی دلیل کمزور اور آپ کی مضبوط کیوں نہ ہو، بعض چیزیں آپ کی نظر میں منکر ہوں تب بھی ان پر دوسروں کی نکیر کرنے سے پہلے نکیر کرنے کے ضابطوں کو پورا کرنا ضروری ہوتا ہے۔
مذہبی تشدد سوچنے سمجھنے کی صلاحیتوں کو ماؤف کردیتا ہے، ایسے لوگوں کے سامنے دلائل بے وزن اور اہل علم بے وقعت ہوجاتے ہیں۔ قرآن مجید غوروفکر کرنے کی دعوت اس لئے بھی دیتا ہے کہ مذہبی تشدد سے باہر آنے کا یہی ایک راستہ ہے۔

شب قدر۔۔۔ ترقیوں کی رات کیسے بنے؟

(ماہ رمضان سے پہلے پڑھنے کے لئے)
شب قدر کی فضیلت قرآن مجید میں جن لفظوں اور اسلوب میں بیان کی گئی ہے، اس سے یقین ہوجاتا ہے کہ یہ رات ہمارے لئے بہت اہم ہے اور اس کی اہمیت ہمارے تصور سے کہیں زیادہ ہے، ایک رات کا ایک ہزار مہینوں سے افضل ہونا اس رات کو بے حد پرکشش اور اس کی فضیلت کو انسانوں کے تخیل سے فزوں تر بنا دیتا ہے۔ اس پوری رات میں سارے اہم فیصلے تقسیم ہوتے ہیں، اور یہ فیصلے بندوں سے متعلق ہر چیز کے سلسلے میں ہوتے ہیں، وہ مادی اسباب ہوں یا روحانی مراتب ہوں۔
شب قدر میں رب کریم کی طرف سے ترقی کے پروانے بھی جاری ہوتے ہیں، یہ ان بندوں کو ملتے ہیں جن سے رب راضی ہو۔ اس دنیا میں اصل ترقی یہ ہے کہ بندہ اصحاب الشمال سے نکل کر اصحاب الیمین میں اور اس سے آگے بڑھ کر سابقون اور مقربون کے زمرے میں شامل ہوجائے۔ رب کو راضی کرنے کے لئے لوگ شب قدر کو تلاش کرتے ہیں، وہ ہر اس رات کو پالینا چاہتے ہیں جس کے بارے میں انہیں قدر والی رات ہونے کی امید ہوتی ہے۔ ان راتوں میں وہ خصوصی عبادت اور بہت زیادہ دعائیں کرتے ہیں۔ بعض اعلی ہمت والے تو ماہ رمضان کی تمام راتوں میں شب قدر کو تلاش کرتے ہیں۔
دیکھا گیا ہے کہ لوگ شب قدر کے لئے جو بھی کرتے ہیں وہ شب قدر کے اندر ہی کرتے ہیں، شب قدر سے پہلے شب قدر کے لئے کچھ کرنے کا تصور زیادہ عام نہیں ہے، شب قدر کی برکتوں کو حاصل کرنے کے لئے اس رات میں عبادت اور دعا کی یقینا بہت اہمیت ہے، لیکن بہت ضروری معلوم ہوتا ہے کہ اس رات سے پہلے بھی اس رات کی بھرپور تیاری کی جائے، تیاری کی ایک بہترین صورت یہ ہے کہ شب قدر سے پہلے اپنی شخصیت میں کچھ ایسی تبدیلیاں لائی جائیں جو رب کو راضی کرنے والی ہوں، اور ہماری ترقی کے حق میں سفارشی بن سکتی ہوں۔
اپنی خراب کارکردگی کو بہتر بنانے کی کوئی کوشش نہ کرکے صرف پروموشن کی امید رکھنا اور اس کے لئے درخواست پر درخواست دینا دانشمندانہ رویہ نہیں سمجھا جاتا ہے۔ شب قدر کو ترقی (promotion) کی رات قرار دے کر اور اس سے پہلے ہی اپنی زندگی کو بدلنے کی بہت ساری کوششیں اور فیصلے کرلینے کے بعد جب بندہ شب قدر کو تلاش کرکے اس میں دعائیں مانگے، تو قبولیت کے امکانات یقینا بڑھ جاتے ہوں گے۔
عمل کو دعا کا وسیلہ بنانے کے سلسلے میں میرے علم کی حد تک سب کا اتفاق ہے، تو کیوں نہ ماہ رمضان شروع ہونے سے پہلے ہی یہ بھی طے کرلیا جائے کہ اس بار قدر والی رات میں دعاؤں کے ساتھ اعمال کا کون سا وسیلہ شامل کرنا ہے۔ ذرا تصور کریں کہ قدر کی رات ہو، فجر تک سلام ہی سلام ہو، زمین پر سجدہ ریز جبینیں اور آنسؤوں میں ڈوبی ہوئی دعائیں ہوں، اور پھر خاص اس رات کے لئے بہترین اعمال کا وسیلہ بھی بھیجا جاچکا ہو، تو ایسے بندے کی خوش نصیبی کا کیا کہنا۔
اگر شب قدر کے لئے بہترین اعمال کا خصوصی وسیلہ آگے بھیج دیا، تو اللہ کی بے پایاں رحمت سے یہ امید بھی رکھ سکتے ہیں کہ کسی مجبوری کی وجہ سے وہ رات نہیں مل سکے، یا اس رات کے شایان شان عبادت اور دعائیں کرنے کا موقع نہیں مل سکے، تو اعمال کا خصوصی وسیلہ قائم مقامی کردے۔
شب قدر کی بے انتہا فضیلت کا تقاضا تو یہ ہے کہ اس کو پالینے کی طلب میں سال بھر تیاری کی جائے، اور سال بھر کے جرأت مندانہ فیصلوں اور محنتوں کے ذریعہ اپنی شخصیت کو شب قدر کی ترقیوں کا اہل بنالیا جائے، لوگوں کے حقوق ادا کردئے جائیں، حرام کاریوں سے اور ناجائز پیشوں سے دامن چھڑالیا جائے، غفلتوں کی سیلیں توڑ دی جائیں، نیکیوں کے مینار بلند کردئے جائیں، جہد وعمل کی مثالیں قائم کردی جائیں، اس امید پر کہ شب قدر میں ترقی کا فیصلہ ہو اور اصحاب الیمین کے زمرے میں بلکہ اس سے بھی آگے سابقون اور مقربون کے زمرے میں شامل کردیا جائے۔
ہر سال آنے والی شب قدر کو ہماری زندگی میں ایک اہم سنگ میل بن جانا چاہئے، بہت سارے ناپسندیدہ امور ہوتے ہیں جن کو ہم چھوڑنے میں ٹال مٹول کرتے ہیں، اور بہت سارے پسندیدہ امور ہوتے ہیں جن کو ہم آئندہ کے بستے میں ڈالتے رہتے ہیں اور یوں زندگی کے بہت سارے ماہ وسال غفلت وتردد میں گزر جاتے ہیں۔ اگر ہم قدر والی رات کو زندگی کا اہم سنگ میل اور حتمی ڈیڈ لائن قرار دے کر اس سے پہلے ہی ٹال مٹول کے سارے سلسلوں کو خوب صورت اختتام دے دیں تو قوی امید ہے کہ زندگی حسین وجمیل اور مفید وبابرکت ہوجائے۔ اور ہر سال قدر والی رات میں رب کریم کی طرف سے بہترین ترقی کا بے بہا پروانہ ملا کرے۔

اپنی معلومات تازہ کرتے رہیں

ٹرین سے سفر کرنے کا موقعہ کافی زیادہ ملا ہے، اس لئے یہ خوش فہمی ہوگئی کہ ریلوے سے متعلق تمام ضروری باتوں کا علم حاصل ہوگیا ہے، لیکن واقعات نے کئی مرتبہ اس خوش فہمی کو دور کیا۔
اس ماہ کے آغاز میں مجھے مع اہل عیال گورکھپور (یوپی) سے شورنور (کیرلا) جانا تھا، راپتی ساگر ایکسپریس سے ریزرویشن تھا، اور ایک فارم کے اندر چھ افراد میں صرف تین کا ٹکٹ کنفرم ہوسکا تھا، باقی تین انتظار کی فہرست میں رہ گئے تھے۔ میری معلومات یہ تھیں کہ اگر آن لائن ٹکٹ کنفرم نہ ہوسکے تو ٹکٹ از خود کینسل ہوجاتا ہے، اور ٹکٹ کی قیمت واپس اس اکاؤنٹ میں پہونچ جاتی ہے جس سے وہ ادا ہوئی تھی۔ چنانچہ میں اسٹیشن پر وقت سے کافی پہلے پہونچا، لمبی لائن میں دیر تک کھڑے ہو کر تین عدد جنرل ٹکٹ خریدے تاکہ ٹرین میں داخل ہونے کا جواز مل سکے، ٹی ٹی آیا، میں نے اس کو تینوں جنرل ٹکٹ دکھائے کہ وہ ان پر اضافی رقم لگا کر رسید بنادے۔ لیکن اس نے اضافی رقم لے کر رسید بنانے کی بجائے میری معلومات میں اضافہ کردیا۔ اور وہ یہ کہ اگر ایک فارم کے اندر کچھ افراد کے ٹکٹ کنفرم ہوجاتے ہیں تو باقی کے ٹکٹ کینسل نہیں ہوتے ہیں، البتہ اگر کوئی کنفرم نہیں ہوا ہو تو سارے ٹکٹ کینسل ہوجاتے ہیں۔ مجھے اس بات کی تو خوشی ہوئی کہ تین ٹکٹوں پر اضافی رقم کی مار سے بچ گئے تاہم میں نے جو تین ٹکٹ لمبی لائن میں لگ کر خریدے تھے ان کے ضائع ہوجانے کا احساس بھی ہوا۔ یہ سب اس وجہ سے ہوا کہ میں نے نئی صورت حال کو نیا نہیں سمجھا اور پرانی معلومات پر انحصار کرلیا۔
اس سے زیادہ تلخ صورت حال سامنے آئی جب تقریبا دس سال قبل میں بچوں کے ساتھ کالی کٹ سے حیدرآباد جا رہا تھا، اور محض پرانی معلومات پر بھروسہ کرلینے کی وجہ سے اچھا خاصا جرمانہ دینا پڑا، اہل خانہ کے سامنے سبکی اس پر مزید۔
نئی اور معمول سے مختلف صورت حال ہمیشہ تقاضا کرتی ہے کہ اپنی معلومات کو بھی نیا اور تازہ کیا جائے، لیکن بہت سارے لوگ صورت حال کے مختلف ہوجانے یا بدل جانے کا ادراک نہیں کرپاتے، اور بہت سارے لوگ یہ ادراک تو کرلیتے ہیں، لیکن بدلی ہوئی صورت حال کے مطابق اپنی معلومات تازہ کرنے کی ضرورت کا ادراک نہیں کرپاتے۔ نئی صورت حال کی مار سے خود کو بچانے کا بہترین طریقہ ہے کہ خود کو اپ ٹو ڈیٹ رکھا جائے۔
کچھ لوگوں کے اندر اپنی معلومات تازہ کرتے رہنے کا شوق ہوتا ہے، یہ بہت اچھا شوق ہے، اس کو پھولنے پھلنے کا خوب موقعہ دینا چاہئے، ساتھ ہی انسانوں سے محبت کا تقاضا ہے کہ تازہ بہ تازہ معلومات میں دوسروں کو بھی شریک کیا جائے۔ خدمت خلق میں نمایاں خدمت انجام دینے کا ایک طریقہ یہ بھی ہے کہ شوقین افراد عملی زندگی سے متعلق اپنی معلومات کو اتنا زیادہ وسیع اور اپ ٹو ڈیٹ رکھیں، کہ وہ اپنی بستی والوں کے لئے مرجع بن جائیں۔ بسا اوقات ایک پریشان شخص کی بہترین خدمت یہ ہوتی ہے کہ اسے مناسب معلومات فراہم کردی جائیں۔
بعض لوگوں کے اندر معلومات پہونچانے کا جذبہ اتنا زیادہ ہوتا ہے کہ وہ انکوائری کا انتظار نہیں کرتے، اور سامنے والے کی حالت کا اندازہ ہوتے ہی تازہ اور مفید معلومات کا تحفہ پیش کردیتے ہیں۔ یہ خدمت کا اعلی معیار ہے۔
ہماری مجالس جو اکثر لغو اور غیر مفید باتوں پرمشتمل ہوتی ہیں، اگر ان کا ایک حصہ مفید عملی معلومات کے تبادلے کے لئے مختص ہوجائے تو ہماری عام معلوماتی استعداد بہت بہتر ہوسکتی ہے، اور اس طرح ہم اپنے اور دوسروں کے لئے زیادہ مفید ہوسکتے ہیں۔
کچھ لوگ دوسروں سے دریافت کرنے میں تکلف محسوس کرتے ہیں، یہ تکلف اکثر شدید تکلیف کا باعث بن جاتا ہے۔ سب کی طرح میری زندگی میں بھی بہت سارے مشکل مرحلے آئے اور میں ذاتی طور سے ان سب محسنوں کا شکر گزار ہوں جنہوں نے کبھی پوچھے بنا اور کبھی میرے پوچھنے پر بیش قیمت معلومات سے نوازا، اور میری بہت ساری مشکلات کو آسان کردینے میں مدد کی، بلاشبہ دوسروں کی معلومات سے استفادہ میرے لئے آسان یوں ہوا کہ میں نے پوچھنے میں کبھی تردد نہیں کیا، اور بتانے والوں نے بتانے میں کوتاہی نہیں کی۔
نئی صورت حال کا ادراک کرنا، اور اس کے لحاظ سے اپنی معلومات کو تازہ کرلینا افراد کے لئے ضروری ہے اور اس سے زیادہ اجتماعی اداروں کے لئے ضروری ہے، بہت سارے اداروں کی دن بدن بگڑتی ہوئی کارکردگی کی بنیادی وجہ یہ ہے کہ صورت حال ایک بار نہیں کئی بار بدل چکی ہوتی ہے، نئی صورت حال نئی معلومات پر مبنی نئے طرز فکر اور نئے طریقہ کار کا تقاضا کررہی ہوتی ہے، اور وہ پرانی معلومات کو حرف مقدس کی طرح سینے سے لگائے رہتے ہیں۔

رشتے داروں میں محبت کیوں نہ ہو؟؟؟

 کچھ باتیں اتنی سادہ ہوتی ہیں کہ بغیر سمجھے سب لوگوں کی سمجھ میں آجائیں، لیکن لوگوں کی عملی زندگی کو دیکھ کر لگتا ہے کہ وہ سادہ سی باتیں زیادہ تر لوگوں کی سمجھ میں نہیں آسکی ہیں، بلکہ اعلی تعلیم اور بہترین دماغ رکھنے والے بھی ان کو سمجھنے سے معذور نظر آتے ہیں۔
محبت کے ساتھ رہنے کا فائدہ سب سے پہلے محبت کے ساتھ رہنے والوں کو حاصل ہوتا ہے، اور نفرت کے ساتھ رہنے کا نقصان سب سے پہلے نفرت کے ساتھ رہنے والوں کو اٹھانا پڑتا ہے، یہ جاننے کے باوجود بہت سارے لوگ نفرت کے ساتھ رہنے میں زیادہ آرام محسوس کرتے ہیں۔
جن رشتہ داروں میں آپس میں محبت ہوتی ہے وہ کتنے فائدے میں رہتے ہیں، اس کا تصور بھی وہ لوگ نہیں کرسکتے جو نفرت کے ماحول میں جینے کے عادی ہوجاتے ہیں، اور جن کے دل نفرت کے جذبات سے غذا حاصل کیا کرتے ہیں۔ میرا ذاتی مشاہدہ ہے کہ محبت کے ساتھ رہنے والے رشتہ داروں کے پاس زندگی سے لطف اٹھانے کے مواقع کئی سو گنا زیادہ ہوجاتے ہیں۔ اللہ کا شکر ہے کہ میں نے اپنے ان رشتے داروں کی بدولت جن سے میرے تعلقات خوش گوار ہیں، زندگی کو اتنا زیادہ انجوائے کیا کہ اگر تعلقات کی خوش گواری شامل حال نہیں ہوتی تو میں زندگی کی بہت ساری لذتوں سے محروم رہتا۔
مجھے لگتا ہے کہ محبت کا رویہ اپنانے کے لئے آدمی کو نفس کے ایک پست مقام سے نکل کر ایک بلندی تک پہونچنا ہوتا ہے، اور اس کی سہل پسند طبیعت اس چڑھائی کے لئے آمادہ نہیں ہوپاتی۔ حالانکہ پہاڑی راستوں کی طرح یہ کوئی مشکل چڑھائی نہیں ہوتی ہے، ایک لمحہ کا فیصلہ ہوتا ہے، اور آدمی بلندیوں کی سیر کرنے لگتا ہے۔ ایک مشہور ماہر تربیت سے جب ایک شوہر نے پوچھا کہ میں شادی کے بعد کچھ سال تک تو اپنی بیوی سے بہت محبت کرتا تھا پر اب نہیں کرتا ہوں، اس کا علاج بتائیے۔ تو اس نے کہا کہ اس کا علاج صرف یہ ہے کہ اپنی بیوی سے پھر سے محبت کرنے لگو۔ سچ پوچھئے تو مجھے یہ جواب بہت تشفی بخش لگا۔
محبت کے تعلقات کا بہت زیادہ دارومدار کسی ایک کی سبقت پر ہوتا ہے، بعض مرتبہ شادی کے وقت لڑکی سوچتی ہے کہ میری ساس مجھ سے محبت سے پیش آئے گی تبھی میں اس سے محبت سے پیش آؤں گی، ساس بھی بہو کے متعلق اسی طرح کا ارادہ رکھتی ہے، چنانچہ دونوں کا جی تو یہی چاہتا ہے کہ محبت کے ساتھ رہیں، لیکن پوری زندگی دونوں انتظار کرتے ہوئے گزار دیتی ہیں، اگر بہواس طرح سوچتی کہ میں پہلے دن سے اپنی ساس سے محبت سے پیش آؤں گی کہ وہ بھی مجھ سے محبت سے پیش آنے پر مجبور ہوجائے، تو یقینا وہ اپنی ساس کا دل جیت لیتی۔ مطلب یہ کہ محبت سے پیش آنے کی پہلی ذمہ داری کون قبول کرے یہ بہت اہم بات ہے۔ یاد رہے قرآن مجید میں خیر کے کاموں میں آگے بڑؑھ جانے والوں کی بڑی تعریف کی گئی ہے۔ فاستبقوا الخیرات۔
لوگوں کو اس وقت بڑا تعجب ہوتا ہے جب وہ ساس اور بہو کو محبت کے ساتھ رہتے ہوئے دیکھتے ہیں، یا کسی بہو کو اپنی ساس کی بہت زیادہ تعریف کرتے ہوئے دیکھتے ہیں، اور اگر کوئی خاتون اپنی سوکن کی تعریف کرے تب تو لوگ اس کی دماغی حالت پر بھی شک کرنے لگتے ہیں۔ حالانکہ محبت کے ساتھ تو سب کو رہنا چاہئے، خواہ وہ ماں اور بیٹی ہو، شوہر اور بیوی ہوں، ساس اور بہو ہوں، نند اور بھاوج ہوں یا دو سوکنیں ہوں۔ اصل میں ہمارے معاشرے نے بہت سارے رشتوں کے بارے میں لوگوں کے ذہن میں یہ بٹھادیا ہے کہ یہ باہم کشیدگی اور کھینچا تانی کے رشتے ہیں۔ لیکن یہ سوچ یکسر غلط ہے، اللہ تعالی نے جتنے رشتے بنائے ہیں وہ سب محبت کی بنیاد پر قائم ہوں تبھی دلکش لگتے ہیں، ورنہ ان کی دلکشی ختم ہوجاتی ہے، ساتھ ہی ان رشتوں سے جڑے رشتہ داروں کی شخصیت بھی پھر اچھی نہیں لگتی ہے۔
گھروں میں کھڑکی اور روشن دان نہیں ہوں اور گرمی کے موسم میں بجلی بھی چلی جائے تو گھٹن کا احساس ہوتا ہے، واقعہ یہ ہے کہ اس سے شدید گھٹن اس وقت ہوتی ہے جب گھر میں ساتھ رہنے والوں کے باہمی تعلقات ناخوش گوار ہوں۔ بجلی نہ ہو تو لوگ ہاتھ کے پنکھے جھلتے ہوئے سرکار کو برا بھلا کہتے ہیں، اور اس سے زیادہ کچھ نہیں کرپاتے۔ لیکن آپس کے تعلقات خوش گوار بنانے کے لئے تو ایک پیش قدمی کافی ہوتی ہے، اور لمحوں میں برسوں کا دل پر جما میل دھل جاتا ہے۔ دل صاف ہوجاتے ہیں، اور صاف دل والے بندے اللہ کو بہت پسند ہیں۔ واللہ یحب المتطھرین۔
ذرا سی زندگی میں دشمنی کیا بغض وکینہ کیا
محبت کے تقاضے پورے ہوجائیں غنیمت ہے

شکر گزاری رشتوں کو مضبوط کرتی ہے

 
یہ بالکل صحیح ہے کہ انسان کو بے غرض ہونا چاہئے، اور احسان مندی کی توقع کے بغیر بے لوثی کے ساتھ احسان کرتے رہنا چاہئے، یہ بھی درست ہے کہ نیکی کو جتانے سے نیکی ضائع ہوجاتی ہے خواہ وہ کتنی بڑی نیکی کیوں نہ ہو۔ اس میں بھی شبہ نہیں کہ بھلائی کے سلسلے کو جاری رکھنے کے لئے شکر گزاری کی شرط لگانا کم ظرفی کی دلیل ہے۔ درحقیقت بندوں کے ساتھ نیکی کرکے اپنے رب سے صلہ کی امید رکھنا ہی کامیاب ترین سودا ہے۔
لیکن دوسری طرف شکر گزاری اور احسان مندی بھی ایک خوبی ہے، اور اس خوبی کا بھی معاشرے میں بھر پور اظہار ہونا چاہئے۔
انسانی معاشرہ میں ہر شخص کسی نہ کسی کی کسی طور خدمت اور مدد کرتا ہے، اکثر ایسا ہوتا ہے کہ کوئی آپ کی مدد کرتا ہے، اور آپ اس سے شکریہ کہتے ہیں، وہ جوابا کہتا ہے کہ شکریہ کی کیا بات، یہ تو میرا اخلاقی فرض تھا۔ حقیقت یہ ہے کہ اس نے آپ کے ساتھ جو نیکی کی وہ ایک اخلاقی فرض ہو یا نہ ہو، آپ کا اس کی نیکی پر شکریہ کہنا ضرور ایک اخلاقی فرض بنتا ہے۔
شکرگزاری شخصیت کی بلندی کی علامت ہے، بعض لوگ پہلے سے دل میں طے کرلیتے ہیں کہ سامنے والے نے نیکی کرکے اپنے اخلاقی فرض کو ادا کیا، یا کسی پرانی نیکی کا بدلہ دیا، اور یوں شکریہ ادا کرنے کی ضرورت محسوس نہیں کرتے۔ یہ سوچ شخصیت کو ایک اعلی اخلاقی صفت سے محروم کردیتی ہے۔
شکر گزاری اپنے آپ میں ایک بڑی سماجی خدمت ہے، اس سے معاشرے میں نیکی اور بھلائی کے رجحان کو قوت حاصل ہوتی ہے، کسی نیکی کرنے والے کی جس قدر بھر پور طریقے سے شکر گزاری کی جائے گی، اس کا نیکی کا جذبہ اور حوصلہ اتنا ہی اور پروان چڑھے گا، اور جس قدر اعلانیہ شکر گزاری کی جائے گی اسی قدر دوسرے لوگوں میں بھی نیکی کا جذبہ نشوونما پائے گا۔
شکر گزاری سے رشتے اور تعلقات بھی بہت مضبوط ہوتے ہیں۔ میں نے محسوس کیا ہے کہ تحفہ دینے سے تعلقات کی خوشگواری پر اچھا اثر ہوتا ہے، لیکن اس سے کہیں زیادہ اثر اس بھرپور شکریہ کا ہوتا ہے جو تحفے کو قبول کرنے والے کی طرف سے ادا کیا جاتا ہے۔
شکرگزاری محض ایک زبانی عمل نہیں ہے جسے بے دلی اور بے دھیانی سے ادا کردیا جائے، شکر گزاری تو باہمی تعلقات کی عمارت اٹھانا ہے، نیکی کرنے والے کی تکریم اور اس کی نیکی کا خوب صورت اعتراف کرنا ہے، گھر سے لے کر سماج تک جس قدر ایک دوسرے کے ساتھ بھلائی اور بھلائی پر شکر گزاری کا چلن ہوگا، اتنا ہی زیادہ اچھے تعلقات اور خوب صورت رشتوں کی تعمیر ہوگی۔
بعض لوگ دل سے شکر گزار ہونا کافی سمجھتے ہیں، اور زبان سے اس کے اظہار کی ضرورت نہیں سمجھتے، لیکن یہ رویہ درست نہیں ہے، اور اس سے شکریہ کا مقصد حاصل نہیں ہوتا ہے، شکریہ کے جذبات دل کی گہرائیوں سے ہوں، اور ان کی بھرپور ادائیگی زبان سے ہو، تبھی شکریہ کا حق ادا ہوتا ہے، اور اس کی برکتیں ظاہر ہوتی ہیں۔
بعض لوگ شکریہ تو ادا نہیں کرتے ہیں، لیکن دل میں طے کرلیتے ہیں، کہ بہترین صلہ دے کر احسان کا بوجھ ضرور اتاریں گا. نیکی کا صلہ نیکی سے دینا بہت اچھی بات ہے، لیکن یہ شکر گزاری کا بدل نہیں ہوسکتا ہے۔ شکر گزاری ایک تو اس لئے ضروری ہے کہ نیکی کی شروعات تو سامنے والے نے کی، آپ تو بہرحال اس کا بدلہ دیں گے، اور اس لئے بھی کہ کیا پتہ بدلہ دینے کا موقعہ ملے نا ملے، نہ زندگی کا بھروسہ اور نہ حالات کا، فوری شکرگزاری سے ایک اخلاقی فرض کی ادائیگی تو بروقت ہوجاتی ہے، اور اس طرح شکر گزاری کے بے شمار فائدے بھی معاشرے کو حاصل ہوتے ہیں۔
بعض لوگ شکریہ اسی وقت ادا کرتے ہیں جب بالکل بے عیب نیکی ان کے ساتھ کی جائے، اگر ذرا سی بھی خامی نکل آئے، تو وہ شکریہ کی اخلاقی ذمہ داری بھول کر شکوہ وشکایت کی بے منزل راہوں پر نکل پڑتے ہیں۔ بڑی اعلی ظرفی کی بات ہوتی ہے، کہ آپ کو کوئی تحفہ پیش کرے، وہ آپ کو بالکل پسند نہ آئے، پھر بھی آپ اس کا دل کھول کر شکریہ ادا کریں، اور بڑی کم ظرفی کی بات ہوتی ہے کہ کوئی آپ کو تحفہ دے کر آپ کے رویہ سے محسوس کرے کہ اس سے کوئی خطا سرزد ہوگئی ہے۔
سادہ سی بات ہے کہ میزبانی سے تعلقات میں مضبوطی اور خوش گواری آنا چاہئے، لیکن گھر گھر کی کہانی یہ ہے کہ ذرا سی کوتاہی مہمان رشتے دار کو ناراض کردیتی ہے اور وہ دل میں شکایتوں کا دفتر لئے رخصت ہوجاتا ہے۔ میں نے بہت دفعہ دیکھا ہے کہ جن لوگوں کے تعلقات برسوں سے نارمل چلے آرہے تھے، ایک وقت کی یا چند دنوں کی میزبانی کے بعد بہت زیادہ خراب ہوگئے۔ اس میں میزبان کا قصور بھی ہوسکتا ہے، لیکن مہمان کی اخلاقی ذمہ داری بنتی ہے کہ وہ اس میزبان کی کوتاہیوں اور خامیوں سے درگزر کرتے ہوئے اس کی میزبانی کی لاج رکھے، اگر وہ مثالی اور معیاری میزبان نہیں بن سکا تو آپ تو ایک اچھے مہمان بن سکتے تھے۔ خراب میزبان کو سبق سکھانے کا طریقہ یہ نہیں ہے کہ آپ خراب مہمان بن جائیں، صحیح طریقہ یہ ہے کہ اس وقت آپ اس کے اچھے مہمان بن جائیں، اور موقعہ ڈھونڈ کر اسے اچھا میزبان بن کر بھی دکھا دیں۔
مشہور کہاوت ہے، دسترخوان نہ بچھے تو ایک عیب، اور بچھے تو سو عیب۔ پر یاد رہے کہ یہ کہاوت صحتمند رویہ کی عکاسی نہیں کرتی، دسترخوان کا نہ بچھنا بہت بڑا عیب ہے، جو مجبوری کی حالت میں ہی گوارا کیا جاسکتا ہے، اور دسترخوان کا بچھ جانا بہت بڑی خوبی ہے، اس خوبی کے ہوتے ہوئے کشادہ ظرف لوگ سو عیب کیا ہزار عیبوں سے چشم پوشی کرلیتے ہیں۔
جب خود غرضی اور صرف اپنے اوپر خرچ کرنے کا رجحان تیزی سے بڑھ رہا ہو، صارفیت کا سیلاب خدمت کے حوصلوں کو شدید دھمکیاں دے رہا ہو تو معاشرہ میں خدمت، نیکی اور بھلائی کے رجحان کو قوت پہونچانا بہت زیادہ ضروری ہوجاتا ہے۔ شکر گزاری اور احسان مندی کی اہمیت اس سے اور اجاگر ہوجاتی ہے۔

حق دار کا حق اور قرض دار کا فرض

معاشرے میں یوں تو بہت سارے لوگ بہت ساری تکلیفوں سے دوچار رہتے ہیں، اور وہ سب ہمدردی کے قابل ہوتے ہیں، تاہم مجھے بہت ترس آتا ہے ان لوگوں پر جو محض اس وجہ سے شدید ذہنی اذیت سے دوچار رہتے ہیں، کہ انہوں نے کسی کی مدد کے جذبہ سے اسے قرض دے دیا ہوتا ہے، یا کسی کی مشکل آسان کرنے کے لئے ادھار مال فروخت کردیا ہوتا ہے، قرض دار تک رسائی کی زحمت، قرض واپس مانگنے کی تکلیف اور پھر بھی قرض واپس نہ ملنے کا کرب، غرض اذیتوں کا ایک طویل سلسلہ چلتا رہتا ہے، جس سے وہ لوگ قدرے محفوظ رہتے ہیں جن کے دل میں ہمدردی کا جذبہ نہیں ہوتا۔
جاننا چاہئے کہ بلاسودی قرض کا نظام مسلم معاشرہ کی خوبی اور امتیاز ہے، یہ مسلم معاشرہ پر اللہ کی خاص رحمت کا مظہر ہے۔ کسی اور معاشرہ میں ضرورت مندوں کی مدد کا اتنا اچھا انتظام شاید نہیں ہے، اس انتظام کی حفاظت ضروری ہے، اور اس کے لئے بہت ضروری ہے کہ اس سلسلے کی الہی تعلیمات کا بھرپور لحاظ کیا جائے۔
قرآن مجید کی سب سے طویل آیت ادھار لین دین کا سلیقہ سکھاتی ہے، اگر ہم اس کی تعلیمات سے اپنی زندگی کو آراستہ کرلیں، تو شخصیت میں حسن پیدا ہوجائے، معاشرہ کو سکون ملے اور بلا سودی قرض کے اس الہی نظام کی رحمتیں سایہ فگن رہیں۔ قرآن مجید کی یہ آیت کہتی ہے اور تاکید کے ساتھ کہتی ہے کہ ادھار کی رقم چھوٹی ہو یا بڑی، اس کی واپسی کی مدت طے کرو اور مدت کے ساتھ اس کو تحریری شکل دو۔
اصولی بات ہے کہ قرض ادھار کا معاملہ کرتے وقت ہی قرض کی واپسی کے سلسلے میں یا تو مدت کا تعین ہو، یا قرض دار حق دار سے طے کرے کہ مطالبہ کے فورا بعد یا مطالبہ کے بعد ایک متعین عرصہ کے اندر وہ قرض لوٹادے گا۔ غرض قرض کی واپسی کے سلسلے میں وقت کا طے ہونا ضروری ہے اور پھر جو بات بھی طے ہوجائے اسے تحریر میں لانا بھی ضروری ہے۔
مدت کے ساتھ قرض کی رقم کو لکھنے کا سب سے بڑا فائدہ یہ ہوتا ہے کہ آگے چل کر رقم کے سلسلے میں کسی بھول چوک کے نتیجہ میں تنازعہ پیدا نہیں ہوتا، اور کوئی کسی کا مال انجانے میں حرام طریقے سے کھانے کا مرتکب نہیں ہوتا۔ کیونکہ دوسرے کا مال حرام طریقے سے کھانا تو پیٹ میں جہنم کے انگارے بھرنا ہے، اور یہ بڑے گھاٹے کا سودا ہے۔
قرض کی واپسی کی تاریخ طے ہوجانے کے بعد قرض دار کی یہ ذمہ داری ہے کہ وہ حق دار کو طے شدہ تاریخ پر بنا مانگے رقم ادا کردے، اور اگر کسی واقعی ناگزیر سبب سے وہ ادا نہیں کرسکتا ہو تو اس تاریخ کے گزرنے سے پہلے اپنی کوتاہی کے لئے معذرت خواہ ہوکر اگلی تاریخ مانگ لے۔ غرض یہ کہ کوئی قرض کتنا ہی پرانا ہوجائے مگر کبھی بھی تاریخ کے بغیر نہیں رہے، اور ہر تاریخ قرض دار خود پیش قدمی کرکے مانگے، خواہ کتنی ہی بار نئی تاریخ مانگنا پڑے۔
عام طور سے ہوتا یہ ہے کہ طے شدہ تاریخ گزر جانے کے بعد قرض دار معذرت پیش کرنے اور نئی تاریخ مانگنے کی اخلاقی ذمہ داری کو نظر انداز کردیتا ہے، اور اس کے بعد جیسے جیسے دن گزرتے جاتے ہیں، حق دار کے دل میں وسوسے سر اٹھانے لگتے ہیں اور وہ قرض دار کے سلسلے میں بدگمان ہونے لگتا ہے۔ اسے یہ لگتا ہے کہ قرض دار نے اس کے قرض کو یکسر فراموش کردیا ہے، اور اگر قرض دار فون اٹھانا بند کردے تب تو حق دار کا ذہنی کرب بہت بڑھ جاتا ہے، اور اس کو اپنا حق صاف خطرے میں نظر آتا ہے۔
اللہ کے رسول صلی اللہ علیہ وسلم کا بہترین اسوہ دیکھئے کہ ایک شخص نے وقت متعین سے پہلے ہی آپ سے قرض کی واپسی کا مطالبہ کیا، اور سب کے سامنے سخت کلامی کی، آپ کے ساتھیوں کو غصہ آیا، مگر آپ نے انہیں روک دیا اور کہا کہ یہ حق دار ہے اسے یہ حق بھی حاصل ہے، اس کے بعد اس کو اس کے حق سے بڑھا کر واپس کیا۔ حالانکہ وہ شخص ادائیگی کی طے شدہ تاریخ سے پہلے ہی مطالبہ کرنے آگیا تھا۔
ادائیگی کی تاریخ گزرجانے کے بعد اگر حق دار کو قرض دار کا تعاقب کرنا پڑے تو یہ تو قرض دار کے لئے بڑی شرم کی بات ہے، اور شرافت ومروت کے یکسر خلاف ہے، قرض دار کی تو اخلاقی ذمہ داری بنتی ہے کہ وہ حق دار کو کسی بھی ذہنی اذیت سے محفوظ رکھنے کا انتظام کرے، جس طرح اس نے قرض دے کر اسے ایک بڑی تکلیف سے بچالیا تھا۔ اور کیا اچھائی کا بدلہ اچھائی نہیں ہے؟؟ هَلْ جَزَاءُ الْإِحْسَانِ إِلَّا الْإِحْسَانُ۔