اگر ہے دل، تو چلو دل سے مل کے دیکھتے ہیں

اگر ہے دل، تو چلو دل سے مل کے دیکھتے ہیں
محی الدین غازی
خیالوں کی دنیا میں ہم بہت لوگوں سے ملاقات کرتے ہیں، کسی سے خوشگوار ماحول میں ملتے ہیں، اور کسی سے ناخوش گوار ماحول میں ملتے ہیں، کسی سے مل کر لطف اندوز ہوتے ہیں، اور کسی سے مل کر بد مزا ہوجاتے ہیں، یہ سب ہم دل کے اشارے پر کرتے ہیں، اور دل کی دنیا میں رہتے ہوئے کرتے ہیں۔
لوگ دل کی دہلیز کا زیادہ تر استعمال لوگوں سے ملاقات کے لئے ہی کرتے ہیں، دل کسی کو چاہتا ہے، تو کسی سے نفرت کرتا ہے، کسی سے حسد رکھتا ہے، تو کسی کی ٹوہ میں رہتا ہے، کسی کے لئے رشک کے جذبات رکھتا ہے، تو کسی کے لئے حقارت کے، کسی کی عظمت سے مرعوب تو کسی سے خوف زدہ، اور ایسے تمام مختلف عنوانوں سے ہم لوگوں سے روبرو ہوتے ہیں، اور ان سے ملتے رہتے ہیں۔ بسا اوقات جن سے ہم نفرت کرتے ہیں، انہی سے دل کے ڈرائنگ روم میں ہماری ملاقات زیادہ ہوتی ہے۔
یوں تو دل کے واسطے سے ہم بہت لوگوں سے ملتے رہتے ہیں، لیکن افسوس کہ خود دل سے ملنے کا ہمیں موقعہ نہیں مل پاتا ہے۔ دل کے اشارے پر ہم بہتوں کی خوبیوں اور خامیوں سے باخبر ہوجاتے ہیں، لیکن خود اپنے دل کے احوال سے واقف نہیں ہوپاتے۔
دل کے دورے کرتے رہنا بہت ضروری ہے، تاکہ اس کے احوال معلوم ہوسکیں۔ دل کی زمین پر ایمان کی کھیتی لہلہائے، اس کے لئے اس کا نرم ہونا ضروری ہے، سخت زمین پر ایمان کے پودے نہیں پنپتے ہیں۔ دل پر نور الہی کا نزول ہو، اس کے لئے اس کا پاک وصاف ہونا ضروری ہے، گندی جگہ پر اللہ کا نور نازل نہیں ہوتا۔ دل سے بڑے فیصلوں کا صدور ہو، اس کے لئے دل کا کشادہ ہونا ضروری ہے، تنگ دلوں میں بڑے کاموں کی تحریک پیدا نہیں ہوسکتی ہے۔ دل میں کوئی بیماری نہیں ہو، اس پر منفی اور بیمار سوچ کا غلبہ نہ ہو، دل آزاد ہو کسی حقیر خواہش کا غلام نہ ہو۔ من کی دنیا من کی دنیا جذب ومستی سوز وشوق۔
دل کی خبرگیری بہت ضروری ہے، کیونکہ زندگی کے تمام بڑے کام دل کو انجام دینے ہوتے ہیں، ایمان لانا دل کی ذمہ داری ہے، ایمان کے بنیادی تقاضے بھی دل کو پورے کرنے ہوتے ہیں، محبت، خشیت، تقوی، احسان، سپردگی، قربانی، توبہ اور انابت یہ سب دل کے اعمال ہیں۔ یہی نہیں بلکہ جو کام اعضاء وجوارح کے کرنے کے ہیں ان میں بھی دل کی شمولیت ضروری ہوتی ہے، دل کے خشوع کے بغیر عمل بے روح ہوتا ہے، اور دل کے اخلاص کے بغیر عمل بے قیمت ہوتا ہے۔ غرض جس دل کو زندگی کے سارے بڑے کام انجام دینے ہوں، اس کا توانا اور صحت مند رہنا بے حد ضروری ہے۔
اہل تربیت کہتے ہیں کہ تنہائی کے لمحات دل کی تربیت کے لئے بہت مفید ہیں، لیکن مشکل یہ ہے کہ جب ہم بظاہر تنہا ہوتے ہیں تو بھی دل ہمیں اپنے ساتھ نہیں بیٹھنے دیتا اور ساری دنیا کی سیر کراتا رہتا ہے، اور اس بظاہر تنہائی کے وقت میں بھی ہمیں دل سے ملنے کا موقعہ نہیں ملتا ہے۔ تنہائی اور یکسوئی کی اعلی ترین حالت نماز ہوسکتی ہے، اس میں بھی ہمارا دل ہمیں تنہائی نصیب ہونے نہیں دیتا، اس دوران بھی دل کے واسطے سے ملنے والوں کا تانتا بندھا رہتا ہے۔
دراصل دل سے ملنے کے لئے جسم والی تنہائی کم اور خیالات والی تنہائی زیادہ ضروری ہے، دل سے ملنے کا مضبوط ارادہ کریں، طے کریں کہ جب دل سے ملیں گے تو صرف دل سے ملیں گے۔ ساری توجہ اور سارا دھیان دل کے احوال پر مرکوز کردیں۔ یہ مشکل کام ہے، اس کے لئے ریاض درکار ہے، تنہائی کے حقیقی تجربہ سے گزرنا ضروری ہے۔ اصل تنہائی وہ ہے جب تھوڑی دیر کے لئے دل سے ہر شخص کا خیال رخصت ہوجائے، آپ ہوں اور آپ کا دل ہو، اور آپ دل کے اندر دل کی طرف متوجہ ہوں نہ کہ دل میں کسی اور کے ساتھ مصروف ہوں۔
مولانا فاروق خان صاحب ایک مقام پر لکھتے ہیں: ’’کہا جاتا ہے کہ لوگ اپنی پوری زندگی میں اپنے دماغ کا محض دس فیصد استعمال کرتے ہیں، واقعہ یہ ہے کہ لوگ اپنے دل کا استعمال بھی محض اتنا ہی کرتے ہیں‘‘۔ یہ بہت اہم اور قیمتی انکشاف ہے۔ دنیا بھر میں اس کی تدبیریں تو بہت ہورہی ہیں کہ انسان اپنے دماغ کی کارکردگی کس طرح بڑھائے، لیکن دل کی کارکردگی بڑھانے کی طرف توجہ عام طور سے نہیں ہے۔
جب تک اپنے دل سے خود مل کر اس کے احوال سے واقف نہیں ہوں گے، ہم اس سے مستفید اور لطف اندوز کیسے ہوسکیں گے، ہمارے دل پر دوسروں کا تسلط رہتا ہے، ان میں وہ بھی ہوتے ہیں جو ہمیں اچھے لگتے ہیں، اور وہ بھی جو ہمیں اچھے نہیں لگتے ہیں، انہیں کی وہاں مجلسیں جمتی ہیں، اور انہیں کے وہاں تذکرے ہوتے ہیں، کوئی ایک لمحہ نہیں ہوتا کہ وہ مجلسیں وہاں سے برخاست ہوں اور ہمیں اپنے دل سے روبرو اور ہم کلام ہونے کا موقعہ ملے۔
مکمل تنہائی کے تجربے سے گزر کر صرف اپنے دل کے ساتھ کچھ وقت گزارنے کا مطلب یہ ہرگز نہیں ہے کہ آدمی عزلت نشین ہوجائے، مقصود یہ ہے کہ آدمی اپنے دل کی خبرگیری کرے اور اسے زندگی کے عظیم ترین کاموں کے لئے آمادہ کرتا رہے۔ دل پر توجہ نہیں دی جائے تو وہ حقیر اور بے مصرف کاموں میں مصروف رہتا ہے، اونچی سطح پر پہونچ کر بڑے کاموں کی انجام دہی کے لئے بڑی جرأت وہمت اور سخت محنت ومشقت کی ضرورت ہوتی ہے، جسے چھوٹے اور آسان کاموں کا چسکہ لگ جائے وہ بڑے کاموں کا ذوق وشوق کھو بیٹھتا ہے۔
تعلقات کی بھیڑ، مسائل کے ہجوم اور معلومات کے اژدحام میں دل کے تھکنے، ناتواں ہونے اور اپنا اصل کام بھول جانے کے اندیشے بڑھ جاتے ہیں، ایسے میں اسے تنہائی مہیا کرنا اور اس سے مل کر مطلوب غذا اور مناسب علاج وریاض فراہم کرتے رہنا ازحد ضروری ہے۔ دل زندہ اور صحت مند ہو، کشادہ اور نرم ہو، صاف اور پاکیزہ ہو، درد مند اور بلند حوصلہ ہو، بندوں کے لئے تڑپنے والا اور اللہ سے لو لگانے والا ہو، اس کی فکر ہر بندہ مومن کو ہر وقت رہنی چاہئے۔ ألا بذکر اللہ تطمئن القلوب۔

قرآن مجید، علمی اور فکری منصوبوں کا مخزن



قرآن مجید، علمی اور فکری منصوبوں کا مخزن
محی الدین غازی
(جنوبی ہند کی عظیم درس گاہ جامعہ دار السلام عمراباد کے طلبہ کا سالانہ جلسہ ہوا، اہل جامعہ کی محبت ناچیز کو جلسے کی کرسی صدارت تک کھینچ لے گئی، جامعہ کا منفرد علمی ماحول، اور طلبہ کی دھن، لگن اور صلاحیتیں دیکھ کر ایک اہم موضوع پر گفتگو کرنے کا داعیہ پیدا ہوا، عام قارئین کے فائدے کے لئے اسے تحریری شکل میں پیش کیا جاتا ہے)
قرآن مجید علوم ومعارف کا بہت بڑا مخزن ہے، زمین کو حسین اور زندگی کو کامیاب بنانے والے بے شمار علمی وفکری منصوبے (projects) اس مخزن سے حاصل کئے جاسکتے ہیں، قرآن مجید میں مذکور ہر منصوبہ اپنے آپ میں اتنا عظیم اور اس قدر مفید ہے کہ بڑے اطمینان کے ساتھ اس کے لئے اپنی پوری زندگی وقف کی جاسکتی ہے، ان منصوبوں کی تکمیل میں حصہ لینے سے علم ومعرفت کے میدان میں زبردست پیش رفت ہوسکتی ہے۔
اگر ’’واستعینوا بالصبر‘‘ کی رو سے صبر سے مدد حاصل کرنا مطلوب ہے، تو یہ بھی ضروری ہے کہ بہت سے دماغ اس تلاش میں سرگرم ہوجائیں کہ صبر کے ذریعہ زندگی کے مسائل کیسے حل کئے جاتے ہیں، نیک مقاصد کی راہ میں حائل رکاوٹیں کیسے دور کی جاتی ہیں اور قدم قدم پر کامیابی کی منزلیں کیسے سر کی جاتی ہیں۔
اگر ’’فأصلحوا بین أخویکم‘‘ کی رو سے افراد کے درمیان تعلقات کو بہتر بنانا مطلوب ہے، تو تعلقات بہتر بنانے کا فن دریافت کرنا اور اس کے لاتعداد پہلووں کا احاطہ کرنا اہل ایمان کی تگ ودو کا موضوع بن جانا چاہئے۔
اگر ’’وأمرھم شوری بینھم‘‘ کا تقاضا ہے کہ مسلمانوں کے فیصلے مسلمانوں کے مشورے سے ہوا کریں، تو لازم ہے یہ کھوج کرنا کہ زندگی کے ہر شعبہ میں شورائی مزاج، شورائی نظام اور شورائی کلچر کو کس طرح فروغ دیا جائے۔
(وقل لھم فی أنفسھم قولا بلیغا) ’’اور ان سے وہ بات کہو جو ان کے دل میں اتر جانے والی ہو‘‘حق بات کس طرح کہی جائے کہ وہ من کی دنیا میں پہونچے اور دل کے شہر میں جا بسے، یہ اہل علم کے غور وفکر اور تحقیق ودریافت کے لئے اہم موضوع ہے۔ ’’وقل لھم فی أنفسھم قولا بلیغا‘‘ ایک بہت بڑے منصوبے کا عنوان ہے جس پر جس قدر علمی وفکری محنت کی جائے کم ہے۔ اگر ’’وقل لھم فی أنفسھم قولا بلیغا‘‘ کی رو سے بات کو موثر بنانا مطلوب ہے، تو بات کیسے موثر بنائی جائے، یہ جاننا بھی ضروری ہے، اور یہ موضوع بہت سی دماغی کاوشوں کا محور بن جائے یہ بھی مطلوب ہے۔
قرآن مجید میں ایسے بے شمار عنوانات ہیں، ہر عنوان ایک بڑے علمی وفکری منصوبے کو جنم دینے کی صلاحیت رکھتا ہے۔ جن حوصلہ مند ذہین انسانوں کو اپنے دماغ کسی عظیم منصوبے کے لئے وقف کردینے کا شوق ہو، وہ قرآن مجید سے ایک بڑا منصوبہ حاصل کرکے اپنے دماغ کو کارآمد اور اپنی زندگی کو بامعنی بناسکتے ہیں۔
امت کی ضرورتوں کی تکمیل کے لئے بھی اور ساری انسانیت کو خیر کے چشموں سے سیراب کرنے کے لئے بھی لازم ہے کہ قرآن مجید سے علمی اور فکری منصوبے اخذ کئے جائیں، اور ہر منصوبہ کی تکمیل کے لئے آفاق وانفس کا گہرا مطالعہ کیا جائے۔ اور جس منصوبے پر کام کیا جائے، اس طرح کیا جائے کہ وہ اقوام عالم کے لئے بے مثال اور قابل رشک بن جائے۔
آفاق وأنفس کی ایک حیثیت یہ ہے کہ وہ دلائل کا خزانہ ہیں، ان دلائل سے عالم غیب کی عظیم حقیقتوں کے سلسلے میں اطمینان حاصل ہوتا ہے۔ آفاق وأنفس کی نشانیوں سے آگاہی لینا، ان پر مسلسل غور وفکر کرتے رہنا اور ان سے دل ودماغ کو ایمان ویقین کی غذا فراہم کرنا بہت اہم ہے، ان نشانیوں سے غفلت ہوجائے تو سارا علم بے سود اور سارا عمل اکارت ہوجاتا ہے۔
لا تعداد واضح دلائل اور بے پناہ روشن نشانیوں کے ساتھ ساتھ آفاق وأنفس میں علوم معارف کے عظیم خزانے بھی پوشیدہ ہیں۔ نشانیوں سے غیبی حقائق پر ایمان کی دولت حاصل ہوتی ہے، تو علوم ومعارف سے قرآن مجید میں مذکور علمی منصوبوں کی تکمیل ہوتی ہے۔ دونوں جہتوں کی بہت اہمیت ہے۔ اور اہل ایمان کے شایان شان ہے کہ وہ دونوں ہی جہتوں میں امتیازی درجے کی پیش قدمی کریں۔
طالبان علم کے لئے لازم ہے کہ قرآن مجید میں مذکور علمی منصوبوں کی طرف اپنی توجہ مبذول کریں، آفاق میں پنہاں علوم ومعارف سے دل ودماغ کو مانوس کریں، اور نفس انسانی میں سربستہ اسرار سے پردہ اٹھانے کا ذوق پیدا کریں، اور اس راہ میں انسانی مشاہدات وتجربات سے بھی حتی المقدور فائدہ اٹھائیں۔ احساس ہوتا ہے کہ قرآن مجید سے علمی وفکری منصوبے حاصل کرنے اور آفاق وأنفس کا مطالعہ کرکے ان منصوبوں کی تکمیل کرنے کی طرف افراد امت کی توجہ بہت کم رہی ہے، ورنہ امت علمی وفکری افلاس کا اس بری طرح شکار نہیں ہوتی، اور ایسا بھی نہیں ہوتا کہ جن عنوانات پر قرآن مجید کی ترغیب وتاکید موجود ہے، ان پر بھی دوسروں کی علمی وفکری کاوشیں امت کی کاوشوں سے کہیں زیادہ ہوجائیں۔
غوروفکر اور بحث وتحقیق کے لئے عظیم منصوبوں کے بے شمار عنوانات قرآن مجید میں تاقیامت محفوظ رہیں گے، اور آفاق وأنفس میں پنہاں معلومات کے خزانے بھی دعوت مطالعہ دیتے رہیں گے۔ علمی فتوحات کا شوق رکھنے والوں کے لئے پہلے بھی موقعہ تھا کہ وہ اپنی زندگیاں ان منصوبوں کے لئے وقف کریں، اور آج بھی بھرپور موقعہ ہے۔

قرآن مجید پڑھیں اور قرآن مجید سے سیکھیں

قرآن مجید پڑھیں اور قرآن مجید سے سیکھیں
محی الدین غازی
مسلمان قرآن مجید سے قریب ہوکر بھی کس قدر دور ہیں، اور ان کا قرآن مجید کے ساتھ اجنبیت کا کیسا رویہ ہے، اسے معروف مفکر علامہ محمد غزالی نے ایک چھوٹے جملے میں بیان کردیا، وہ کہتے ہیں: ہم پڑھنے کے لئے سیکھتے تو ہیں، لیکن سیکھنے کے لئے پڑھتے نہیں ہیں۔ نتعلم لنقرأ، ولا نقرأ لنتعلم۔ اس ایک جملے میں مرض کی تشخیص بھی ہے اور علاج کی تدبیر بھی ہے۔
لوگ یہ تو سمجھتے ہیں کہ قرآن مجید پڑھنے کی کتاب ہے اس لئے پڑھنا سیکھ لیتے ہیں، وہ ناظرہ بھی سیکھ لیتے ہیں، عربی زبان بھی سیکھ لیتے ہیں، نحو اور بلاغت بھی سیکھ لیتے ہیں۔ لیکن سب کچھ سیکھ کر یہ بھول جاتے ہیں کہ قرآن مجید بار بار پڑھ کر بہت کچھ سیکھنے کی کتاب ہے، بندگی کا طریقہ اور زندگی کا سلیقہ، آخرت بنانے کا فن اور دنیا سنوارنے کا ہنر، حکمت کے نسخے اور انکشاف کے فارمولے، صحیح نقطہ نظر اور درست طرز عمل، بہترین انداز بیان اور اعلی طریق استدلال اور وہ سب کچھ جو دنیا وآخرت کی کامیابی اور سرخ روئی کے لئے ضروری ہے۔
افسوس کہ قرآن مجید بار بار پڑھنے والے اور ایک ماہ میں کئی بار ختم کرنے والے بھی بسا اوقات قرآن مجید سے کچھ سیکھنے کی نعمت سے محروم رہ جاتے ہیں۔ وجہ یہی ہے کہ ہم قرآن مجید پڑھنا سیکھ لینے کے بعد پڑھتے تو ہیں، لیکن سیکھنے کے لئے نہیں پڑھتے ہیں، صرف پڑھنے کے لئے پڑھتے ہیں۔ جب کہ قرآن مجید تلاوت کے لئے بھی بہترین کتاب ہے اور زندگی کے قیمتی راز اور انمول نسخے جاننے کے لئے بھی بہترین کتاب ہے۔ نہ ایسی کوئی اور کتاب تلاوت ہے، نہ ایسی کوئی اور کتاب ہدایت ہے۔
قرآن مجید کی آیتوں پر غور وفکر کے تعلق سے ایک بڑے عالم وزیر ابن ھبیرہ نے بڑے پتے کی بات کہی اور بڑی جرأت کے ساتھ کہی، ایسی جرأت کے نمونے ہمیں بڑی مشکل سے ملتے ہیں، وہ کہتے ہیں: شیطان کی ایک چال یہ ہوتی ہے کہ وہ اللہ کے بندوں کو قرآن مجید پر غور کرنے سے برگشتہ کردیتا ہے، شیطان اچھی طرح جانتا ہے کہ تدبر کرنے سے ہدایت حاصل ہوجاتی ہے، اس لئے وہ لوگوں کو ورغلاتا ہے کہ قرآن مجید میں تدبر کرنا بڑے خطرے کا کام ہے، آیتوں کا غلط مفہوم سمجھ کر بہک جانے کا امکان رہتا ہے، اس لئے تدبر سے دور رہو، چنانچہ شیطان کے بہکاوے میں آکر انسان کہنے لگتا ہے کہ میں پرہیزگار ہوں اس لئے قرآن کے حوالے سے کوئی بات نہیں کہوں گا۔ من مكايد الشيطان تنفيره عباد الله من تدبر القرآن لعلمه أن الهدى واقع عند التدبر، فيقول: هذه مخاطرة، حتى يقول الإنسان: أنا لا أتكلم في القرآن تورعا.
جہاں تہاں یہ بات بھی سنی جاتی ہے کہ ’’عام لوگ قرآن مجید سمجھنے کی کوشش کریں تو بہک سکتے ہیں، اور بہک کر گمراہ بھی ہوسکتے ہیں۔ اس لئے آدمی قرآن مجید کی تلاوت تو خوب کرے، لیکن اسے خود سے سمجھنے اور اس پر تدبر کرنے کا خطرہ مول نہ لے‘‘ یہ بے بنیاد اندیشہ اور ایسا غلط مشورہ اس شخص کے ذہن میں تو آسکتا ہے جو قرآن مجید سے ذرا بھی واقف نہیں ہو، لیکن جو قرآن مجید سے تھوڑا بھی واقف ہوچکا ہو وہ اچھی طرح سمجھ سکتا ہے کہ یہ اندیشہ یکسر باطل ہے۔ قرآن مجید تو اصل میں ہدایت کی کتاب ہے، اور انسانوں کی ہدایت کے لئے ہی نازل ہوئی ہے۔ یہ ناممکن ہے کہ ایک شخص ہدایت کی نیت سے قرآن مجید پڑھے، اس پر غور کرے اور پھر گمراہ ہوجائے۔ یہ اللہ کے وعدے کے بھی خلاف ہے، اور قرآن مجید کی شان کے بھی منافی ہے۔ یہ تو ممکن ہے کہ کوئی سائل حاتم طائی کے دروازے سے خالی ہاتھ لوٹ جائے، لیکن یہ ممکن نہیں ہے کہ کوئی بندہ قرآن مجید میں ہدایت تلاش کرے اور اس کے ہاتھ گمراہی آجائے۔
قرآن مجید پڑھنے سے صرف ان لوگوں کی مشکلات میں اضافہ ہوسکتا ہے، جو گمراہی کے پرستار ہوں، اور اپنی گمراہی کو بڑھانے کے لئے قرآن مجید کی من مانی تاولیں کرتے ہوں، ایسے بدنصیب لوگ اپنی بدنیتی اور نفس پرستی کی وجہ سے قرآن مجید پڑھتے ہوئے بھی جادہ حق سے دور ہوتے چلے جائیں تو تعجب کی بات نہیں۔
قرآن مجید تدبر کی کتاب اور ہدایت کا سرچشمہ ہے، یہ بات قرآن مجید پر ایمان کا دعوی کرنے والوں کو معلوم ہو یا نہ ہو شیطان مردود کو اچھی طرح معلوم ہے، اس لئے وہ کسی طور اللہ کے بندوں کو قرآن مجید سے قریب ہوتے نہیں دیکھ سکتا ہے۔ وہ بڑی عیاری کے ساتھ قرآن مجید میں غوروفکر کو ایک خطرناک چیز بناکر پیش کرتا ہے۔ حقیقت یہ ہے کہ قرآن مجید خطرناک کتاب نہیں بلکہ خطروں سے بچانے والی کتاب ہے۔ اگر ایسی کوئی جائے امان ہے جہاں پہونچ کر دل ودماغ بالکل محفوظ ومامون ہوجائیں اور بھرپور اطمینان وراحت محسوس کریں تو وہ قرآن مجید ہے۔
علامہ ابن ھبیرہ نے ایک زبردست حقیقت بیان کی، وہ یہ کہ کبھی انسان کسی راستے کو پرہیزگاری کا راستہ سمجھ کر اختیار کرتا ہے، جب کہ وہ محض شیطان کا بہکاوا ہوتا ہے۔ اس لئے ضروری ہے کہ احتیاط بھی قرآن مجید سے سیکھی جائے اور پرہیزگاری کے معیارات بھی قرآن مجید میں تلاش کئے جائیں۔ اگر قرآن مجید ساری انسانیت کو اپنی آیتوں پر تدبر کی دعوت دیتا ہے، اور بار بار تدبر کی دعوت دیتا ہے، تو اہل اسلام کی ایک بھاری اکثریت کا قرآن مجید پر تدبر نہ کرنا، اور خود ساختہ شرطیں عائد کرکے تدبر کے عمل کو مشکل بنادینا تقوی اور پرہیزگاری کیسے قرار پاسکتا ہے۔
قرآن مجید پر تدبر کے لئے قرآن مجید کی ٖغیر معمولی عظمت ووسعت کا یقین ضروری ہے۔ قرآن مجید کا اعجاز یہ ہے کہ اللہ پاک نے علم وحکمت کی ایک بڑی کائنات کو ایک کتاب میں سمو دیا ہے، اور قرآن مجید میں تدبر یہ ہے کہ اس ایک کتاب میں اس بڑی کائنات کو دیکھنے کی کوشش کی جائے۔ کتاب الہی کو دینی معلومات کی محض ایک کتاب نہیں بلکہ حکمت ومعرفت کی ایک لامتناہی کائنات سمجھا جائے۔ سمندر کو کوزے میں بند کردیا گیا ہو تو دیکھنے والے کو اس کوزے میں سمندر ہی دیکھنا چاہئے صرف کوزہ نہیں۔ یہی دانائی ہے اور یہی تدبر کی روح ہے۔

اختلافات کو بڑا کرکے دکھانا بڑی غلطی ہے

اختلافات کو بڑا کرکے دکھانا بڑی غلطی ہے
محی الدین غازی
اختلاف ہونا اچھی بات بھی ہوسکتی ہے، اور بری بات بھی ہوسکتی ہے، لیکن کسی اختلاف کے سامنے مکبر شیشہ Magnifying Glass رکھ کر اسے کئی گنا بڑا کرکے دکھانا یقینا بہت بری بات ہے۔ میں سمجھتا ہوں کہ امت کا زیادہ گمبھیر مسئلہ اختلافات نہیں ہیں، بلکہ ہر اختلاف کو بہت بڑا کرکے دیکھنا اور دکھانا ہے۔
ایک مسجد میں محراب کے پاس بڑے حرفوں میں لکھا تھا ’’حی علی الصلاۃ سن کر کھڑا ہونا سنت ہے، اور اس سے پہلے کھڑے ہوجانا مکروہ ہے‘‘ صحیح بات یہ ہے کہ حی علی الصلاۃ سن کر کھڑے ہونا سنت کے خلاف نہیں ہے، لیکن اس سے پہلے کھڑے ہوجانا مکروہ بھی نہیں ہے، ہاں تنوع کے اختلاف کو تضاد کا اختلاف بناکر دکھانا ضرور ایک ناپسندیدہ کام ہے، یہ دراصل ایک معمولی سے بھی کم درجے کے اختلاف کو کئی ہزار گنا بڑا کرکے پیش کرنا ہے۔
جاحظ، اسلامی تاریخ کا ایک زبردست تذکرہ نگار ہے، اس نے خلیفہ مامون رشید کا ایک واقعہ ذکر کیا کہ خراسان کے ایک عیسائی پادری نے اسلام قبول کیا، اس کے کچھ عرصے بعد وہ مرتد ہوکر دوبارہ عیسائی ہوگیا، مامون رشید نے اسے اپنے دربار میں طلب کیا اور اس سے بڑے ہی نرم اور ہمدردانہ لہجے میں اسلام سے لوٹ جانے کا سبب دریافت کیا، اس نے کہا، آپ لوگوں کے درمیان اتنے زیادہ اختلافات دیکھ کر میں متنفر اور بیزار ہوگیا ہوں۔ (أوحشني كثرة ما رأيت من الاختلاف فيكم)
مامون رشید نے اسے بتایا کہ ہمارے یہاں دو طرح کے اختلافات ہیں، ایک تو اس طرح کا اختلاف ہے جیسے اذان اور جنازے کی تکبیروں میں، تشہد کے الفاظ میں، عیدین کی نمازوں اور ایام تشریق کی تکبیروں میں، اسی طرح قرأتوں وغیرہ میں، تو یہ دراصل اختلاف ہے ہی نہیں، بلکہ یہ تو اختیار وگنجائش اور سہولت وکشادگی کی بات ہے، کوئی اقامت میں الفاظ کو دو دو بار ادا کرتا ہے تو کوئی ایک ایک بار، اور اس میں کوئی کسی کو نہ تو غلط قرار دیتا ہے اور نہ اس پر نکتہ چینی کرتا ہے۔ دوسرا اختلاف اس طرح کا ہے جیسے قرآن پاک کی کسی آیت کی تفسیر میں یا نبی پاک کی کسی حدیث کی تشریح میں اختلاف ہوجائے، ہمارے یہاں یہ اختلاف ضرور ہے لیکن ساتھ ہی یہ حقیقت بھی ہے کہ کتاب وسنت کی حقانیت اور ان کی اساسی حیثیت پر ہم سب اتفاق رکھتے ہیں۔ اگر اس طرح کا اختلاف ہمارے دین سے تنفر کی وجہ بنا ہے، تو دنیا میں تو کوئی کتاب ایسی نہیں ہے خواہ وہ تورات ہوانجیل ہو یا کوئی اور کتاب ہو، جس کے الفاظ کی تفسیر اور مفہوم کی تعبیر میں اختلاف نہیں ہوتا ہو، بلکہ دنیا میں کوئی زبان ایسی نہیں ہے جس کے الفاظ کے معنی میں اختلاف کی گنجائش نہیں ہو، اگر اللہ چاہتا تو اپنی کتاب اور اپنے رسولوں کے کلام کو اس طرح بنادیتا کہ ہمیں تفسیر وتشریح کی محنت کے بغیر مطلوب رہنمائی مل جاتی لیکن ہم دیکھتے ہیں کہ دین ودنیا کی کوئی چیز ہم کو اس طرح نہیں ملی ہے کہ ہمیں اس کے لئے کوئی محنت نہیں کرنا پڑے، اگر ایسا ہو تو امتحان اور مسابقت کا تصور ہی نہیں رہ جائے، اللہ تعالی نے اس طرح دنیا کی بنا رکھی ہی نہیں ہے۔
تذکرہ نگار کے مطابق اس وضاحت سے وہ شخص مطمئن ہوکر دوبارہ دائرہ اسلام میں داخل ہوگیا۔ (تفصیلات کے لئے ملاحظہ ہو، جاحظ کی کتاب البیان والتبیین)۔ واقعہ میں نصیحت کا پہلو یہ ہے کہ وہ شخص اسلام سے اس لئے متنفر ہوگیا تھا کیونکہ اس نے اختلافات کے بڑھے ہوئے حجم کو دیکھا تھا، جب اس کے سامنے اختلافات کا حقیقی حجم آیا تو اس کی وحشت دور ہوگئی۔
امت کے اختلافات کو ان کے حقیقی سائز میں دیکھنا ضروری ہے، جب یہ اختلافات اپنے حقیقی سائز میں نظر آئیں گے تو اضطراب اور بے چینی بھی نہیں ہوگی، اور اتفاق واتحاد کے لئے راستے بھی کھلیں گے۔ لیکن ان اختلافات کو جب بڑا کرکے دیکھنے یا دکھانے کی کوشش کی جاتی ہے تو اس کے بہت بھیانک نتائج سامنے آتے ہیں، ایسی صورت میں کچھ لوگ ان اختلافات کے بڑے سائز سے متاثر ہوکر ایک دوسرے کو کافر اور گمراہ قرار دینے پر اتر آتے ہیں، اور امت کے اندر تکفیری رجحانات جنم لیتے ہیں۔ اور کچھ لوگ پورے دین اور ساری امت سے بدگمان ہوکر خود دین بیزاری اور ارتداد کا راستہ اختیار کرلیتے ہیں۔
ہمارے درمیان ایسے بہت سارے اختلافات ہیں جنہیں بہت بڑا اختلاف سمجھا جاتا ہے مگر وہ حقیقت میں اتنے بڑے ہوتے نہیں ہیں، ایک شہر میں تقلید اور بے تقلیدی کا جھگڑا اتنا بڑھا کہ لوگوں نے دیواروں پر ایک دوسرے کے خلاف لکھنا شروع کردیا، ایک نے لکھا ’’بے تقلیدی کفر کا زینہ ہے‘‘، تو دوسرے نے لکھا ’’تقلید عین کفر ہے‘‘، جبکہ واقعہ یہ ہے کہ فقہی مسائل میں نہ تقلید عین کفر ہے، اور نہ بے تقلیدی کفر کا زینہ ہے، بلکہ عام طور سے جن فقہی امور ومسائل میں تقلید اور بے تقلیدی ہوتی ہے، ان امور ومسائل سے اصل زندگی پر کوئی قابل ذکر اثر واقع ہی نہیں ہوتا ہے۔ قرآن مجید میں رحمان کے بندوں کی صفات بتائی گئی ہیں، اور کامیاب ہونے والے مومنوں کی بھی صفات ذکر کی گئی ہیں، کہیں اختصار کے ساتھ اور کہیں خوب تفصیل سے، تاہم نوٹ کرنے کی بات یہ ہے کہ ان صفات کو اختیار کرنے میں نہ تقلید روڑا بنتی ہے، اور نہ بے تقلیدی رکاوٹ بنتی ہے۔ میں نے اسلامی تاریخ کا مطالعہ کرتے ہوئے عظیم مسلمانوں کی فہرست میں مقلدین کو بھی پایا ہے اور غیر مقلدین کو بھی پایا ہے۔

تکلیف اگر ایک بار تو احساس کیوں بار بار؟

تکلیف اگر ایک بار تو احساس کیوں بار بار؟
محی الدین غازی
پردیس میں رہنے والی بعض ہندوستانی خواتین کے بارے میں ایک دلچسپ بات معلوم ہوئی کہ انہیں شادی کے بعد ماہ دو ماہ یا سال دو سال سسرال میں رہنا پڑا، اس کے بعد وہ ملک کو الوداع کہہ کر پردیس آگئیں، اور گذشتہ پندرہ بیس سال سے ان کا یہیں قیام ہے، دو تین سال میں ماہ دو ماہ کے لئے وطن جانا ہوتا ہے، اور ہفتہ دو ہفتہ سسرال میں بھی رہنے کا موقعہ نکل آتا ہے۔ تاہم وطن سے دور سمندر پار رہتے ہوئے آج بھی ان کی گفتگو کا خاص موضوع سسرال والوں کی شکایتیں ہوا کرتا ہے، سسرال میں ملنے والے طعنوں کا ذکر کرتے ہوئے ان کے چہرے پر اداسی کا گہرا رنگ چھاجاتا ہے اور ان کے لہجے سے ٹپکتے ہوئے درد کو دیکھ کر ایسا لگتا ہے کہ سسرال کے تعذیب خانے سے بس ابھی ابھی تھوڑی دیر کے لئے نکل کر اپنا دکھڑا سنانے آئی ہیں۔
میں کہتا ہوں، تھوڑی دیر کے لئے مان لیتے ہیں کہ آپ کے یہ دکھ درد کے سارے قصے سچے ہیں، اور واقعی آپ کی ساس نے آپ کے ساتھ بڑی سختی روا رکھی تھی، اور آپ کو سسرال میں میکے کے مقابلے میں بہت زیادہ کام کرنے پڑگئے تھے، ممکن ہے وہاں آپ کو نندوں کے طعنے واقعی سننے کو ملے تھے، تاہم اب تو آپ سکون اور راحت کی زندگی گزار رہی ہیں، آخر بہت پہلے گزرے زمانے کی جھوٹی سچی تلخ یادوں کو تازہ کرکے دل کو میلا اور طبیعت کو بدمزہ رکھنے کا اب کیا جواز ہے۔
دراصل یہ ایک غلطی ہے، جو ہم میں سے بہت سارے لوگوں سے بہت زیادہ سرزد ہوا کرتی ہے، اور ہم محسوس بھی نہیں کرپاتے کہ اس ایک غلطی کے نتیجہ میں ہم اپنے دل کو کس قدر اذیت میں مبتلا رکھتے ہیں۔ ہوتا یہ ہے کہ ہم کو تکلیف ایک بار پہونچتی ہے اور ہم اس کو سو بار محسوس کرکے اپنے دل ودماغ کو سو بار تکلیف دیتے ہیں۔ اصل تکلیف سے دل میں ایک چھید ہوتا ہے، مگر ہم اسی چھید کی بے شمار نقلیں تیار کرکے پورا دل چھلنی کرلیتے ہیں۔
زبان کے زخم ہوں، یا پتھر اور تلوار کے زخم ہوں، ترقی کا کوئی موقعہ ہاتھ سے نکل گیا ہو، یا تجارت میں کوئی نقصان ہوگیا ہو، غیروں نے دھوکہ دے دیا ہو، یا اپنوں نے وشواس گھات کیا ہو۔ کسی بھی تکلیف کو بار بار یاد کرنا نہ جسم کی صحت کے لئے اچھا ہے اور نہ دل کی صحت کے لئے۔
مان لیتے ہیں کہ بعض تکلیفیں ایسی دائمی قسم کی ہوتی ہیں کہ دل کا روگ بن جاتی ہیں اور ان سے چھٹکارا پانا آدمی کے بس میں نہیں ہوتا ہے، لیکن اکثر تکلیفیں ایسی ہوتی ہیں کہ تھوڑی ہی دیر میں ان کو ہمیشہ کے لئے بھلادینا ممکن ہوتا ہے۔ سچ یہ ہے کہ زیادہ سے زیادہ تکلیفوں کو بھولتے رہنا ہی ہمارے دل کی صحت اور خیالات کی پاکیزگی کے لئے اچھا ہے۔
کہنے والوں نے تو یہاں تک کہا ہے کہ دوسروں کی زبانوں سے نکلنے والے لفظوں کے تیر تمہارے کان میں تو داخل ہوکر کچھ سمع خراشی کرسکتے ہیں، لیکن تمہاری مرضی کے بغیر تمہارے دل کو زخمی نہیں کر سکتے ہیں، اس بات میں صداقت ہے، انسان کو اللہ نے غیر معمولی قوتوں سے نوازا ہے، وہ چاہے تو زہر میں بجھے ہوئے کسی تیر کی ایک خراش بھی اپنے دل پر نہ آنے دے۔
تاہم اگر کوئی شخص اتنا طاقت ور اور زیرک نہیں ہو، تو بھی اسے اتنا سمجھ دار تو ضرور ہونا چاہئے کہ ایک تکلیف دہ بات کی تکلیف کو ایک بار ہی محسوس کرے۔ اسے بار بار محسوس کرکے اپنی زندگی کو خود اپنے لئے عذاب بنانا دانش مندی تو نہیں ہے۔ دل میں تو یہ صلاحیت بھی ہوتی ہے کہ وہ تکلیف کو کافی کم کرکے یا کئی گنا زیادہ کرکے محسوس کرے۔ ہم دل کے ساتھ مجاہدہ کریں تو بڑی بات کی تکلیف کو بھی ہمارا دل کم کرکے محسوس کرے، اور ڈھیل دے دیں تو معمولی بات کو وہ غم کا پہاڑ بنالے۔
ہم سے اکثر ایک غلطی اور ہوتی ہے، وہ یہ کہ اگر ایک تکلیف صرف ہمیں پہونچتی ہے، تو ہم اپنے چاہنے والوں سے بتا کرکے انہیں بھی تکلیف میں مبتلا کردیتے ہیں، اس طرح تکلیف ایک ہوتی ہے، اور اس سے کئی دلوں کو کئی بار متاثر ہونا پڑتا ہے۔ حالانکہ ہم چاہیں تو وہ تکلیف صرف ہمارے دل کو محسوس ہو، اور صرف ایک بار محسوس ہو۔ غم بانٹنے کا مطلب یہ تو نہیں ہے کہ اپنے دکھوں کی اوریجنل کاپی اپنے پاس محفوظ رکھی جائے، اور اس کی ڈپلیکیٹ نقلیں تیار کرکے سب چاہنے والوں کو تقسیم کرتے رہیں، اس طرح آپ کی تکلیف تو ذرا کم نہیں ہوتی ہے، البتہ دوسروں کی تکلیفوں میں اضافہ ضرور ہوجاتا ہے۔
اس دنیا کو سجانے اور سنوارنے کا ایک گر یہ بھی ہے، کہ تکلیف دہ باتوں کو جلدی جلدی بھولتے رہا جائے، انہیں نہ دل میں بسنے کا موقعہ دیا جائے، اور نہ زبان پر ٹہلنے کی اجازت دی جائے۔ دوسری طرف خوشی کی باتوں کو موقعہ دیا جائے کہ وہ زیادہ سے زیادہ پھلیں پھولیں، اور ان کا زیادہ سے زیادہ چرچا ہو۔
اللہ کے رسول صلی اللہ علیہ وسلم کو جس قدر تکلیف دہ باتوں کا سامنا کرنا پڑا، اس کا ہم تصور بھی نہیں کرسکتے، لیکن اللہ پاک کی آپ کو ہدایت تھی کہ آپ لوگوں کی تکلیف دہ باتوں کو یکسر نظر انداز کرتے رہیں (ودع اذاھم)، اور آپ زندگی بھر اس ہدایت پر عمل کرتے ہوئے صبر وتحمل کا حسین پیکر بنے رہے۔ یقینا اللہ کے رسول کی سیرت میں ماننے اور چاہنے والوں کے لئے بہترین نمونہ ہے۔

شکایتیں دور کریں اور شکایتوں سے دور رہیں

شکایتیں دور کریں اور شکایتوں سے دور رہیں
محی الدین غازی
جب ہم ساتھ رہتے ہیں، تو ساتھ رہنے کے مزے تو ملتے ہی ہیں، ساتھ ہی کچھ شکایتیں بھی پیدا ہوجاتی ہیں، عام طور سے یہ شکایتیں بہت چھوٹی ہوتی ہیں، اتنی چھوٹی کہ ان کا بیان سننے پر ہنسی آجاتی ہے، لیکن چھوٹی چھوٹی شکایتیں جمع ہوجانے پر بہت بڑی لگنے لگتی ہیں، اتنی بڑی کہ اچھے خاصے تعلقات کو ختم کرنے کا سبب بن جاتی ہیں، شکایتوں کو جمع کرتے رہنا، اور پھر ان سے انڈے بچے دلانا دانائی نہیں ہے۔ نیکی اور دانائی یہ ہے کہ دوسروں کی شکایتیں دور کرتے رہیں، اور اپنی شکایتیں صاف دل سے بھلاتے رہیں۔ دانشمندی یہ بھی ہے کہ ساتھ رہنے کے مزے یاد رکھیں اور ساتھ رہنے کی تکلیفیں بھولتے رہیں۔
سمجھ دار لوگ شکایت کی ہر اکائی کو الگ کرکے دیکھتے ہیں، چونکہ ہر شکایت اپنے آپ میں چھوٹی ہوتی ہے، اس لئے وہ ایسی کسی بھی شکایت کا دل پر اثر نہیں لیتے ہیں۔ ناسمجھ لوگ شکایتوں کے پورے پلندے کو اپنے ساتھ ڈھوتے رہتے ہیں، اور اسی لئے تعلقات کا بوجھ نہیں اٹھا پاتے ہیں۔
یوں تو شکایتیں ہر طرح کے رشتے داروں اور تعلق والوں کے بیچ پیدا ہوسکتی ہیں، تاہم شکایتوں کی دو صورتیں مجھے بہت مشکل معلوم ہوتی ہیں، ایک وہ صورت جب بیوی شوہر سے اس کے والدین کی کسی زیادتی کی شکایت کرے، اور دوسری وہ صورت جب والدین بیٹے سے اس کی بیوی کے کسی خراب رویہ کی شکایت کریں۔ بہت سے گھروں میں آپسی جھگڑوں اور نااتفاقیوں کا بڑا سبب یہی دو طرح کی شکایتیں ہوا کرتی ہیں۔
غور وفکر کے بعد میری رائے یہ بنی ہے کہ جہاں تک ہوسکے نہ تو بیوی ساس سسر کی شکایت شوہر سے کرے، اور نہ والدین بہو کی شکایت بیٹے سے کریں۔ والدین کو معلوم ہونا چاہئے کہ اکثر اوقات شوہر اپنی بیوی کے سامنے بے بس ہوتا ہے۔ بیوی کو بھی سمجھنا چاہئے کہ بیٹا والدین کے سامنے کتنا بے اختیار ہوتا ہے۔ اس پر مزید شوہر کی یہ دلی خواہش کہ اسے بیوی بچوں کی رفاقت بھی حاصل رہے، اور والدین کا سایہ بھی سر پر قائم رہے۔
شوہر بیوی کی شکایتیں سن کر اگر اپنے والدین کی اصلاح کی کوشش کرتا ہے تو اکثر والدین ناراض ہوجاتے ہیں، اور اگر بیوی کی شکایتیں سنی ان سنی کرتا ہے تو بیوی ناخوش رہنے لگتی ہے۔ اسی طرح والدین بھی جب بیٹے سے بہو کی شکایت کرتے ہیں، تو شوہر یا تو بیوی کو سمجھانے کی کوشش کرتا ہے، جس کے نتیجے میں بیوی اکثر آگ بگولا ہوجاتی ہے، یا بیوی سے تعلقات بنائے رکھنے کے لئے خاموشی اختیار کرتا ہے، تو والدین روٹھے روٹھے رہنے لگتے ہیں۔ غرض شوہر کی زندگی اجیرن ہوجاتی ہے، اور وہ بیچارہ ذہنی تناؤ کا شکار رہنے لگتا ہے، اور پھر گھر میں کوئی خوش نہیں رہتا ہے۔
کیا ہم دوسروں سے پہونچنے والی تکلیفوں کو نظر انداز کرسکتے ہیں؟ اس کا جواب یہ ہے کہ ہم اپنی روزمرہ کی زندگی میں بہت ساری تکلیفوں کا خاموشی سے سامنا کرتے ہیں اور ان کی شکایت نہیں کرتے ہیں، جیسے کبھی شدید سردی یا سخت گرمی ہوتی ہے، یا زیادہ بارش ہوجانے سے راستے چلنے کے قابل نہیں رہتے، یا بچہ رو رو کر رات بھر سونے نہیں دیتا ہے، یا سڑک پر ٹریفک چلتے چلتے رک جاتی ہے۔ اس سے ہمیں ایک قیمتی اصول ملتا ہے کہ جب ایسا لگے کہ شکایت کرنے سے تکلیف دور نہیں ہوگی بلکہ اور بڑھ جائے گی، تو ہم اس کی شکایت ہی نہ کریں۔ اور اسے بھی انہی اضطراری حالتوں کے خانے میں ڈال دیا کریں جن کو ہماری شکایت دور نہیں کرتی ہے اور اسی لئے ہم ان کی شکایت بھی نہیں کرتے ہیں۔ ہاں جہاں ظلم بہت صریح ہو، یا غم بہت شدید ہو تو سب سے اچھا یہ ہے کہ اللہ سے مناجات کرلی جائے، (وأشکو بثي وحزني الی اللہ)۔ دل بھی ہلکا ہوگا، اور اللہ کی مدد بھی آئے گی۔
شوہر کو چاہئے کہ وہ بیوی کے خلاف والدین کی یا والدین کے خلاف بیوی کی شکایتیں سننے کے بعد کسی جذباتیت کا شکار نہ ہو، اور نہ فوری ردعمل ظاہر کرے، بلکہ بڑی حکمت اور دانائی کے ساتھ معاملات کو بہتر بنانے کی کوشش کرے، کہ شکایت بھی دور ہوجائے، کسی کے دل کو ٹھیس بھی نہیں پہونچے، اور تعلقات میں کوئی کڑواہٹ بھی نہیں آئے۔ شکایتیں دور کرنا نیکی کا کام ہے، لیکن حکمت ودانائی اس کے لئے پہلی شرط ہے۔
سچ یہ ہے کہ نہ کسی شوہر کو اچھا لگتا ہے کہ کوئی اس کی بیوی کی شکایت کرے، اور نہ کسی بیٹے کو اچھا لگتا ہے کہ کوئی اس کے والدین کی شکایت کرے۔ دونوں صورتوں میں اسے شدید قسم کا انقباض اور رنج ہوتا ہے۔ سمجھ دار بیوی اور دانا والدین اس کا بہت زیادہ لحاظ کرتے ہیں کہ ان سب کو ٹوٹ کر چاہنے والا کہیں ان کی ذرا سی غلطی سے خود ٹوٹ پھوٹ کا شکار نہ ہوجائے۔
بیوی کے سلسلے میں والدین کی شکایت دور کرنے کا ایک طریقہ یہ ہے کہ شوہر بڑھ کر خود والدین کی خدمت کرنے لگے، کہ والدین کو بیٹے کی خدمت کے آگے بہو کی کوتاہیاں نظر نہ آئیں، اسی طرح والدین کے سلسلے میں بیوی کی شکایتیں دور کرنے کا ایک طریقہ یہ بھی ہے کہ شوہر بیوی کا زیادہ خیال رکھنے لگے، کہ بیوی اس کی چاہت کو دیکھ کر دوسروں کی تکلیف دہ باتوں کو نظر انداز کردے۔
شوہر کو بہت خوشی ہوتی ہے جب وہ دیکھتا ہے کہ اس کی بیوی اس کے والدین سے بہت خوش ہے، اور بیٹا اپنے آپ کو بہت خوش نصیب سمجھتا ہے جب اس کے والدین اس کی بیوی سے راضی نظر آتے ہیں۔ پس اگر گھر میں ہر کوئی دوسرے کے ہاتھ میں خوشی کا جام تھما دے تو سب کے ہاتھ میں خوشی کے جام آجائیں۔ اور گھر خوشیوں کا گہوارہ بن جائے۔

اللہ کی رحمت ہو ڈاکٹر علوانی اور ڈاکٹر ترابی پر

اللہ کی رحمت ہو ڈاکٹر علوانی اور ڈاکٹر ترابی پر
محی الدین غازی
اللہ رحم فرمائے، امت کو ایک ہی وقت میں دو عظیم فکری رہنماؤں کے چلے جانے کا غم اٹھانا پڑا، اللہ دونوں بزرگوں کو اپنا قرب عطا کرے، اور ہم پسماندگان کو دل کی گرمی اور روح کی تڑپ نصیب کرے۔
یہ بات درست لگتی ہے کہ اس دور میں کار تجدید کسی ایک مجدد کا نہیں بلکہ مجددین کے ایک کاروان کا طالب ہے، اور وثوق کے ساتھ کہا جاسکتا ہے، کہ یہ دونوں رہنما اس عہد کے کاروان تجدید کی صف اول میں شامل تھے، ایک علامہ طہ جابر علوانی، جن کے بارے میں کہا جاسکتا ہے کہ ’’امریکہ میں سرمایہ ملت کا نگہبان‘‘، اور دوسرے علامہ حسن ترابی، جو سوڈان میں اسلامی جدوجہد کے امین ونقیب تھے، دونوں بزرگوں میں بڑی مشابہت تھی، دونوں گروہی اور مسلکی اختلافات سے بہت اوپر اٹھ کر دیکھتے اور سوچتے تھے، دونوں پوری امت کے فکری اور علمی احیاء کے لئے فکرمند رہتے تھے، دونوں حالات کے نبض شناس تھے، دونوں کو اللہ تعالی نے مستقبل بینی کی یک گونہ صلاحیت سے نوازا تھا، دونوں ہمارے علمی ورثے کے گہرے واقف کار اور سچے پاسبان تھے، تاہم دونوں اندھی تقلید اور نری روایت پرستی کے خلاف تھے، اور دونوں امت میں اجتہادی روح کو زندگی اور تازگی دینے کے لئے کوشاں تھے، چونکہ وہ تجدید واجتہاد کے راستے پر گامزن تھے، اس لئے ان سے غلطیاں بھی ہوتی تھیں، اور وہ غلطیاں نظر بھی آتی تھیں۔
دراصل جو تقلید اور روایت پسندی کے راستے پر چلتا ہے، اس کو معذور سمجھا جاتا ہے، اور اس کی غلطیاں تقلید اور روایات کے پردے میں چھپ جاتی ہیں، لیکن جو اجتہاد کرتا ہے، وہ اجتہادی غلطیوں کا شکار بھی ہوتا ہے، اور وہی نشانہ تنقید بھی بنتا ہے، تاہم ساری غلطیوں کے باوجود وہ اجتہاد کرنے کی عظیم ترین خوبی سے مالا مال ہوتا ہے۔ ایک مسلمان کے لئے بہترین مقام اجتہاد کا مقام ہے، ایسے لوگ اپنی اجتہادی غلطیوں کے باوجود انتہائی قابل قدر ہوتے ہیں۔ ایک دانائے راز نے بہت صحیح کہا ہے کہ ’’تم غور وفکر کرو اور غلطی کرو یہ اس سے کہیں بہتر ہے کہ تم عقل پر تالے ڈال کر غلطیوں سے محفوظ ہوجاؤ‘‘۔ شکست کا سامنا بھی انہیں کو کرنا ہوتا ہے جو میدان جنگ میں اترتے ہیں، جو زمانے کی نفیر عام کو نظر انداز کرکے گھر بیٹھ رہتے ہیں، ان کے حصے میں شکست نہیں بلکہ ذلت آتی ہے۔
اس وقت امت مسلمہ میں جو بھی فکری تازگی اورعقل وخرد کی زندگی محسوس ہوتی ہے، اس میں ڈاکٹر ترابی اور ڈاکٹر علوانی کی پیش قدمیوں کا بڑا حصہ ہے۔ اور ’’وہ نصف صدی کا قصہ ہے دوچار برس کی بات نہیں‘‘
ڈاکٹر ترابی اور ڈاکٹر علوانی دونوں ہی مغرب میں رہنے والے مسلمانوں کے مسائل کے سلسلے میں بہت زیادہ سوچتے تھے، اور بہت ساری جرأت مندانہ تجویزیں اور فتوے بھی پیش کرتے تھے، ان تجویزوں اور ان فتووں سے اختلاف ہوسکتا ہے، لیکن یہ ماننا قرین انصاف ہے کہ وہ شتر مرغ کی روش اختیار کرتے ہوئے ان مسائل کے انکاری نہیں بنے تھے بلکہ ان کے حل کے متلاشی تھے۔
تیزی سے بدلتی ہوئی دنیا کے مسائل بھی ان کے غوروفکر کا خاص موضوع تھے، جتنی تیز رفتاری سے دنیا بدل رہی ہے، اسی تیز رفتاری سے سوچنے کے وہ داعی تھے۔
ان دونوں کی نظر میں مغرب کے مسلمانوں سے زیادہ مغرب زدہ مسلمانوں کا مسئلہ توجہ کا طالب تھا، وہ ایسے تعلیمی نظام اور علوم کی ایسی تشکیل نو کے داعی تھے، جو مغرب کے فلسفہ زندگی کی بجائے مکمل طور سے اسلام کے نظریہ حیات سے ہم آہنگ ہو۔
گو کہ اردو داں حلقے کی واقفیت ان بزرگوں سے بہت سرسری نوعیت کی ہے، کیونکہ ان کے افکار اردو زبان میں بہت کم منتقل ہوسکے۔ تاہم ان کی فکری کوششوں کے اثرات ہر جگہ کچھ نہ کچھ پائے جاتے ہیں۔
قحط الرجال کے اس دور میں جبکہ مردان فکروعمل کا آنا بہت کم اور جانا بہت زیادہ نظر آتا ہے، اور قہر الرجال کے اس زمانے میں جبکہ بہت سارے مجاہدان فکروقلم یا تو جیلوں میں نظربند ہیں، یا اظہار رائے کے بنیادی حق سے محروم ہیں، نئی نسل کی ذمہ داری بہت بڑھ جاتی ہے، ہر دور سے بہت زیادہ۔